កញ្ញា ពេជ្រ ចរណៃ ផលិតរឿងខ្នាតខ្លី លើកស្ទួយវិស័យសិល្បៈ និងក្បាច់គុនបុរាណខ្មែរ

ភ្នំពេញ៖ តារាសម្តែង និងជាគ្រូបង្ហាត់ គុនល្បុក្កតោ គឺកញ្ញា ពេជ្រ ចរណៃ ជារឿងៗក្រៅ តែពីការលេចមុខនៅ លើវិស័យភាពយន្តខ្មែរ នាងក៏ជាតារាស្រីមួយរូបដែលចូលរួមយ៉ាងសកម្មក្នុងការលើកស្ទួយវិស័យគុនល្បុក្កតោ។ ថ្មីៗនេះ ពេជ្រ ចរណៃ បញ្ចេញស្នាដៃផលិតរឿងខ្នាតខ្លីមួយរឿង ដើម្បីលើកស្ទួយវិស័យសិល្បៈ និងក្បាច់គុនបុរាណខ្មែរ។

រឿងខ្លីដែលត្រូវបានផលិតឡើងនេះ មានចំណងជើងថា “ល្បុក្កតោ” គឺជាសាច់រឿងមួយដែលបំផុសបង្ហាញពីឈ្មោះ និង ក្បាច់ស្នៀតល្បុក្កតោដែលជាក្បាច់គុនបុរាណខ្មែរ និងការតស៊ូព្យាយាមលះបង់របស់តួរអង្គទាំងបី ដើម្បីថែរក្សាវត្ថុបុរាណ។ នេះបើតាមការបញ្ជាក់ពីកញ្ញា ពេជ្រ ចរណៃ ថ្លែងប្រាប់ “កម្ពុជាថ្មី”។

តារាសម្តែងកញ្ញា ពេជ្រ ចរណៃ ក៏បានបំផុសដល់យុវជនឱ្យចូលរួមលើកស្ទួយ និងបង្ហាញសិល្បៈវប្បធម៌របស់ខ្មែរទៅកាន់ពិភពលោក តាមរយ:សកម្មភាពនានាដូចជា ការបង្ហាញក្បាច់គុនល្បុក្កតោ ល្ខោនខោល និងបង្ហោះរូបភាពស្លៀកពាក់សំលៀកបំពាក់បុរាណខ្មែរជាដើម៕

អត្ថបទ៖ ចាន់រ៉ា