ព័ត៌មានអន្ដរជាតិ

នាយករដ្ឋមន្រ្តីវៀតណាម៖ ពន្ធគយបដិការជះផលអវិជ្ជមានដល់សេដ្ឋកិច្ចសកល

បានផុស

២៦ វិនាទី មុន

នៅ

ថ្ងៃចន្ទ ៥ ឧសភា ២០២៥

ដោយ

នាយករដ្ឋមន្ត្រីវៀតណាម លោក ផាម មិញ ឈិញ បានថ្លែងទៅកាន់សភានាព្រឹកថ្ងៃចន្ទនេះថា ពន្ធគយបដិការរបស់ប្រធានាធិបតីអាមេរិក លោក ដូណាល់ ត្រាំ កំពុងជះឥទ្ធិពលអវិជ្ជមានដល់សេដ្ឋកិច្ចពិភពលោក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានថ្លែងថា ពន្ធគយផ្សេងៗ រួមទាំងពន្ធ ៤៦ ភាគរយ លើទំនិញវៀតណាម កំពុងគំរាមកំហែងដល់ខ្សែច្រវ៉ាក់ផ្គត់ផ្គង់សកល ដោយបន្ថែមថា សេដ្ឋកិច្ចវៀតណាមដែលពឹងផ្អែកលើការនាំចេញ កំពុងប្រឈមមុខនឹង «ស្ថានភាពលំបាក និងស្មុគស្មាញ»។

យ៉ាងណាមិញ លោក ឈិញ បានគូសបញ្ជាក់ថា ប្រទេសវៀតណាមមានវឌ្ឍនភាពល្អ ក្នុងការចរចាជាមួយរដ្ឋបាល ត្រាំ ជុំវិញពន្ធគយ ដែលត្រូវបានពន្យារពេលអនុវត្តជាសកលរហូតដល់ដើមខែកក្កដា។ លោកបន្តយ៉ាងដូច្នេះថា៖ «យើងបានរក្សាភាពស្ងប់ស្ងាត់ និងអង់អាច ហើយបានចាត់វិធានការសមស្របមួយចំនួន។ វៀតណាមគឺជាប្រទេសដំបូងគេដែលអាមេរិកបានយល់ព្រមធ្វើការចរចាពន្ធជាមួយ»។

*កំពង់ផែក្រុង Haiphong ភាគខាងជើងនៃប្រទេសវៀតណាម*

គួរគូសបញ្ជាក់ថា បច្ចុប្បន្នវៀតណាម និងអាមេរិកកំពុងស្ថិតក្នុងដំណាក់កាលចរចាពន្ធ ដោយពុំទាន់មានការសម្រេចជាផ្លូវការណាមួយធ្វើឡើងនៅឡើយទេ។ កន្លងមក ដើម្បីជាផ្នែកមួយនៃការចរចា វៀតណាម ដែលមានអតិរេកពាណិជ្ជកម្ម ១២៣,៥ ប៊ីលានដុល្លារជាមួយអាមេរិកកាលពីឆ្នាំមុន បានស្នើទម្លាក់ពន្ធលើទំនិញអាមេរិកដល់សូន្យភាគរយ បង្កើនការនាំចូលទំនិញអាមេរិករួមទាំងឧស្ម័នធម្មជាតិ បង្រ្កាបលើទំនិញមានដើមកំណើតក្រៅវៀតណាម និងបើកផ្លូវដល់អាជីវកម្មអាមេរិកជាដើម។

កាលពីសប្ដាហ៍មុន កាសែតវៀតណាម Viet Nam News បានចុះផ្សាយថា គណៈប្រតិភូវៀតណាមគ្រោងធ្វើដំណើរទៅកាន់សហរដ្ឋអាមេរិកនៅថ្ងៃទី ១ ឧសភា ដើម្បីចូលរួមជាមួយទីភ្នាក់ងារពាក់ព័ន្ធរបស់សហរដ្ឋអាមេរិកសម្រាប់ការចរចាពាណិជ្ជកម្មទ្វេភាគី។ មកទល់ពេលនេះ មិនមានការធ្វើបច្ចុប្បន្នភាពណាមួយអំពីដំណើរចរចាចុងក្រោយនេះទេ៕