ព័ត៌មានអន្ដរជាតិ

វៀតណាមចាប់ផ្ដើមចរចាពន្ធជាមួយសហរដ្ឋអាមេរិក

បានផុស

៣ សប្តាហ៍ មុន

នៅ

ថ្ងៃព្រហស្បតិ៍ ២៤ មេសា ២០២៥

ដោយ

រដ្ឋមន្ត្រីពាណិជ្ជកម្មវៀតណាមបានសន្ទនាទូរស័ព្ទជាមួយតំណាងពាណិជ្ជកម្មអាមេរិក លោក Jamieson Greer កាលពីថ្ងៃពុធ ដោយចាប់ផ្តើមកិច្ចពិភាក្សាពាណិជ្ជកម្ម ខណៈពន្ធគយបដិការ ៤៦ ភាគរយ របស់អាមេរិកលើទំនិញវៀតណាមបង្កក្ដីបារម្ភសម្រាប់សេដ្ឋកិច្ច។ នេះបើតាមការចុះផ្សាយបន្តរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទូរទស្សន៍វៀតណាម VTV បានរាយការណ៍ដោយដកស្រង់សម្តីរដ្ឋមន្ត្រីក្រសួងពាណិជ្ជកម្ម លោក Nguyen Hong Dien ដែលជាប្រធានក្រុមចរចារវៀតណាម ថា៖ «វៀតណាមត្រៀមខ្លួនជាស្រេច ដើម្បីដោះស្រាយបញ្ហាដែលមានស្រាប់ ដោយឈរលើមូលដ្ឋានផ្ដល់ផលប្រយោជន៍ទៅវិញទៅមក»។

VTV បានរាយការណ៍បន្តថា៖ «ភាគីសហរដ្ឋអាមេរិកសង្ឃឹមថានឹងឈានដល់កិច្ចព្រមព្រៀងទ្វេភាគី ឆ្ពោះទៅរកទំនាក់ទំនងពាណិជ្ជកម្មដែលមានស្ថេរភាព និងនិរន្តរភាព»។

វៀតណាម ដែលមានអតិរេកពាណិជ្ជកម្មប្រមាណ ១២៣,៥ ប៊ីលានដុល្លារ ជាមួយសហរដ្ឋអាមេរិកកាលពីឆ្នាំមុន បានរងនូវពន្ធ ៤៦ ភាគរយ របស់សហរដ្ឋអាមេរិក ហើយកន្លងមក បានប្រឹងប្រែងការទូតដើម្បីដោះស្រាយបញ្ហានេះ។

បន្ថែមពីលើការចរចារវាងមន្រ្តីនិងមន្រ្តី វៀតណាមបានស្នើទម្លាក់ពន្ធលើទំនិញនាំចូលពីសហរដ្ឋអាមេរិក មកត្រឹម ០ ភាគរយ ប្ដេជ្ញាបង្កើនការនាំចូលទំនិញអាមេរិក និងបើកផ្លូវសម្រាប់ការវិនិយោគរបស់ក្រុមហ៊ុនអាមេរិកជាដើម។

ហើយដើម្បីដោះស្រាយកង្វល់របស់អាមេរិក នាយករដ្ឋមន្ត្រីវៀតណាម លោក ផាម មិញ ឈិញ ជាថ្មីម្ដងទៀតកាលពីថ្ងៃអង្គារ បានណែនាំមន្ត្រីឱ្យប្រយុទ្ធប្រឆាំងនឹងការក្លែងបន្លំពាណិជ្ជកម្ម ការក្លែងបន្លំដើមកំណើតទំនិញ និងបញ្ហាផ្សេងៗទៀត។

គួរគូសបញ្ជាក់ថា ដូចនឹងប្រទេសភាគច្រើនទៀតដែរ សហរដ្ឋអាមេរិកបានផ្អាកពន្ធគយបដិការលើវៀតណាម រហូតដល់ដើមខែកក្កដា។ មានការព្រួយបារម្ភថា ប្រសិនបើអនុវត្ត ពន្ធគយនេះអាចធ្វើឱ្យខូចដល់កំណើនសេដ្ឋកិច្ចរបស់វៀតណាម ដែលពឹងផ្អែកលើការនាំចេញទៅកាន់ទីផ្សារសហរដ្ឋអាមេរិក និងការវិនិយោគធំដោយក្រុមហ៊ុនផលិតបរទេស៕