វៀតណាមរំពឹងសម្រេចកិច្ចព្រមព្រៀងពាណិជ្ជកម្មជាមួយអាមេរិក មុនថ្ងៃ ៩ កក្កដា

នាយករដ្ឋមន្ត្រីវៀតណាម លោក ផាម មិញ ឈិញ បានលើកឡើងកាលពីថ្ងៃពុធថា លោករំពឹងថា វៀតណាម​​នឹង​​សម្រេចបាន​កិច្ចព្រមព្រៀងពាណិជ្ជកម្មជាមួយ​សហរដ្ឋអាមេរិក នៅមុន​ថ្ងៃផុតកំណត់សម្រាប់ការពន្យារពេល​អនុវត្តពន្ធគយបដិការ ពោលគឺមុន​ថ្ងៃ ៩ កក្កដា​។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

ថ្លែង​ក្នុង​កម្មវិធី​មួយ​អំឡុងពេលវេទិកាសេដ្ឋកិច្ចពិភពលោក ដែល​រៀបចំឡើងនៅទីក្រុង Tianjin ភាគឦសាន ប្រទេសចិន លោក ឈិញ បាននិយាយថា រដ្ឋាភិបាលវៀតណាម​បាន​ទាក់ទងគ្នាជាញឹកញាប់ជាមួយរដ្ឋបាល ត្រាំ ចំពោះបញ្ហា​ពន្ធគយ។ ​

លោកបាន​ថ្លែងយ៉ាងដូច្នេះថា៖ «​ខ្ញុំសង្ឃឹមថា ​យើងនឹងឃើញថាលទ្ធផល​ចេញមក​លឿន តិចជាង ២ សប្តាហ៍​។ វៀតណាម និងអាមេរិក​យល់ដឹងរួមគ្នា​យ៉ាងស៊ីជម្រៅលើពន្ធ​គយ​។ ខ្ញុំសង្ឃឹមថា អ្វីៗដែលវិជ្ជមានទាំងអស់ នឹងកើតមានសម្រាប់យើង»។

វៀតណាម ដែលជាមជ្ឈមណ្ឌលផលិតកម្មដ៏ធំមួយនៅអាស៊ីអាគ្នេយ៍ បានធ្វើការចរចាពន្ធជាច្រើនលើកមកហើយ​ជាមួយសហរដ្ឋអាមេរិក ដែល​ការចរចាចុងក្រោយបំផុតធ្វើឡើងកាលពីសប្តាហ៍មុន។ ប្រទេសដែលមានអតិរេកពាណិជ្ជកម្មជាមួយ​អាមេរិក​មួយ​នេះ រងនូវពន្ធប្រមាណ ៤៦ ភាគរយ ពីរដ្ឋបាល ត្រាំ។​

កន្លងមក ដើម្បីជាការចរចា វៀតណាម​បាន​ស្នើ និងប្ដេជ្ញាទៅសហរដ្ឋអាមេរិកផ្សេងៗរួមទាំង បង្កើនការនាំចូលថាមពល និងទំនិញកសិកម្មអាមេរិក ដោះស្រាយរបាំងពន្ធ និងរបាំងមិនមែនពន្ធគយលើទំនិញអាមេរិក បង្ក្រាបការជួញដូរទំនិញក្លែងក្លាយ និងរឹតបណ្ដឹងប្រភពដើមនៃទំនិញនាំចេញទៅសហរដ្ឋអាមេរិកជាដើម។ មានសេចក្ដីរាយការណ៍ផងដែរថា សហរដ្ឋអាមេរិក​បាន​ដាក់ការទាមទារទៅវៀតណាម ដែលមន្រ្តីប្រទេសនេះហៅថាជាការ «ទាមទារដ៏តឹងតែង» ខណៈជំរុញឱ្យវៀតណាមកាត់បន្ថយការពឹងផ្អែកលើវត្ថុធាតុដើមចិនសម្រាប់ផលិតកម្មរបស់ខ្លួន៕