ព័ត៌មានអន្ដរជាតិ

អ្នកជំនាញ៖ វិស័យដែកថែបវៀតណាមកំពុងប្រឈមបញ្ហាធ្ងន់ធ្ងរ

បានផុស

១ year មុន

នៅ

ថ្ងៃសុក្រ ២១ មីនា ២០២៥

ដោយ

ក្រុមហ៊ុនអ្នកជំនាញបានព្រមានថា វិស័យដែករបស់វៀតណាមកំពុងប្រឈមមុខនឹងបញ្ហាប្រឈមជាច្រើន រួមទាំងកំណើននៃការនាំចេញដែកថែបរបស់ចិន ការផ្គត់ផ្គង់ក្នុងស្រុកលើសតម្រូវការ និងរបាំងពាណិជ្ជកម្មពិភពលោក។ នេះបើតាមការចុះផ្សាយរបស់កាសែត Viet Nam News នៅថ្ងៃសុក្រនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គលេខាធិការ និងជាអនុប្រធានសមាគមដែកថែបវៀតណាម (VSA) លោក Đinh Quốc Thái បានព្រមានថា ទោះបីជាមានសញ្ញានៃការងើបឡើងវិញក៏ដោយ ឧស្សាហកម្មដែកថែបវៀតណាមនៅតែស្ថិតនៅក្រោមកម្រិតផលិតកម្មឆ្នាំ ២០២១ ហើយប្រឈមមុខនឹងការប្រកួតប្រជែងកាន់តែខ្លាំង ក៏ដូចជាសម្ពាធតម្លៃ។

យោងតាមលោក Thái ការនាំចេញដែកថែបរបស់ប្រទេសចិនគឺជាកង្វល់ចម្បងមួយ ដោយសារតែក្រុមហ៊ុនផលិតចិនត្រូវនាំចេញច្រើនជុំវិញកម្សោយតម្រូវការក្នុងស្រុកខ្លួន ដែលអាចប៉ះពាល់ដល់ក្រុមហ៊ុនវៀតណាម ហើយគំរាមកំហែងដល់វិស័យការងារ។

ចំពោះក្នុងស្រុកវៀតណាមផ្ទាល់ ការផលិតដែកថែបលើសតម្រូវការ និងកំណើននៃការនាំចូល បានជំរុញឱ្យមានការប្រកួតប្រជែង និងសម្ពាធតម្លៃ ដែលគំរាមកំហែងដល់ប្រាក់ចំណេញរបស់ក្រុមហ៊ុនផលិតវៀតណាម។

ក្រៅពីនេះ របាំងពាណិជ្ជកម្មពិភពលោក ធ្វើឱ្យការបារម្ភកាន់តែធ្ងន់ធ្ងរ ដោយមានការរឹតត្បឹតផ្សេងៗជុំវិញការលក់បង្ខូចតម្លៃជាដើម។ របាំងពាណិជ្ជកម្មចុងក្រោយបំផុត គឺវិធានការពន្ធ ២៥ ភាគរយ លើដែកថែប និងអាលុយមីញ៉ូមនាំចូលរបស់សហរដ្ឋអាមេរិក។

ស្តង់ដារបច្ចេកទេសតឹងរ៉ឹង វិធានការការពារពាណិជ្ជកម្ម និងបទប្បញ្ញត្តិអាកាសធាតុនៅក្នុងទីផ្សារសំខាន់ៗ អាចរឹតបន្តឹងការនាំចេញដែកថែបរបស់វៀតណាម។ លោក Thai បានគូសបញ្ជាក់ថា ប្រទេសមានសេដ្ឋកិច្ចធំៗ កំពុងបង្កើតរបាំងពាណិជ្ជកម្មក្រោមហេតុផលគោលនយោបាយបរិស្ថាន និងការការពារឧស្សាហកម្មដែកថែបក្នុងស្រុករបស់ខ្លួនជាដើម។

ទន្ទឹមនឹងនេះ ការរំខានដល់ខ្សែច្រវ៉ាក់ផ្គត់ផ្គង់ និងការប្រែប្រួលតម្លៃវត្ថុធាតុដើម កំពុងជំរុញឱ្យថ្លៃដើមផលិតកម្មកើនឡើង ដោយបន្ថែមភាពតានតឹងបន្ថែមទៀតសម្រាប់វិស័យដែកថែបវៀតណាម៕