ផ្សារហ៊ុនថៃងើបឡើងវិញបន្តិច ​ក្រោយតុលាការធម្មនុញ្ញព្យួរតំណែង ផែថងថាន

ផ្សារហ៊ុនថៃបាន​ងើបឡើងវិញបន្តិចពេលបិទការជួញដូរម្សិលមិញ ក្រោយតុលាការធម្មនុញ្ញថៃសម្រេចព្យួរតំណែងនាយករដ្ឋមន្រ្តីរបស់លោកស្រី ផែថងថាន ស៊ីណាវ៉ាត្រ ដែលជួញបន្ធូរបន្ថយភាពតានតឹង និងភាព​មិន​ប្រាកដប្រជា​នៃព្យុះនយោបាយថៃ ខណៈអ្នកជំនាញនៅតែបន្តព្រមានពីហានិភ័យរយៈពេលវែង។ នេះបើតាមការចុះផ្សាយរបស់កាសែត The Nation នា​ថ្ងៃពុធនេះ។

សន្ទស្សន៍ហ៊ុនថៃ (SET) បាន​កើនឡើង ២០,៤៥ ពិន្ទុ ឬ ១,៨៨ ភាគរយ ដោយ​បិទការជួញដូរកាលពីថ្ងៃអង្គារ នៅ ១ ១១០,០១ ពិន្ទុ ជាមួយ​នឹង​តម្លៃជួញដូរសរុបប្រមាណ ៤១,៧ ប៊ីលាន​បាត។ ​សម្រាប់ការ​ជួញ​ដូរ​នៅថ្ងៃពុធ SET បាន​ធ្លាក់ចុះបន្តិចប្រមាណ ៤,៤៩ ពិន្ទុ ឬ ០,៤០ ភាគរយ ដោយកំពុង​ជួញ​ដូរ​នៅ ១ ១០៥ ពិន្ទុ គិតត្រឹមម៉ោង ២ រសៀល (ម៉ោងនៅក្រុងបាងកក)។

នាយកផ្នែកវិភាគមូលបត្រនៅក្រុមហ៊ុន Finansia Syrus Securities បានប្រាប់ Krungthep Turakij លោក Weerawat Wirojphoka ថា ​​ខណៈទីផ្សារមានប្រតិកម្មជាវិជ្ជមានក្នុងរយៈពេលខ្លី ទស្សនវិស័យទាំងមូលនៅតែមានលក្ខណៈស្មើ។ លោកបានកត់សម្គាល់ថា ទោះបីសន្ទស្សន៍​ SET ងើបឡើងក្ដី​ ក៏​វិនិយោគិននៅតែបន្តរងចាំមើលការសម្រេចចុងក្រោយ​របស់តុលាការធម្មនុញ្ញ ថាតើដក ឬទុកឱ្យ​លោកស្រី ផែថងថាន បន្តតំណែង ខណៈបច្ចុប្បន្ន​នាយករដ្ឋមន្ត្រីស្តីទី អាចបន្តបំពេញភារកិច្ច រួមទាំងការជំរុញច្បាប់ថវិកា​ជាដើម​នោះ។

​យ៉ាងណាក៏ដោយ អ្នកជំនាញដដែលបាន​លើកឡើង យ៉ាងដូច្នេះថា៖ «ការ​វិវត្តផ្នែកនយោបាយនៅតែជាប្រភពសំខាន់នៃភាពមិនច្បាស់លាស់។ វិនិយោគិនគួរតែជ្រើសរើស និងប្រកាន់យកយុទ្ធសាស្រ្តជួញដូរសម្រាប់ពេលបច្ចុប្បន្ន»។

អ្នកជំនាញទីផ្សារផ្សេងទៀត យល់ស្របស្រដៀងនេះដែរដោយ​ថា ការងើបឡើងវិញនៃផ្សារហ៊ុនថៃម្សិលមិញ គឺជាការស្ទុះងើបរយៈពេលខ្លី ក្រោយភាពមិនប្រាកដប្រជានយោបាយបាន​ថយចុះបន្តិច។ កន្លងមក សន្ទស្សន៍ហ៊ុនថៃបាន​ធ្លាក់ចុះជាបន្តបន្ទាប់ ដោយសារតែការដើរអូសជើងនៃសេដ្ឋកិច្ចថៃ ភាពតានតឹងជាមួយ​កម្ពុជា រួមទាំងការបែកធ្លាយសារសម្លេងសន្ទនារវាងលោកស្រី ផែថងថាន និងសម្ដេច ហ៊ុន សែន ប្រធានព្រឹទ្ធសភាកម្ពុជា និងទុទ្ទិដ្ឋិនិយមជាទូទៅនៃទីផ្សារលើបញ្ហានយោបាយថៃ៕