កម្ពុជារកចំណូលបានជាង៤០០លានដុល្លារពីការនាំអង្ករក្នុងរយៈពេល១១ខែកន្លងមកនេះ

សហព័ន្ធស្រូវអង្ករកម្ពុជា (CRF) បានឱ្យដឹងថាក្នុងរយៈពេល ១១ខែ នៃឆ្នាំ២០២៤ កម្ពុជាបាននាំចេញអង្ករបានចំនួន ៥៧៥ ៥៦២តោន​ ដែលទឹកប្រាកចំនួន​ ៤១៣.៩០លានដុល្លារ ដែលបង្ហាញអំពីតម្រូវការនៅតែមានកំណើន។

យោងតាម លោក លន់ យ៉េង អគ្គលេខាធិការនៃ CRF សម្រាប់ការនាំអង្ករជាង៥៧ម៉ឺនតោន​នេះគឺត្រូវបាននាំចេញតាមរយៈក្រុមហ៊ុននាំចេញអង្ករចំនួន ៥៥ ក្រុមហ៊ុន ទៅកាន់គោលដៅចំនួន ៦៧ ដែលក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន ​២៦ ​បានបរិមាណអង្ករចំនួន ២៨៣ ៩៨១ តោន គិតជាទឹកប្រាក់ចំនួន ២០៧.៥៥​ លានដុល្លារសហរដ្ឋអាមេរិក  ទៅកាន់ប្រទេសចិន ​រួមទាំងហុងកុង និងម៉ាកាវ ចំនួន ១០៩ ៤៤៨ តោន គិតជាទឹកប្រាក់ចំនួន ៦៩.៩៧ លានដុល្លារ។

​លោកបានថ្លែងបន្តទៀតថា សម្រាប់ការនាំចេញទៅកាន់ប្រទេសក្នុងអាស៊ាន រួមទាំងទីម័រខាងកើត ចំនួន ៧ប្រទេសបានបរិមាណ ចំនួន  ១១៣ ៧៩២ តោន​ គិតជាទឹកប្រាក់ចំនួន ៧៦.៣៤ លានដុល្លារសហរដ្ឋអាមេរិក និងទៅកាន់ គោលដៅ ៣១ ប្រទេសផ្សេងទៀតមាន អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី  ញ៉ូហ្សេឡេន ។ល។ បានចំនួន   ៦៨ ៣៤១ តោន គិតជាទឹកប្រាក់ចំនួន  ៦០.០៤ លានដុល្លារសហរដ្ឋអាមេរិក។

លោកថា ចំពោះប្រភេទអង្ករ បាននាំចេញអង្ករក្រអូបចំនួន ៧៤.៨៥% ប្រភេទអង្ករស ធម្មតា​ ២០.១០% អង្ករចំហ៊ុយ ២.៩៥% អង្ករសរីរាង្គចំនួន ១.៨១%  និងអង្ករផ្សេងៗចំនួន ០.២៩% ។

ជាមួយគ្នានេះដែរ បើតាមរបាយការណ៍ដដែល ប្រទេសកម្ពុជាក៏បាននាំចេញស្រូវចំនួន ៤ ៦៤២ ៥១១ តោនស្រូវសើម ដែលគិតជាទឹកប្រាក់បានប៉ាន់ប្រមាណ ១ ៣៧៨.៧៣ លានដុល្លារសហរដ្ឋអាមេរិក ដែលក្នុងនោះ ៨៨% បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញ ពីអាជ្ញាធរមានសមត្ថកិច្ច៕