សភាពាណិជ្ជកម្មកម្ពុជា៖ ម៉ាឡេស៊ីជាអ្នកវិនិយោគដ៏សំខាន់នៅកម្ពុជាតាំងពីទសវត្សរ៍ឆ្នាំ១៩៩០

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធាន​ក្រុមប្រឹក្សា​ពិគ្រោះ​យោបល់​ធុរកិច្ច​អាស៊ាន​សម្រាប់​កម្ពុជា បាន​លើក​ឡើង​ថា ក្រុមហ៊ុន​ម៉ាឡេស៊ី​ជា​អ្នកវិនិយោគដ៏សំខាន់នៅកម្ពុជាតាំងពីទសវត្សរ៍ឆ្នាំ ១៩៩០ រហូតមក​ដល់​បច្ចុប្បន្ន ដោយ​ផ្តោត​លើវិស័យ​សំខាន់ៗ​ចំនួន​ ៤ នៅ​កម្ពុជា។

ក្នុង​ជំនួបពិភាក្សារវាងសភាពាណិជ្ជកម្មកម្ពុជា និង សភាពាណិជ្ជកម្មចិនម៉ាឡេស៊ី នៅ​ថ្ងៃ​ទី​១២ ខែ​សីហា ឆ្នាំ​២០២៥ នេះ អ្នកឧកញ៉ា គិត ម៉េង បានលើកឡើងអំពីកំណើនសេដ្ឋកិច្ចកម្ពុជា និងគោលដៅ​កម្ពុជា​ក្នុងការ​សម្រេច​នូវ​ទស្សន​វិស័យ​ក្លាយ​ជា​ប្រទេស​មាន​ចំណូល​ខ្ពស់​ត្រឹមឆ្នាំ២០៥០ ដោយ​ផ្អែក​លើ​កត្តា​ជំរុញ​នានា​រួមមាន កម្លាំងពលកម្មវ័យក្មេង និងជំនាញ បរិយាកាសវិនិយោគអំណោយផល និង​គោល​នយោបាយ​យុទ្ធសាស្ត្រ​របស់​រាជរដ្ឋាភិបាល។

អ្នកឧកញ៉ា​បានចង្អុលបង្ហាញ អំពីវិស័យសំខាន់ៗមួយចំនួនសម្រាប់ការសហការដែលមានសក្តានុពល រួមមាន ការអភិវឌ្ឍន៍ហេដ្ឋារចនាសម្ព័ន្ធ សេដ្ឋកិច្ចឌីជីថល កសិកម្មប្រកបដោយចីរភាព និងទេសចរណ៍​ជា​ដើម​។

ជា​មួយ​គ្នា​នោះ អ្នកឧកញ៉ាប្រធាន បានគូសបញ្ជាក់អំពី​ទំនាក់ទំនង​សេដ្ឋកិច្ចដ៏រឹងមាំរវាងប្រទេសទាំងពីរ។ ជាក់ស្តែង​នៅឆ្នាំ ២០២៤ ទំហំពាណិជ្ជកម្មទ្វេភាគីរវាងកម្ពុជា និងម៉ាឡេស៊ី ​សម្រេច​បាន​ប្រមាណ ៨៥៩ លាន​ដុល្លារ​អាមេរិក។

អ្នក​ឧកញ៉ា គិត ម៉េង បាន​អះអាង​ថា «ក្រុមហ៊ុនម៉ាឡេស៊ីជាអ្នកវិនិយោគដ៏សំខាន់នៅកម្ពុជាតាំងពីទសវត្សរ៍ឆ្នាំ ១៩៩០ រហូតមក ដោយផ្តោតលើ​វិស័យ​សំខាន់​ៗនៅ​កម្ពុជា​ចំនួន​ ៤ រួម​មាន​ ទូរគមនាគមន៍ ធនាគារ សំណង់ និង កម្មន្តសាល»។

សូម​ជម្រាប​ថា សភាពាណិជ្ជកម្មកម្ពុជា និងសភាពាណិជ្ជកម្មចិនម៉ាឡេស៊ី បានរៀបចំ​ជំនួប​ពិភាក្សា​រវាង​ធុរជន​កម្ពុជា និងម៉ាឡេស៊ី ដើម្បីពិភាក្សាអំពីគម្រោងសហការ និងលើកកម្ពស់កិច្ចសហប្រតិបត្តិការធុរកិច្ចទ្វេភាគី ក្នុង​អំឡុងពេលដែលគណៈប្រតិភូសភាពាណិជ្ជកម្មចិនម៉ាឡេស៊ី បំពេញទស្សនកិច្ចនៅកម្ពុជារយៈពេល ៣ ថ្ងៃ ចាប់ពីថ្ងៃទី១១ ដល់ថ្ងៃទី១៣ ខែសីហា ឆ្នាំ ២០២៥។ កិច្ចពិភាក្សាផ្តោតជាសំខាន់លើ ការកំណត់កាលានុវត្តភាពសហប្រតិបត្តិការរួម ទៅលើវិស័យសក្តានុពល។

សភាពាណិជ្ជកម្មកម្ពុជា បន្តជំរុញ​កាលានុវត្តភាព និង​ជួយ​សម្រួល​ដល់​ការ​បណ្តាក់​ទុន​វិនិយោគនៅកម្ពុជា និងការ​រីក​ចម្រើន​របស់​វិនិយោគិន​អន្តរជាតិ៕

ដោយ​៖ ឌិន ថារី