ក្រុមហ៊ុនបារាំង SCA ទទួលបានសិទ្ធិផ្ដល់សេវាកម្មនៅព្រលានយន្តហោះតេជោ

ក្រុមហ៊ុន សូស៊ីយេតេ កុងសេស្យូនែរ ដឺ ឡាអេរ៉ូព័រ (SCA) ដែលជាក្រុម​ហ៊ុនបុត្រ​សម្ព័ន្ធ​របស់​ក្រុម​ហ៊ុន​ចុះ​បញ្ជីនៅបារាំង VINCI ទទួលបានសិទ្ធិគ្រប់គ្រង​សេវាកម្មមួយចំនួន នៅអាកាស​យាន​ដ្ឋាន​អន្តរជាតិ​តេជោ។

ពិធីចុះហត្ថលេខាលើកិច្ចព្រមព្រៀងផ្ដល់សេវាកម្ម បានធ្វើឡើងក្រោមវត្តមានលោកអ្នកឧកញ៉ា ពុង ឃាវសែ ប្រធានក្រុមប្រឹក្សាភិបាល CAIC និង​​លោក Nicolas Notebaert ប្រធានក្រុមហ៊ុន Cambodia Airports នៅថ្ងៃទី ១០ ខែកក្កដា ឆ្នាំ ២០២៥។

លោកអ្នក ឧកញ៉ា ពុង ឃាវសែ មានប្រសាសន៍ថា៖ «តាមរយៈការជ្រើសរើស VINCI ឱ្យធ្វើប្រតិបត្តិការ​សេវា​កម្មអាកាសយានដ្ឋានសំខាន់ៗ យើងប្តេជ្ញាបន្តធ្វើឱ្យប្រសើរឡើងនូវហេដ្ឋារចនាសម្ព័ន្ធរបស់កម្ពុជា តាម​​រយៈគម្រោងដែលស្របតាមស្តង់ដារអន្តរជាតិ។ ចក្ខុវិស័យរបស់យើងគឺបន្តពង្រីក TIA ក្នុងទសវត្សរ៍​ខាងមុខ ដើម្បីគាំទ្រដល់កំណើនសេដ្ឋកិច្ចរបស់កម្ពុជា និងការតភ្ជាប់ក្នុងតំបន់»។

លោក Cyril Girot នាយកប្រតិបត្តិ នៃក្រុមហ៊ុន Cambodia Airports បានមានប្រសាសន៍ថា៖ «យើង​កំពុង​​បន្តការប្តេជ្ញាចិត្តរបស់យើងបន្តទៀតជាមួយនឹងឧត្តមភាពនៃអាកាសយានដ្ឋាន និងដើម្បីអភិ​វឌ្ឍ​វិស័យ​​​​អាកាសចរណ៍នៅកម្ពុជាបន្ថែមទៀត។ ខ្ញុំទន្ទឹងរង់ចាំភាពជាដៃគូរបស់យើងជាមួយ CAIC នៅ​ពេល​ដែលយើងទាំងពីរចែករំលែកចក្ខុវិស័យរួមក្នុងការបម្រើប្រទេសកម្ពុជា និងប្រជាជន​របស់​ខ្លួន​ដោយ​បង្កើត​តម្លៃ និងឱកាស ដូច្នេះហើយ យើងអាចពង្រីកជំហររបស់ប្រទេស»។

លោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋាន​អាកាស​ចរណ៍​ស៊ីវិល មានប្រសាសន៍ថា ពិធីចុះ​ហត្ថលេខាលើកិច្ចព្រមព្រៀងផ្ដល់សេវាកម្មដល់ក្រុមហ៊ុន SCA ដើម្បីផ្ដល់សេវាកម្មគ្រប់គ្រង នៅអាកាស​យាន​ដ្ឋានអន្តរជាតិតេជោ។

លោក ស៊ីន ចាន់សិរីវុត្ថា បញ្ជាក់ថា៖ «អាកាសយានដ្ឋានមួយៗ ត្រូវមានក្រុមប្រតិបត្តិករដែលមានវិជ្ជាជីវៈ និងបទពិសោធន៍ ក្នុងការគ្រប់គ្រង និងប្រតិបត្តិអាកាសយានដ្ឋាន ក្រុមហ៊ុនមានធនធាន និងបទពិសោធន៍​ច្រើនឆ្នាំស្រាប់ គឺ ៣០ ឆ្នាំ ក្រោមកិច្ចព្រមព្រៀងនេះ នឹងធ្វើឱ្យអាកាស​យានដ្ឋានលេចមុខមាត់ ពីការផ្ដល់​សេវា​កម្មកាន់តែប្រសើរឡើង និងកាន់តែលេចធ្លោឡើង​ក្នុងតំបន់ និងសកលលោក»។

អាកាសយានដ្ឋានអន្តរជាតិតេជោលំដាប់ 4F តម្លៃ ១,៥ ពាន់លានដុល្លារ ដំណាក់កាលទី១​ បានបិទបញ្ចប់ការ​សាងសង់​ ១០០%​​ និងត្រៀមបើកឱ្យ​ដំ​ណើរ​​ការនៅថ្ងៃទី ០៩ ខែកញ្ញា ឆ្នាំ ២០២៥។

អាកាសយានដ្ឋានអន្តរជាតិតេជោ នឹងមកជំនួសអាកាសយានដ្ឋាន​អន្តរជាតិភ្នំពេញបច្ចុប្បន្ន ដែលមាន​សមត្ថភាព​​បម្រើសេវា​កម្មដឹកភ្ញៀវទេសចរណ៍បានរហូតដល់ទៅ ៦ដងលើសព្រលាន​បច្ចុប្បន្ន។

អាកាសយានដ្ឋានអន្តរជាតិតេជោមាន៣ដំណាក់កាល គឺដំណាក់កាលទី១ តម្លៃ ១,៥ ពាន់​លាន​ដុល្លារ សាងសង់​រួចរាល់​នៅ​ឆ្នាំ ២០២៥ អាចទទួលអ្នកដំណើរបានប្រមាណ ១៣ លាន​នាក់​ក្នុងមួយឆ្នាំ ដំណាក់​កាល​ទី២ នឹងបញ្ចប់នៅឆ្នាំ ២០៣០ ដែលអាចទទួល​បានអ្នក​ដំណើរ​ប្រមាណជា ៣០ លាន​នាក់​ក្នុង​មួយ​ឆ្នាំ​ និងដំណាក់កាលចុងក្រោយ នឹងបញ្ចប់នៅឆ្នាំ ២០៥០ អាចនឹងទទួល​បានអ្នក​ដំណើរ​រហូត​ដល់ ៥០ លាននាក់ក្នុងមួយឆ្នាំ។

យោងតាមរដ្ឋលេខាធិការដ្ឋានអាកាសចរស៊ីវិល នៅក្នុងឆមាសទី១ ឆ្នាំ ២០២៥​កម្ពុជា​ទទួល​បាន​អ្នក​ដំ​ណើរ​ជាតិ​ និងអន្តរជាតិតាមផ្លូវអាកាសចំនួនជាង ៣,៦៥ លាននាក់ កើនឡើង ២០% ធៀប​នឹងរយៈ​ពេល​ដូចគ្នា កាលពីឆ្នាំ ២០២៤។

រដ្ឋលេខាធិការដ្ឋានអាកាសចរណ៍ស៊ីវិលបានព្យាករថា ការដឹកជញ្ជូនអ្នកដំណើរ​តាមផ្លូវអាកាស​នឹង​កើន​ដល់​​ចំនួន ៧,៥​លាននាក់ និងទំនិញចំនួន ៨០ពាន់តោន នៅក្នុងឆ្នាំ ២០២៥នេះ៕