ការនាំចេញទំនិញពីតំបន់សេដ្ឋកិច្ចពិសេសភ្នំពេញ មានទំហំជិត ២ ពាន់លានដុល្លារ

ការនាំចេញទំនិញពីតំបន់សេដ្ឋកិច្ចពិសេស រ៉ូយ៉ាល់ ភ្នំពេញ មានទំហំទឹកប្រាក់ជិត ២ ពាន់លានដុល្លារ (១,៩) នៅក្នុងឆ្នាំ ២០២៤ ដែលជាកំណត់ត្រាខ្ពស់មិនធ្លាប់មាន។

លោក ហាក់ សិរី ប្រធានជាន់ខ្ពស់ផ្នែកទីផ្សារ និងទំនាក់ទំនងសាធារណៈក្រុមហ៊ុនតំបន់សេដ្ឋកិច្ចពិសេសរ៉ូយ៉ាល់ភ្នំពេញ​បានលើកឡើងថា រោងចក្រដែលចូលមក​វិនិយោគនៅក្នុងតំបន់សេដ្ឋកិច្ចពិសេសរ៉ូយ៉ាល់ភ្នំពេញ សុទ្ធសឹងជាក្រុមហ៊ុនមានបទពិសោធន៍យូរឆ្នាំ ដែលអាចផ្ដល់ចំណេះជំនាញដល់ពលករកម្ពុជា។

មិនត្រឹមតែផ្ដល់ចំណេះដឹង ក្រុម​ហ៊ុនបាននាំយកនូវការងារ ដែលជាប្រភពចំណូលដល់ពលករមានលក្ខណៈ​សមរម្យ និងបរិយា​កាស​ការងារល្អ ក្នុងឧស្សាហូបនីយកម្មកម្ពុជា។

បច្ចុប្បន្នតំបន់សេដ្ឋកិច្ចពិសេសភ្នំពេញ មានបុគ្គលិកកម្មករ សរុបប្រមាណ ៤ ម៉ឺន ៨ ពាន់នាក់ កើនឡើង។

ទិសដៅនៃការនាំចេញរបស់ក្រុមហ៊ុនដែលវិនិយោគនៅក្នុងតំបន់សេដ្ឋកិច្ចពេសគឺ មានច្រើន ដូចជាប្រទេសជប៉ុន និងមាន​ផលិតផលមួយចំនួន​ធំនាំទៅអាមេរិក និងសហភាពអឺរ៉ុប។

លោក ហាក់ សិរី លើកឡើងថា៖ «កម្ពុជានៅខ្វះខាតកម្លាំងពលកម្មជំនាញនៅឡើយ យើងមានកម្មករជំនាញ ក៏ប៉ុន្តែ កម្មករជំនាញ​នោះ នៅមានចំនួននកម្រិត ប៉ុន្តែបើសិនជាក្រុមហ៊ុនវិនិយោគ លោកមានកម្មវិធី​បំពាក់បំប៉ន ឬក៏ហ្វឹកហ្វឺនដល់បុគ្គលិក កម្មករ របស់ពួកគាត់ ពួកគាត់ផ្ដល់ព័ត៌​មានមកវិញ មកខាងក្រុម​ហ៊ុនយើងថា កម្ពុជាយើងពិតជាមានធន​ធានមនុស្សដែលល្អប្រសើរ ដែលគាត់រៀនឆាប់ចេះ យកចិត្តទុកដាក់ ងាយស្រួលបង្រៀន»។

គិតមកដល់ពេលនេះ តំបន់សេដ្ឋកិច្ចពិសេសភ្នំពេញ​ទទួលបានការវិនិយោគពីក្រុមហ៊ុន​ទូទាំង​ពិភពលោកចំនួន ១៥ ប្រទេស ដែលមានក្រុមហ៊ុនចំនួន ១១៦ ក្រុមហ៊ុន ក្នុងនោះ​ក្រុមហ៊ុនដែលមកពីប្រទេសជប៉ុនឈានមុខគេ គឺមានប្រមាណ ៤០% នៃចំនួនក្រុម​ហ៊ុនសរុប បន្ទាប់មកគឺប្រទេសចិនមានប្រមាណ ៣៣ ក្រុមហ៊ុន។

តម្លៃវិនិយោគសរុបមកពីក្រុមហ៊ុនទាំងអស់ក្នុងតំបន់សេដ្ឋកិច្ចពិសេសភ្នំពេញ មានប្រមាណ ៨២១ លានដុល្លារ ដែល​ភាគច្រើនវិនិយោគលើវិស័យអេឡិកត្រូនិក និងគ្រឿងអគ្គិសនីមាន ១៣ ក្រុមហ៊ុន។ ក្រៅពីនេះ មានគ្រឿងបង្គុំរថយន្ត និងការដំឡើងរថយន្ត ព្រមទាំងសម្ភារប្រើប្រាស់​ប្រ​ចាំថ្ងៃ និងផលិតភេសជ្ជៈ។

វិស័យឧស្សាហកម្មត្រូវបានព្យាករណ៍ថា នឹងបន្តនិន្នាការកើនឡើងក្នុងរង្វង់ ៨,៦% ក្នុងឆ្នាំ ២០​២៥ ដោយគាំទ្រដោយការរក្សាបានតុល្យភាពនៃអនុវិស័យកាត់ដេរ និងអនុវិស័យកម្មន្តសាល​មិន​មែនកាត់ដេរ៕

អត្ថបទ៖ ឡេង ដេត