ព័ត៌មានអន្ដរជាតិ

ក្រុមហ៊ុនជប៉ុនសម្លឹងថៃជាមជ្ឈមណ្ឌលផលិតកម្ម ចំពេលពាណិជ្ជកម្មចិន-អាមេរិកតានតឹងជាថ្មី

បានផុស

១ year មុន

នៅ

ថ្ងៃអង្គារ ២៥ កុម្ភៈ ២០២៥

ដោយ

បណ្ដាក្រុមហ៊ុនជប៉ុនកំពុងពិចារណាផ្លាស់ប្តូរទីតាំងផលិតកម្មមួយចំនួនពីប្រទេសចិនទៅកាន់ប្រទេសថៃ ដើម្បីធានាលើភាពធន់នៃខ្សែចង្វាក់ផ្គត់ផ្គង់ និងកាត់បន្ថយហានិភ័យនៃភាពតានតឹងពាណិជ្ជកម្មរវាងចិន និងសហរដ្ឋអាមេរិក។ នេះបើតាមការចុះផ្សាយរបស់កាសែត The Nation។

អគ្គលេខាធិការក្រុមប្រឹក្សាវិនិយោគថៃ (BOI) លោក Narit Therdsteerasukdi បានឱ្យដឹងពីការណ៍នេះក្រោយធ្វើដំណើរទស្សនកិច្ចផ្ដោតលើការវិនិយោគទៅជប៉ុនកាលពីសប្ដាហ៍មុន ប៉ុន្តែមិនបានបញ្ជាក់ជាលម្អិតថាមានក្រុមហ៊ុនជាក់លាក់ណាខ្លះនោះទេ។ លោកអះអាងថា បណ្ដាក្រុមហ៊ុនជប៉ុនចាប់អារម្មណ៍លើការវិនិយោគនៅថៃ ដោយផ្ដោតលើការធ្វើពិពិធកម្មផលិតកម្មឆ្ងាយពីចិន ដើម្បីកាត់បន្ថយភាពងាយរងគ្រោះនៃខ្សែចង្វាក់ផ្គត់ផ្គង់ និងការរឹតបន្តឹងពាណិជ្ជកម្មរបស់អាមេរិក។

វេទិកាវិនិយោគថៃ-ជប៉ុនឆ្នាំ ២០២៥ ដែលលោក Narit បានចូលរួម បានទាក់ទាញក្រុមហ៊ុនជប៉ុនមកពីវិស័យចម្រុះ រួមមាន រថយន្ត គ្រឿងអេឡិចត្រូនិច គ្រឿងម៉ាស៊ីន គីមីឥន្ធនៈ ប្លាស្ទិក អាហារកែច្នៃ សេវាកម្មហិរញ្ញវត្ថុ អាជីវកម្មឌីជីថល ពាណិជ្ជកម្ម និងភស្តុភារ។

ក្នុងនោះ BOI បានគូសបញ្ជាក់ពីការត្រៀមខ្លួនរបស់ថៃសម្រាប់ការវិនិយោគ ដោយសង្កត់ធ្ងន់លើការប្តេជ្ញាចិត្ត ចំពោះការអភិវឌ្ឍប្រកបដោយនិរន្តរភាពតាមរយៈធនធានមនុស្ស ហេដ្ឋារចនាសម្ព័ន្ធ នវានុវត្តន៍ និងគោលនយោបាយលើកទឹកចិត្តរបស់រដ្ឋាភិបាលផ្សេងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមប្រឹក្សាក៏បានជំរុញផងដែរលើការវិនិយោគក្នុងឧស្សាហកម្ម និងកសិកម្មមានតម្លៃបន្ថែមខ្ពស់ ដោយដាក់ហៅថៃថាជាទីផ្សារសំខាន់ មូលដ្ឋានផលិតកម្ម មជ្ឈមណ្ឌលស្រាវជ្រាវ និងអភិវឌ្ឍ (R&D) និងដៃគូចង្វាក់ផ្គត់ផ្គង់។

ចំពោះវិស័យរថយន្ត ដែលអ្នកវិនិយោគជប៉ុនចាប់អារម្មណ៍ខ្លាំងជាងគេមួយ BOI បានគូសបញ្ជាក់ពីការបង្កើនបច្ចេកវិទ្យាផលិតកម្ម លើកទឹកចិត្តដល់ការបណ្តាក់ទុនរួមគ្នា លើកកម្ពស់ការប្រើប្រាស់គ្រឿងបន្លាស់ក្នុងស្រុក គាំទ្រការផលិតរថយន្តកូនកាត់ និងការវិនិយោគលើថាមពលស្អាត និងការអភិវឌ្ឍជំនាញ។

ក្នុងវេទិកាដដែល គេឃើញមាននាយកប្រតិបត្តិជាន់ខ្ពស់មកពីក្រុមហ៊ុនជប៉ុនដូចជាធនាគារពហុវិស័យ SMBC Bank ក្រុមហ៊ុនផលិតរថយន្ត Mitsubishi និងក្រុមហ៊ុនទូរគមនាគមន៍ Fujikura បានចែករំលែកបទពិសោធន៍វិជ្ជមានរបស់ខ្លួនក្នុងការវិនិយោគនៅក្នុងប្រទេសថៃ និងបានលើកឡើងពីឱកាសដែលកំពុងលេចឡើង៕