ការ​ធ្លាក់​ចុះ​នៃ​ការ​លក់​ដី​នៅប្រទេសចិន​តែ​បន្ត ខណៈ​​​ក្រុមហ៊ុន​អភិវឌ្ឍន៍​​​ឈាន​ដល់​ចំណុច​ខ្សោយបំផុតពុំធ្លាប់មាន

ការលក់ដីធ្លីនៅទូទាំងប្រទេសចិនបានធ្លាក់ចុះដល់កម្រិតទាបបំផុតក្នុងរយៈពេលប៉ុន្មានឆ្នាំចុងក្រោយនេះ ជាមួយនឹងការធ្លាក់ចុះជិត ២០ ភាគរយនៅឆ្នាំ ២០២៤ ដែលបង្ហាញពីការខិតខំជំនះនៅក្នុងទីផ្សារអចលនទ្រព្យដែល​អ្នកអភិវឌ្ឍន៍នៅក្នុងវិស័យនេះពុំមានលទ្ធភាព​ពង្រីកការវិនិយោគបន្ថែម។

គិតត្រឹមថ្ងៃទី ២៩ ខែធ្នូកន្លងមកនេះ ការលក់ដីធ្លីនៅក្នុងទីក្រុងចំនួន ៣០០ របស់ប្រទេសចិន មានចំនួនសរុបត្រឹមតែ​១,​៣៨ ពាន់លានម៉ែត្រការ៉េតែប៉ុណ្ណោះ​​ធ្លាក់ចុះ ១៦ ភាគរយធៀបទៅបណ្តាឆ្នាំមុនៗ។ នេះបើយោងតាមស្ថាប័នទិន្នន័យអចលនទ្រព្យ China Index Academy ។

ខណៈពេលដែលតួលេខពីស្ថាប័នមានភាពខុសគ្នាបន្តិចបន្តួចដោយសារវិធីសាស្រ្តផ្សេងៗគ្នា ប៉ុន្តែតួលេខទាំងអស់ចង្អុលទៅការធ្លាក់ចុះគួរឱ្យកត់សម្គាល់។ ស្ថាប័នអចលនទ្រព្យ China Real Estate Information Corp (CRIC) បានព្យាករណ៍ថាការលក់ដីធ្លីប្រចាំឆ្នាំធ្លាក់ចុះ ១៧% ដែលផ្ទៃសរុបមានចំនួនប្រមាណ ១,​១ ពាន់លានម៉ែត្រការ៉េ។ គិតត្រឹមថ្ងៃទី ២០ ខែធ្នូ ដីលក់បានត្រឹមតែ ១,​០៣ ពាន់លានម៉ែត្រការ៉េ។

យោងតាម ​​CRIC មុនឆ្នាំ ២០២១ នៅពេលដែលទីផ្សារអចលនទ្រព្យរបស់ប្រទេសចិនស្ថិតនៅលើគន្លងកើនឡើង ប្រតិបត្តិការដីធ្លីប្រចាំឆ្នាំមានលើសពី ២ ពាន់លានម៉ែត្រការ៉េ។

ចាប់តាំងពីត្រីមាសទី ៣ នៃឆ្នាំ ២០២១ វិបត្តិសាច់ប្រាក់កាន់តែកើនឡើង និងការលក់អចលនទ្រព្យធ្លាក់ចុះបានរុញច្រានអ្នកអភិវឌ្ឍន៍កាន់តែលំពាក ដោយបង្ខំឱ្យពួកគេកាត់បន្ថយការវិនិយោគ និងការទិញដីដើម្បីធានាការរស់រានមានជីវិតនៃអាជីវកម្មរបស់ខ្លួន។ ការ​លក់​ដី​បាន​ចុះ​​នៅ​ទូទាំង​ប្រទេស​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ ដោយ​សារ​អ្នក​អភិវឌ្ឍន៍​ព្យាយាម​កាត់​បន្ថយ​បំណុល៕