កូវីដ-១៩
តម្លៃព្យាបាលជំងឺកូវីដ-១៩ នៅមន្ទីរពេទ្យរ៉ូយ៉ាល់ ភ្នំពេញ មិនដូចអ្វីដែលបានបែកធ្លាយ
ខាងមន្ទីរពេទ្យ រ៉ូយ៉ាល់ ភ្នំពេញ បញ្ជាក់ថា តម្លៃព្យាបាលជំងឺកូវីដ-១៩ នៅមន្ទីរពេទ្យរ៉ូយ៉ាល់ ភ្នំពេញ មិនដូចអ្វីដែលបានបែកធ្លាយ និងផ្សព្វផ្សាយតៗគ្នានោះទេ។
ថ្មីៗនេះ មានការផ្សព្វផ្សាយ និងចែករំលែកព័ត៌មានតាមរយៈសារអេឡីចត្រូនិក Telegram អំពីតម្លៃព្យាបាលជំងឺកូវីដ-១៩ សរុប នៅមន្ទីរពេទ្យ រ៉ូយ៉ាល់ ភ្នំពេញ បានបង្ហាញថា តម្លៃព្យាបាលចាប់ពី ៧០,០០០ដុល្លារឡើងទៅ ចំពោះអ្នកជំងឺដែលមានស្ថានភាពធ្ងន់ ត្រូវការដាក់អុកស៊ីសែនរយៈពេល១៤ថ្ងៃ ឬតម្លៃព្យាបាលចាប់ពី ១៩,០០០ដុល្លារឡើងទៅចំពោះស្ថានភាពស្រាល។
បុគ្គលិកមន្ទីរពេទ្យ រ៉ូយ៉ាល់ ភ្នំពេញ សុំមិនបញ្ចេញឈ្មោះ បានប្រាប់ថា “កម្ពុជាថ្មី” ថា ទាក់ទងទៅនឹងតម្លៃនៃសេវាព្យាបាលជំងឺកូវីដ-១៩ ខាងមន្ទីរពេទ្យមិនមានការកំណត់តម្លៃជាកញ្ចប់ ឬបង្ហាញថ្លៃសេវាទុកជាមុននោះទេ គឺអាស្រ័យលើស្ថានភាពអ្នកជំងឺ និងការវាយតម្លៃពីវេជ្ជបណ្ឌិតសិន ទើបអាចកំណត់តម្លៃព្យាបាលបាន។
ទាក់ទងទៅនឹងការលើកឡើងអំពីតម្លៃព្យាបាលជំងឺកូវីដ-១៩ នៅមន្ទីរពេទ្យ រ៉ូយ៉ាល់ ភ្នំពេញ ដែលមានតម្លៃ ចាប់ពី ១៩,០០០ដុល្លារ រហូតដល់ ៧០,០០០ដុល្លារនោះ ត្រូវបុគ្គលិករូបនោះ លើកឡើងថា នោះជាតម្លៃប៉ាន់ស្មាន ដែលតម្លៃព្យាបាលជំងឺកម្រិតស្រាលពិតប្រាកដអាចធូរថ្លៃជាង១៩,០០០ដុល្លារ អាស្រ័យតាមស្ថានភាពអ្នកជំងឺស្រាលកម្រិតណា។
បុគ្គលិករូបនេះ លើកឡើងថា៖ “ខ្ញុំធ្លាប់សួរខាងខ្ញុំដែរ គេថាតម្លៃហ្នឹងគឺមិនអាចកំណត់បានទេ គឺអាស្រ័យលើស្ថានភាពជាក់ស្ដែង យើងអត់អាចវាយតម្លៃទុកមុនបានទេ លុះត្រាតែមានអ្នកជំងឺហើយ ទើបគ្រូពេទ្យយើងពិនិត្យមើល ហើយវាយតម្លៃ ទើបយើងជូនដំណឹងទៅអ្នកអ្នកជំងឺ និងគ្រួសារអ្នកជំងឺ តើអាចទទួលសេវាការព្យាបាលនេះបាន ឬអត់?”។
បុគ្គលិកខាងលើបញ្ជាក់បន្ថែមថា ថ្លៃព្យាបាលជំងឺកូវីដ-១៩កម្រិតធ្ងន់បំផុត នៅមន្ទីរពេទ្យ រ៉ូយ៉ាល់ភ្នំពេញ មិនលើស៧ម៉ឺនដុល្លារដូចការបែកធ្លាយនោះទេ។
បុគ្គលិករូបនោះ បញ្ជាក់ថា៖ “និយាយទៅតម្លៃ៧ម៉ឺនដុល្លារហ្នឹងលុះត្រាតែធ្ងន់ខ្លាំង ធ្ងន់ខ្លាំងដល់អ្នកជំងឺដកដង្ហើមលែងរួច ត្រូវចុះបំពង់កដាក់អុកស៊ីសែនជាដើមនោះ។ ប៉ុន្តែអាការៈធ្ងន់បែបហ្នឹងអត់ងាយមានទេ គឺកម្រមានណាស់”។
បុគ្គលិកខាងលើ មិនអាចបញ្ជាក់អំពីចំនួនសរុបនៃអ្នកជំងឺកូវីដ-១៩ ចូលព្យាបាលនៅមន្ទីរពេទ្យ រ៉ូយ៉ាល់ ភ្នំពេញ និងចំនួនអ្នកជាសះស្បើយទេ។
សូមជម្រាបថា កាលពីថ្ងៃទី៤ ខែឧសភា ឆ្នាំ២០២១ ក្រសួងសុខាភិបាល បានចេញសេចក្តីជូនដំណឹងស្តីពីការអនុញ្ញាត ឱ្យសេវាសុខាភិបាលឯកជនចំនួន៣ទីតាំង មានសិទ្ធិទទួលពិនិត្យ ថែទាំ និងព្យាបាលអ្នកជំងឺកូវីដ-១៩។ សេវាសុខាភិបាលឯកជន ចំនួន៣ទីតាំងមានដូចជា មន្ទីរពេទ្យសង់ត្រាល់ មន្ទីរពេទ្យរ៉ូយ៉ាល់ភ្នំពេញ និងមន្ទីរពហុព្យាបាលវិសាលសុខ។ សេវាសុខាភិបាលឯកជន ចំនួន៣កន្លែងនេះ ក៏បានទទួលសិទ្ធិធ្វើតេស្ករកអង់ទីហ្សែនកូវីដ-១៩ ផងដែរ៕
អត្ថបទ៖ ច័ន្ទ វីរៈ
សូមអានព័ត៌មានពាក់ព័ន្ធ៖ ថ្មី! វិសាល សុខ បង្ហាញថ្លៃព្យាបាលខុសគ្នាក្នុងមួយថ្ងៃរវាងអ្នកជំងឺកូវីដ-១៩ ខ្មែរ និងបរទេស
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ