ការហោះហើរសាកល្បង​លើកដំបូងរបស់អា​កាស​យានដ្ឋានអន្តរជាតិតេជោ ដំណើរការជោគជ័យ

លោក ស៊ីន ចាន់សេរីវត្ថា រដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិលបានឱ្យដឹងថា ការ​​​​ហោះហើរសាកល្បងលើកដំបូង​នៅអាកាស​យានដ្ឋាន​អន្តរ​​​​​ជាតិតេជោនៅព្រឹកថ្ងៃទី ១៥ ខែសី​ហា ឆ្នាំ ២០២៥ ដំណើរការជោគជ័យ។

ការហោះហើរសាកល្បងបានរៀបចំធ្វើឡើងក្នុងស្រុក ដោយបានហោះចេញពីព្រលានយន្តហោះភ្នំពេញ ទៅចុះចតនៅ ​ព្រ​លានយន្តហោះអន្តរជាតិតេជោនៅម៉ោង ៨៖០០ ព្រឹកថ្ងៃទី ១៥ ខែសីហា និងការហោះចេញពីព្រលានអន្តរជាតិតេជោ មកព្រលានភ្នំពេញវិញ ដែលមានអ្នកដំណើរសរុប ២០០ នាក់ មានទាំងជនបរទេស និងក្នុងស្រុក ដែលតម្រូវឱ្យមាន Passport ក្នុងការសាកល្បងលំដាប់អន្តរជាតិ។

លោក ស៊ីន ចាន់សេរីវត្ថាប្រាប់ថា៖ «ការហោះហើរសាកល្បងទទួលបានជោគជ័យ យើងធ្វើ​តេស្ត​ឧបករណ៍ដើរទាំងអស់»។

គម្រោងវិនិយោគអាកាសយានដ្ឋានអន្តរជាតិតេជោលំដាប់ 4F មានផ្ទៃដីទំហំ ២ ពាន់ ៦០០ ហិកតា មាន ៣ ដំណាក់កាល ដំណាក់កាលទី១ តម្លៃ ២ ពាន់លានដុល្លារ​បានបញ្ចប់ការសាង​សង់ទាំង​ស្រុង នឹងត្រៀមបើក​ដំណើរ​ការនៅ​ថ្ងៃទី ០៩ ខែកញ្ញា ឆ្នាំ ២០២៥ ដែលអាចដឹកអ្នកដំណើរ ១៣ លាននាក់។

ដំណាក់កាលទី២ នឹងទទួលអ្នកដំណើរ ៣០ លាននាក់ក្នុងមួយឆ្នាំ និងដំណាក់​កាល​ទី៣ នៅឆ្នាំ ២០៥០ នឹងទទួលអ្នកដំណើរ ៥០ លាននាក់ក្នុងមួយឆ្នាំ៕