ក្រុមហ៊ុនថៃធំៗនៅកម្ពុជារំពឹងថា ពហិការលើទំនិញថៃនឹងរលត់ទៅវិញ

ក្រុមហ៊ុនអាជីវកម្មថៃធំៗដែល​មាន​ប្រតិបត្តិការនៅកម្ពុជា បាន​រំពឹងថា ពហិការលើ​ទំនិញ ឬសេវាកម្ម​ថៃ​ពីសំណាក់អ្នកប្រើប្រាស់នៅកម្ពុជា នឹង​រលត់បាន​ទៅវិញនាពេលខាងមុខ យូរឬឆាប់ ជាពិសេសនៅពេលភាពតានតឹងព្រំដែនបាន​ស្រាកស្រាន្ត។

ការលើកឡើងបែបនេះ កាលពីពេលថ្មីៗ ធ្វើឡើងចំពេលដែល​ចលនាធ្វើពហិការលើទំនិញថៃផ្ទុះឡើងនៅក្នុងចំណោមអ្នកប្រើប្រាស់កម្ពុជា ជាពិសេស​ក្រោយ​សង្រ្គា​ម​ឈ្លានពានរបស់ថៃរយៈពេល ៥ ថ្ងៃ កាលពីចុង​ខែកក្កដា។ អ្នកប្រើប្រាស់កម្ពុជាជឿជាក់ថា ជម្រើសមិនប្រើទំនិញថៃរបស់ខ្លួន នឹងជួយជំរុញ​ផលិតកម្មក្នុងស្រុក ខណៈប្រកាន់ការយល់ឃើញថា ប្រាក់ចំណេញរបស់ក្រុមហ៊ុនថៃ រួមចំណែកដល់ការធ្វើទំនើបកម្មយោធារបស់យោធាថៃ។

អនុប្រធានប្រតិបត្តិជាន់ខ្ពស់ផ្នែកហិរញ្ញវត្ថុរបស់ក្រុមហ៊ុនថាមពលរដ្ឋថៃ PTT OR (PTT Oil and Retail Business Public Limited) លោកស្រី Wilaiwan Kanjanakanti បាន​ថ្លែងថា៖ «​យើងកំពុងតាមដានស្ថានការណ៍ ហើយរំពឹងថា វានឹងត្រលប់មកធម្មតាវិញក្នុងពេលឆាប់ៗនេះ។ នៅពេលដែលស្ថានភាពប្រសើរឡើង យើងនឹងវាយតម្លៃឡើងវិញ និងពិនិត្យមើលប្រតិបត្តិការអាជីវកម្មរបស់យើងនៅក្នុងប្រទេសកម្ពុជា»។ នេះបើតាមសម្រង់សម្ដីរបស់កាសែត The Nation ក្នុងអត្ថបទចុះផ្សាយកាលពីថ្ងៃព្រហស្បតិ៍។

លោកស្រីបាន​ថ្លែងយ៉ាងដូច្នេះ ក្រោយ​លើកឡើងថា ជម្លោះព្រំដែនកម្ពុជា-ថៃ បាន​បង្ករលកស្នេហាជាតិក្នុងចំណោម​អតិថិជនខ្មែរ រហូតឈានដល់ការធ្វើពហិការមិនប្រើរបស់ថៃ រួមទាំងប្រេង PTT និងកាហ្វេអាម៉ាហ្សូន។ យ៉ាងណាមិញ លោកស្រី Wilaiwan បាន​ឱ្យដឹងថា ប្រតិបត្តិការទាំងមូលរបស់ក្រុមហ៊ុន OR នៅកម្ពុជា​ក្នុងឆមាសទី១នៃឆ្នាំនេះ នៅតែមានភាពរឹងមាំ ទាំងនៅថៃ និងកម្ពុជា ប៉ុន្តែប្រតិបត្តិការនៅកម្ពុជាអាច​នឹង​ចុះខ្សោយ​នៅឆមាសទី២ ជាពិសេសត្រីមាសទី៣ ដោយសារតែការលក់ធ្លាក់ចុះ ក្នុងបរិបទពហិការ។

ស្រដៀងគ្នានឹងក្រុមហ៊ុន PTT ដែរ មន្រ្តីជាន់ខ្ពស់​របស់ក្រុមហ៊ុនភេសជ្ជៈប៉ូវកម្លាំង ខារ៉ាបាវ បាន​សម្ដែងសុទិដ្ឋិយមថា រលកពហិការនឹង​រលត់បាត់ទៅវិញបន្តិចម្ដងៗក្នុងរយៈពេលប៉ុន្មានខែខាងមុខ។

កាសែត The Nation បាន​ស្រង់សម្ដីនាយកប្រតិបត្តិជាន់ខ្ពស់ម្នាក់របស់ក្រុមហ៊ុន ខារ៉ាបាវ គ្រុប (Carabao Group) ​ដោយ​មិនបញ្ចេញឈ្មោះ កាលពីសប្ដាហ៍មុនថា៖ «​ទំនិញ និងម៉ាកយីហោថៃ អាចប្រឈមមុខនឹងបញ្ហាមួយចំនួន ប៉ុន្តែយើងជឿជាក់ថា វានឹងមានរយៈពេលខ្លី»។

មន្រ្តីដដែល​បានបន្តទៀតយ៉ាងដូច្នេះថា៖ «ទំនុកចិត្តបែបអារម្មណ៍​ក្នុងប្រទេសកម្ពុជា នៅតែបន្ត ប៉ុន្តែក្នុងរយៈពេលពី ៦-១២ ខែខាងមុខ យើងសង្ឃឹមថា ស្ថានការណ៍នឹងវិលត្រឡប់ទៅប្រក្រតីវិញ ដោយ​សារ​តែ​ប្រជាជនកម្ពុជាចូលចិត្តទំនិញថៃខ្លាំង ដូចដែលថៃស្រឡាញ់ចូលចិត្តទំនិញជប៉ុន»។

The Nation បាន​ចុះផ្សាយទៀតថា ខណៈក្រុមហ៊ុនថៃផ្អាកសកម្មភាព​ធ្វើទីផ្សារ និងផ្សព្វផ្សាយផលិតផលរបស់ខ្លួន ផលិតផលថៃនៅតែមាន​ភាព​ទាក់ទាញសម្រាប់អ្នកប្រើប្រាស់កម្ពុជា ដោយសារតែគុណភាព និងកេរ្តិ៍ឈ្មោះរបស់ម៉ាកយីហោ ទោះបីជាមន្រ្តីជំនាញទីផ្សារថៃខ្លះ ព្រួយបារម្ភពីការបាត់បង់ទីផ្សារឱ្យ​ទំនិញពីប្រទេសផ្សេងៗដូចជាវៀតណាម ចិន​ ឬម៉ាឡេស៊ី ក៏ដោយ៕

​