ខ្ញុង ប្រកាសបរិច្ចាគ ថវិកាទទួលបានពីសប្បុរសជន ៥០ភាគរយ ជួយមន្ទីពេទ្យគន្ធបុប្ផា និងចាស់ជរា

បន្ទាប់ពីមានការរិះគន់ថា ជាការសម្តែង និងរៀបចំគម្រោងបោកប្រាស់មហាជន រឿងជំពាក់បំណុលគេជាងកន្លះលានដុល្លារនោះ តារាកំប្លែងអ្នកនាង ខ្ញុង នៅព្រឹកថ្ងៃទី២០ ខែតុលា ឆ្នាំ២០២១នេះ បានចេញមុខបកស្រាយ និងបញ្ជាក់ការពិត តាមរយៈសន្និសីទសារព័ត៌មានជាថ្មី នៅផ្ទះរបស់នាងផ្ទាល់។

តាមរយៈការបកស្រាយនោះអ្នកនាង ខ្ញុង បានបញ្ជាក់ថា អ្វីដែលខ្លួនទម្លាយរឿងជំពាក់លុយគេ ជាងកន្លះលាននោះមិន មែនជាការសម្តែង ឬបោកប្រាស់មហាជនទេ នាងហ៊ានស្បត់។ ជាមួយគ្នានេះ ខ្ញុង ក៏បានបង្ហាញចំនួនទឹកប្រាក់ដែលទទួលបានពីសប្បុរសជន តាមរយៈ Account ABA ដែលគិតត្រឹមព្រឹកថ្ងៃទី២០ ខែតុលានេះ ផងដែរ។

អ្នកនាង ខ្ញុង បានបញ្ជាក់ថា ទឹកប្រាក់ដែលទទួលបានពីសប្បុរសជន គឺមានចំនួន ៥៦៥ ៣៣.៣៧ ដុល្លារអាមេរិក ខណ:ដែលលុយនេះ គឺជាការជួយពីសប្បុរសជនទាំងអស់។ បន្ថែមពីនេះអ្នកនាង ខ្ញុង ក៏បានប្រកាសជាសាធារណៈថា ទឹកប្រាក់ដែលនាងទទួលបានទាំងប៉ុន្មាន ពីសប្បុរសជននោះ គឺបរិច្ចាគចំនួន ៥០ភាគរយ ជួយដល់មន្ទីពេទ្យគន្ធបុប្ផា និងចាស់ជរា។ ចំណែក ៥០ភាគរយទៀត ទុកដើម្បីដោះបំណុលគេ និងធ្វើដើមទុក រកស៊ីបន្តទៀត៕ ចាន់រ៉ា