ពីអ្នកបញ្ចូលបទចម្រៀង G-Devith ក្លាយជាតារាចម្រៀងរ៉េបជួរមុខ និងមានអាជីវកម្មធំៗពេញដៃ

ពីអ្នកបញ្ចូលចម្រៀងពីរបទ ៥០០ រយ ម្ចាស់បទ “រាំញីកែងជើង” ជីដេវីត ក្លាយខ្លួនជាតារាចម្រៀងរ៉េប ជាពិសេសនោះក្ដោបកាប់មុខជំនួញធំៗកាន់ពេញដៃ។

ជាង ១០ ឆ្នាំ នៅលើវិស័យសិល្បៈតែ ជីដេវីត បានកសាងគេឈ្មោះស្ទើរមិនគួរឲ្យជឿ ចំពោះយុវវ័យដែលចូលចិត្តចម្រៀងបែបរ៉េប កន្ត្រក់អារម្មណ៍ ជាពិសេសស្ទីលនៃការរ៉េបលឿនរបស់លោក និងការលេងខ្លួនប្លែកៗទាក់ទាញចំណាប់អារម្មណ៍។ ពីអ្នកបញ្ចូលបទចម្រៀង ជីដេវីត បាន​វិវត្តខ្លួនមកក្លាយជាអ្នកចម្រៀងរ៉េប ដែលមានអ្នកគាំទ្រភាគច្រើនស្គាល់លោកតាមរយៈបទ Live fast die young, ពាក្យបីម៉ាត់, Forever។

ជីដេវីត មានឈ្មោះដើមកំណើតថា ងួន ចាន់ជីដេវីត កើតនៅថ្ងៃទី ០៥ ខែតុលា ឆ្នាំ ១៩៩៤ នៅឯខេត្តបាត់ដំបង។ នៅឆ្នាំ ២០១៥-២០១៦ ជីដេវីត បានចាប់ដៃគូជាមួយតារាចម្រៀងស្រី ពេជ្រ សោភា នឹងបានធ្វើឲ្យទស្សនិកជនស្គាល់លោកតាមរយៈបទចម្រៀងល្បីៗជាច្រើន ជាពិសេសបទ “រាំញីកែងជើង” ដែលផ្ទុះការគាំទ្រអំឡុងពេលពិធីបុណ្យចូលឆ្នាំខ្មែរ។ ក្រោយជ្រកក្រោមផលិតកម្មរស្មីហង្សមាសអស់រយៈពេល ៦-៧ ឆ្នាំ លោកក៏សម្រេចចិត្តចាកចេញពីផលិតកម្មនៅឆ្នាំ ២០១៩ ទៅចាប់ផ្ដើមអាជីពផ្ទាល់ខ្លួនជាមួយនឹងជីវិតឯករាជ្យ។

ទោះបីមានភាព​រអាក់រអួលលើវិថីសិល្បៈបន្ដិចក៏ពិតមែន តែជីដេវីតមិនបានបោះបង់ចោលក្ដី​សុបិន និងការស្រលាញ់របស់ខ្លួននោះទេ លោកក៏បានបង្កើតផលិតកកម្មមួយផ្ទាល់ខ្លួនដែលមានឈ្មោះថា Dit Way Nation ហើយក៏មានតារាចម្រៀងជាច្រើនរូបបូករួមទាំងខ្លួនលោក និងកញ្ញា ទេព បូព្រឹក្ស។ លើសពីនេះទៅទៀត លោកក៏បានក្ដោបកាប់អាជីវកម្មជាច្រើននៅក្នុងដៃ ដែលទទួលបានការគាំទ្រជាច្រើនពីសំណាក់ហ្វេន និងទស្សនិកជនមានដូចជា ទឹកអប់ម៉ាក Dit way និងហាងលក់ខោអាវ Dit Way ជាមួយនឹងអាវម៉ាក Atomax និងជាសហការដៃគូចែកចាយនាឡិកា Varman ព្រមទាំងជា BA ផងដែរ។ ទន្ទឹមនឹងនេះ លោកក៏បានធ្វើការប្រគំតន្ដ្រី “G-Devith Reborn” ស្របពេលការចេញ First Album ចម្រៀង Reborn ជាមួយ Pleng កាលពីឆ្នាំ ២០១៩៕

អត្ថបទ​៖ ផានិត