ព័ត៌មានអន្ដរជាតិ

តម្លៃមាសអន្តរជាតិធ្លាក់ចុះក្រោម ៣ ៣០០ ដុល្លារ/អោន

បានផុស

១០ ខែ មុន

នៅ

ថ្ងៃសុក្រ ២៧ មិថុនា ២០២៥

ដោយ

តម្លៃមាសអន្តរជាតិ បានធ្លាក់ចុះសម្រាប់ការជួញដូរនៅថ្ងៃសុក្រនេះ នៅក្រោម ៣ ៣០០ ដុល្លារ/អោន ដោយសារតែភាពស្រកស្រាន្តនៃជម្លោះមជ្ឈិមបូព៌ា ក៏ដូចជាសង្រ្គាមពាណិជ្ជកម្មអាមេរិក-ចិន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃមាសជួញដូរដោយផ្ទាល់ បានធ្លាក់ចុះ ១,២ ភាគរយ ដោយជួញដូរនៅតម្លៃ ៣ ២៨៨,៥៥ ដុល្លារ/អោន គិតត្រឹមម៉ោងជិត ៣ រសៀល នៅទីក្រុងហុងកុង។ ក្នុងអត្រាប្រចាំសប្ដាហ៍ តម្លៃនេះធ្លាក់ចុះប្រមាណ ២,៣ ភាគរយ។

ចំណែកឯមាសនាពេលអនាគតរបស់អាមេរិកវិញ បានធ្លាក់ចុះ ១,៤ ភាគរយ ដោយជួញដូរនៅតម្លៃ ៣ ៣០០,៤០ ដុល្លារ/អោន។

អ្នកជំនាញទីផ្សារបានប្រាប់រ៉យទ័រថា សុទិដ្ឋិនិយមលើការជួញដូរទ្រព្យសម្បត្តិដែលងាយប្រឈមហានិភ័យបានកើនឡើង ដែលធ្វើឱ្យការទិញមាស ដែលជាទ្រព្យសម្បត្តិសុវត្ថិភាពធ្លាក់ចុះ។ នោះបណ្ដាលមកពីការថមថយនៃភាពតានតឹងជម្លោះនៅជម្ឈិមបូព៌ា ក្រោយអ៊ីស្រាអែល និងអ៊ីរ៉ង់ ព្រមព្រៀងគ្នាលើបទឈប់បាញ់កាលពីដើមសប្ដាហ៍ ក្រោយវាយប្រហារគ្នា ១២ ថ្ងៃ។

ជាមួយគ្នានោះ មន្ត្រីសេតវិមានបាននិយាយកាលពីថ្ងៃព្រហស្បតិ៍ថា សហរដ្ឋអាមេរិកបានសម្រេចកិច្ចព្រមព្រៀងជាមួយចិន ស្តីពីវិធីពន្លឿនការនាំចេញរ៉ែកម្រទៅកាន់សហរដ្ឋអាមេរិក ចំពេលមានកិច្ចខិតខំប្រឹងប្រែងដើម្បីបញ្ចប់សង្គ្រាមពាណិជ្ជកម្មរវាងប្រទេសមានសេដ្ឋកិច្ចធំជាងគេបំផុតទាំង ២។

យ៉ាងណាមិញ តម្លៃមាសអាចមានការប្រែប្រួលបន្តទៀត ដោយឥឡូវនេះវិនិយោគិនកំពុងរងចាំមើលតួលេខនៃរបាយការណ៍អតិផរណារបស់សហរដ្ឋអាមេរិក។ ជាធម្មតា កំណើនអតិរផណាអាចធ្វើឱ្យតម្លៃមាសកើនឡើង ដោយសារតែវាអាចបង្កភាពស្រពិចស្រពិលនៃសេដ្ឋកិច្ច ឬការដំឡើង ឬរក្សាគោលនយោបាយអត្រាការប្រាក់របស់ធនាគារកណ្ដាល៕