ត្រាំ៖ ពន្ធបដិការអាចនឹងចូលជាធរមានជាថ្មីមុនឬក្រោយ​ថ្ងៃ ៩ កក្កដា

ប្រធានាធិបតីសហរដ្ឋអាមេរិក ដូណាល់ ត្រាំ បាន​ប្រាប់អ្នកយកព័ត៌មាន​នៅសេតវិមាន កាលពីថ្ងៃសោរ៍ចុងសប្ដាហ៍កន្លងទៅថា ថ្ងៃទី ៩ កក្កដា មិនមែនជាកាលកំណត់ជាក់លាក់ទេ ដោយថា ពន្ធគយបដិការរបស់​សហរដ្ឋអាមេរិក​អាច​នឹង​ចូលជាធរមានជាថ្មី នៅមុន​ ឬក្រោយពេលនោះ ប្រសិន​បើការចរចាជាមួយ​​ប្រទេសផ្សេងៗមិនទាន់បាន​សម្រេច​។ នេះបើតាមការចុះផ្សាយរបស់សារព័ត៌មាន​រ៉យទ័រ។

​លោកបានថ្លែងយ៉ាងដូច្នេះថា៖ «យើងអាចធ្វើអ្វីដែលយើងចង់បាន។ យើងអាច​ពន្យារពេលវាបាន ហើយ​យើងក៏អាចធ្វើឱ្យកាត់បន្ថយពេលឱ្យខ្លីជាងមុនដែរ។ ខ្ញុំចង់ធ្វើឱ្យវាខ្លីជាងមុន​។ ខ្ញុំចង់ផ្ញើ​លិខិតទៅ​គ្រប់គ្នា(ប្រទេស)ថា៖ សូមអបអរសាទរ អ្នកនឹង​ជាប់ពន្ធ ២៥ ភាគរយ»។ ​

ការថ្លែងយ៉ាងដូច្នេះរបស់លោក ធ្វើឡើងក្រោយ​រដ្ឋមន្ត្រីក្រសួងរតនាគារសហរដ្ឋអាមេរិក លោក​ Scott Bessent ​បាន​និយាយមុននោះថា គ្រប់កិច្ចព្រមព្រៀងពាណិជ្ជកម្មជាមួយប្រទេសផ្សេងៗ អាច​ត្រូវបញ្ចប់ត្រឹមទិវាពលកម្មអាមេរិក (១ កញ្ញា)។

យ៉ាងណាមិញ ​លោក​មិនបាននិយាយអំពីការផ្លាស់ប្តូរណាមួយចំពោះកាល​កំណត់ ៩ កក្កដា ដែលកន្លងមកតម្រូវឱ្យ​​ប្រទេសនានា​សម្រេចកិច្ចព្រមព្រៀងជាមួយសហរដ្ឋអាមេរិកនោះទេ ប៉ុន្តែលោកធ្លាប់បាន​និយាយថា ប្រទេសដែលចរចាដោយស្មោះត្រង់អាចសម្រេច​បាន​កិច្ចព្រមព្រៀង៕