ក្រសួងកំពុងស្រាវជ្រាវករណីចម្រៀង AI ខ្លឹមសារអាសអាភាស ខណៈសាធារណជនស្នើឱ្យមានចំណាត់ការបន្ទាន់

លោក នេត្រ ភក្ត្រា រដ្ឋមន្ត្រីក្រសួងព័ត៌មាន តាមរយៈសារពីទំព័រហ្វេសប៊ុក នៅយប់ថ្ងៃទី១៤ ខែមីនា ឆ្នាំ២០២៦ បានឱ្យដឹងថា ក្រសួងពាក់ព័ន្ធ និងស្ថាប័នមានសមត្ថកិច្ច បាននិងកំពុងស្រាវជ្រាវដើម្បីចាត់វិធានការលើករណីគណនីបណ្តាញទំនាក់ទំនងសង្គមមួយឈ្មោះ BLUE PRINT បានបង្ហោះបទចម្រៀងបង្កើតដោយ AI មានខ្លឹមសារអាសអាភាស និងត្រូវបានចែករំលែកលើបណ្តាញសង្គមព្រោងព្រាត។

ជុំវិញប្រតិកម្មនេះ សាធារណជនបានបង្ហាញការគាំទ្រយ៉ាងពេញទំហឹង និងស្នើឱ្យមានចំណាត់ការបន្ទាន់ផងដែរលើរឿងនេះ ព្រោះបារម្ភពីការធ្លាក់ចុះសីលធម៌ក្នុងសង្គមខ្មែរ។

យោងតាមរដ្ឋមន្ត្រីក្រសួងព័ត៌មាន បញ្ជាក់ថា តាមការស្រាវជ្រាវបឋម បទចម្រៀងនេះមានសង្ស័យថាបង្កើតឡើងដោយបញ្ញាសិប្បនិម្មិត (AI) ដែលអាចបង្កើតបទចម្រៀងថ្មីៗក្នុងរយៈពេលខ្លី ប៉ុន្តែខ្លឹមសារមានលក្ខណៈអាសអាភាស និងមិនសមរម្យ។

ហេតុនេះ លោកអំពាវនាវឱ្យសាធារណជនកុំចែករំលែកបទចម្រៀងនេះ និងចូលរួមទប់ស្កាត់ការចែករំលែកខ្លឹមសារដេលប្រាសចាកក្របសីលធម៌ និងមានលក្ខណៈចំអេះចំអាស អាសអាភាស និងថ្លែងអំណរគុណចំពោះកិច្ចសហការរបស់សាធារណជន ក៏ដូចជាអំពាវនាវឱ្យប្រើប្រាស់បណ្តាញសង្គមដោយមានការពិចារណា និងច្បាប់ប្រកបដោយទំនួលខុសត្រូវ។

គួរឱ្យដឹងដែរថា blueprint_officail ជាគណនីបណ្តាញសង្គម Tik Tok របស់យុវជនម្នាក់ ដែលនិយមតុបតែងខ្លួនស្រស់ស្អាតសុិចសុី ច្រៀងរាំត្រាប់ style ចម្រៀងលើបណ្តាញសង្គម ខណៈបទចម្រៀងដែលមានខ្លឹមសារមិនសមរម្យនោះ ក៏មានប្រភពចេញពីគណនីយុវជនរូបនោះផងដែរ។ តែយ៉ាងណា គិតព្រឹកថ្ងៃទី១៥ ខែមីនានេះ បទចម្រៀងចំណងជើង “Smell Bad” ដែលមានខ្លឹមសារអាសអាភាសនោះ បានបាត់ពីវេទិកាផ្សព្វផ្សាយលើបណ្តាញសង្គមទៅហើយ៕