ព័ត៌មានអន្ដរជាតិ

PTT គ្រោងចំណាយប្រាក់ជាង ២០ ប៊ីលានដុល្លារ ដើម្បីជំរុញអាជីវកម្ម និងការកាត់បន្ថយកាបូន

បានផុស

១ year មុន

នៅ

ថ្ងៃចន្ទ ២៣ ធ្នូ ២០២៤

ដោយ

ក្រុមហ៊ុនថាមពលថៃ PTTEP កំពុងរៀបចំបែងចែកថវិកាចំនួន ២១,២ ប៊ីលានដុល្លារ ដើម្បីជំរុញអាជីវកម្មស្នូល និងគាំទ្រផែនការកាត់បន្ថយកាបូនរបស់ខ្លួន ក្នុងរយៈពេល ៥ ឆ្នាំទៅមុខ។ នេះបើតាមការចុះផ្សាយរបស់កាសែត បាងកកប៉ុស្តិ៍។

អនុប្រធានប្រតិបត្តិក្រុមហ៊ុន PTT ទទួលបន្ទុកហិរញ្ញវត្ថុ និងគណនេយ្យ អ្នកស្រី Chanamas Sasnanand បានឱ្យដឹងថា ថវិកាដែលបានកំណត់ នឹងត្រូវចំណាយចន្លោះពីឆ្នាំ ២០២៥-២០២៩ ដោយនឹងជំរុញ និងលើកកម្ពស់តម្លៃនៃអាជីវកម្មរុករក និងផលិតប្រេងរបស់ក្រុមហ៊ុន និងជួយក្រុមហ៊ុនឱ្យឆ្ពោះទៅរកគោលដៅអព្យាក្រឹតកាបូននៅឆ្នាំ ២០៥០។

ក្រុមហ៊ុននឹងប្រើកញ្ចប់មួយនៃថវិកា សម្រាប់ផែនការបណ្តាក់ទុនចូលទៅក្នុងអាជីវកម្មថ្មី ទាក់ទងនឹងការផ្លាស់ប្តូរទៅប្រើថាមពលស្អាត ខណៈគ្រោងចំណាយ ៧,៨២ ប៊ីលានដុល្លារ សម្រាប់ឆ្នាំក្រោយ។

អ្នកស្រី Chanamas បន្តថា៖ «ផែនការវិនិយោគរបស់យើងនៅឆ្នាំក្រោយ នៅតែផ្តោតលើការធានាសន្តិសុខថាមពលសម្រាប់ប្រទេសថៃ ទន្ទឹមនឹងការពង្រឹង និងពង្រីកការវិនិយោគនៅក្នុងអាជីវកម្មរុករក និងផលិតនៅក្រៅប្រទេស ដើម្បីជំរុញកំណើនប្រកបដោយនិរន្តរភាពរយៈពេលវែង»។

ជាមួយគ្នានេះផងដែរ ក្រុមហ៊ុន PTT បានកំណត់គោលដៅកាត់បន្ថយការបំភាយឧស្ម័នផ្ទះកញ្ចក់ យ៉ាងហោចណាស់ ៣០ ភាគរយ នៅឆ្នាំ ២០៣០ និងបានបង្កើនគោលដៅដល់ ៥០ ភាគរយ នៅឆ្នាំ ២០៤០។ អ្នកស្រី Chanamas បាននិយាយថា ថវិកាសរុបចំនួន ៧៧ លានដុល្លារ នឹងប្រើសម្រាប់សកម្មភាពកាត់បន្ថយការបំភាយឧស្ម័ននៅឆ្នាំ ២០២៥។

ចាប់ពីឆ្នាំ ២០២៥ ដល់ឆ្នាំ ២០២៩ ក្រុមហ៊ុន PTT នឹងគាំទ្រដល់ឱកាសវិនិយោគលើការទាញយកថាមពលពីកម្លាំងខ្យល់ ការផ្ដល់សេវាកម្មចាប់យកកាបូន និងការស្តុកទុក ការអភិវឌ្ឍន៍ឥន្ធនៈអ៊ីដ្រូសែន និងដើមទុនបណ្តាក់ទុនរួមគ្នាជាដើម៕