បុរសម្នាក់ ដាច់ចិត្តប្រកាសលក់ផ្ទះដើម្បីជីវិតចុងក្រោយសិល្បករជើងចាស់លោក នូ ស៊ឹប

សាធារណជនសម្តែងការអាណិតអាសូរចំពោះតារាចម្រៀងជើងចាស់ លោក នូ ស៊ឹប ខណ:ដែលបច្ចុប្បន្នលោកកំពុងមានជំងឺប្រចាំកាយនិងជួបកាខ្វះខាតខ្លាំង ហើយធ្លាប់បង្ហើបថាសុំស្នាក់នៅជាមួយកូនធម៌ នៅម្តុំវត្តភ្នៀត។ ខណៈដោយក្តីអាណិតស្រលាញ់ បុរសដែលដែលទំនុកបម្រុងមើលថែលោក នូ សុឹប ច្រើនឆ្នាំមកនេះ ប្រកាសលក់ផ្ទះខ្លួនយកលុយមើលជំងឺវីរសិល្បករជើងចាស់រូបនេះតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្វីដែលគួរឱ្យសង្វេគបំផុត គឺវិថីជីវិតនៃអតីតតារាចម្រៀងល្បីឈ្មោះ លោក នូ ស៊ឹប ដែលបានចំណាយពេលវេលាស្ទេីរមួយជីវិតជាមួយសិល្បៈ ប៉ុន្តែបែរជារកតែផ្ទះមួយខ្នងជារបស់ខ្លួនមួយដើម្បីជ្រកកោន ក៏គ្មាន បានត្រឹមបន្ថែមទុក្ខលំបាកដល់គ្រួសារមិនជាប់សាច់ឈាមមួយ និងធ្លាប់មានគុណលើ មានចិត្តធម៌ឱ្យលោកស្នាក់នៅជាមួយ ទាំងដែលកំពុងជួបការខ្វះខាតដូចគ្នា។ ដូច្នេះក៏មានការអំពាវនាវសុំដល់សាធារណជនជួយដល់លោកក្នុងវេលាចាស់ជរានេះផង ខណៈមានជំងឺប្រចាំកាយដូចជាលើសឈាម និងដុំសរសៃជើងជាដើម។

បើតាមការរៀបរាប់ពីលោក នូ ស៊ឹប កាលពីកន្លងទៅបានឱ្យថា លោកពុំមានផ្ទះសំបែងខ្លួនឯងទេ ហើយលោកគ្រូរស់នៅដោយការជួបបន្ទប់គេមានរយ:ពេលជាង ៣០ឆ្នាំហើយ។ ចំណែកបច្ចប្បន្នកំពុងផ្ញើជីវិតរស់នៅជាមួយកូនធម៌ស្ថិតនៅភូមិបឹងខ្នំ សង្កាត់ពន្សាំង ខណ្ឌព្រែកភ្នៅ។

ក្រោយឃើញដំណឹងនៃការប្រកាសលក់ផ្ទះដើម្បីបងប្រុស សាធារណជននិងអ្នកក្នុងចង្កោមសិល្បៈមួយចំនួន បានសម្តែងក្តីអាណិត និងស្ញប់ស្ញែងដល់ទឹកចិត្តប្អូនលោកផងដែរដែលមិនចោលបង ទោះបីជាស្ថិតក្នុងភាពខ្វះខាតដូចគ្នា។ ក្នុងនោះមានមតិអំពាវនាវផងដែរថា “តារាចម្រៀងជើងចាស់លោក នូ ស៉ិប, ប្អូនប្រុសចិត្តធម៌ប្រកាសលក់ផ្ទះសូមបងប្អូនជួយចែករំលែកវីដេអូនេះផងពីព្រោះអស់លទ្ធភាពហើយបងប្អូនអើយសូមមេត្តាជួយគាត់ផង”។

តារាចម្រៀងជើងចាស់រូបនេះគ្មានប្រពន្ធនិងកូននោះទេ ពោលគឺកន្លងមកលោកគ្រូរស់នៅតែម្នាក់ឯង​ ហើយរយៈកាលប៉ុន្មានឆ្នាំចុងក្រោយនេះ ជំងឺប្រចាំកាយរបស់លោកពិតជាធ្វើទុក្ខក្នុងខ្លួនខ្លាំងរហូតដល់សឹងទ្រាំមិនបាន ខណ:ជំងឺតែងធ្វើទុក្ខស្ទើរជាប្រចាំ ។ ម្យ៉ាងទៀត លោកក៏ពុំមានលទ្ធភាពដើម្បីទៅរកពេទ្យព្យាបាលនោះដែរ។ សូមបញ្ជាក់ថា លោក នូ ស៊ឹប អាយុ៧៩ឆ្នាំ បានធ្លាក់ខ្លួនឈឺដុំសរសៃជើងនិងលើសឈាមមានរយៈពេលយូរឆ្នាំមកហើយពេលនេះស្ថានភាពជំងឺលោកកាន់តែដុនដាបខ្លាំង៕ អត្ថបទ ៖ ចាន់រ៉ា