WB ទម្លាក់ការព្យាករកំណើនសេដ្ឋកិច្ចវៀតណាម​មកត្រឹម ៦,៦% ឆ្នាំនេះ

ធនាគារពិភព​លោក (WB) ​កាលពីថ្ងៃចន្ទ បាន​ទម្លាក់ការព្យាករ​កំណើនសេដ្ឋកិច្ចវៀតណាមសម្រាប់ឆ្នាំ ២០២៥ មកត្រឹម ៦,៦ ភាគរយ ​ធៀបនឹង​អត្រាព្យាករចាស់ ៦,៨ ភាគរយ ដោយសារតែឥទ្ធិពលនៃពន្ធបដិការរបស់ប្រធានាធិបតីអាមេរិក ដូណាល់ ត្រាំ។

​ធនាគារបាន​និយាយថា ផលិតផលក្នុងស្រុកសរុប (GDP) របស់វៀតណាម​ បានកើនឡើង ៧,៥ ភាគរយនៅក្នុងឆមាសទី១នៃឆ្នាំ​នេះ ដោយសារ​ភាព​រឹងមាំនៃការនាំចេញ នៅពេលដែល​មាន​ការសម្រុកបញ្ជា​ទិញ​ពីខាងក្រៅ ​ក្នុងបរិបទនៃភាពមិនច្បាស់លាស់លើគោលនយោបាយពាណិជ្ជកម្មសកល។

យ៉ាងណាមិញ ការនាំចេញនឹងធ្លាក់សន្ទុះមកត្រឹមបង្អួរនៅប៉ុន្មានខែចុងក្រោយនៃឆ្នាំ ២០២៥ នេះ ដែលជាហេតុធ្វើឱ្យ​ធនាគារពិភពលោកទម្លាក់ការព្យាករមកត្រឹម ៦,៦ ភាគរយ ឆ្នាំនេះ និង ៦,១ ភាគរយ នៅឆ្នាំក្រោយ​។ តួលេខនេះ ទាបជាងការព្យាកររបស់រដ្ឋាភិបាលវៀតណាម ដែលដាក់កំណើនចន្លោះពី ៨,៣-៨,៥ ភាគរយ។

ធនាគារពិភពលោកបាននិយាយថា៖ «ក្នុងនាមជាប្រទេសដែលមាន​សេដ្ឋកិច្ចផ្តោតលើការនាំចេញ វៀតណាមនៅតែងាយរងគ្រោះទៅនឹងកំណើនសេដ្ឋកិច្ចពិភពលោកយឺតយ៉ាវ និងការកាត់បន្ថយតម្រូវការពីដៃគូពាណិជ្ជកម្មសំខាន់ៗ»។ ធនាគារបន្តថា៖ «ភាពមិនច្បាស់លាស់នៃគោលនយោបាយពាណិជ្ជកម្ម ក៏អាចចាប់ផ្តើមដាក់សម្ពាធទៅលើអាជីវកម្ម និងទំនុកចិត្តរបស់អ្នកប្រើប្រាស់ផងដែរ​»។

គួរគូសបញ្ជាក់ថា ទីផ្សារនាំចេញដ៏ធំបំផុតរបស់វៀតណាម ពោលគឺសហរដ្ឋអាមេរិក បានដាក់ពន្ធ ២០ ភាគរយ លើទំនិញ​នាំចូលពីវៀតណាម ចាប់តាំងពីថ្ងៃទី ៧ ខែសីហាមក និង ៤០ ភាគរយ សម្រាប់ទំនិញដែលដឹកជញ្ជូនតាមវៀតណាម​។

ជុំវិញបញ្ហានេះផងដែរ នាយករដ្ឋមន្ត្រីវៀតណាម លោក ផាម​ មិញ ឈិញ ​បាននិយាយកាលពីថ្ងៃសៅរ៍ថា ភាពតានតឹងពាណិជ្ជកម្មសកល រួមជាមួយនឹងជម្លោះភូមិសាស្ត្រនយោបាយ និងយោធា កំពុងប៉ះពាល់ដល់ផលិតកម្ម និងច្រវ៉ាក់ផ្គត់ផ្គង់។ លោក​បានព្រមានពីសម្ពាធ​កំណើន​អតិផរណា និងអត្រាប្តូរប្រាក់ជាដើម​។

យ៉ាងណាមិញ ក្រុមហ៊ុន Oxford Economics ​ដែលជាក្រុមហ៊ុនប្រឹក្សាសេដ្ឋកិច្ចពិភពលោកឈានមុខគេ បាន​និយាយក្នុងកំណត់ត្រាមួយថា៖ «សកម្មភាពក្នុងស្រុកនៅតែរឹងមាំ​…ការប្រើប្រាស់ និងការវិនិយោគដែលដឹកនាំដោយរដ្ឋាភិបាល​ នឹង​បន្តជួយដល់កំណើន បើទោះបីជាកំណើននៃការនាំចេញថយចុះបន្ថែមទៀត​ក្ដី»៕