អ្នកគាំទ្រ Britney Spears នាំគ្នាប្ដឹងប៉ូលិសដោយសារនាងលុបគណនី Instagram

កំពូលតារាចម្រៀងលំដាប់ពិភពលោក Britney Spears រៀបរាប់ថា មានប៉ូលិសទូរស័ព្ទមកផ្ទះរបស់នាងក្នុងទីក្រុង Thousand Oaks រដ្ឋកាលីហ្វ័រញ៉ា កាលពីថ្ងៃពុធ ទី២៥ ខែមករា បន្ទាប់ពីនាងបានលុបគណនី Instagram ជាលើកទី ៧ ក្នុងរយៈពេលមិនដល់មួយឆ្នាំផង ។

ប៉ុន្មានឆ្នាំក្រោយមកនេះ អ្នកគាំទ្រតែងមានមន្ទិលសង្ស័យពីសុខទុក្ខរបស់ Britney អ្នកខ្លះគិតថានាងត្រូវគេធ្វើបាប និងគៀបសង្កត់ទើបនាងមានអាកប្បកិរិយាប្លែកៗរហូតមក ។ ជាពិសេសការស្លៀកពាក់ និងទឹកមុខរបស់ Britney មើលទៅដូចជាមិនប្រក្រតីដូចមុនសោះ ដូច្នេះហើយការលុបគណនីរបស់នាងបង្កការភ្ញាក់ផ្អើលជាខ្លាំងដល់សំណាក់អ្នកគាំទ្រ ។ 

លើសពីនេះទៀតមានមតិមួយចំនួននិយាយថា Britney កំពុងស្ថិតនៅក្នុងគ្រោះថ្នាក់ សូម្បីតែមនុស្សដែលមហាជនឃើញរាល់ដងក៏មានការសង្ស័យថាជាមនុស្សជំនួសដែរ។ លោកប៉ូលិសដែលពាក់ព័ន្ធនឹងរឿងខាងលើមានប្រសាសន៍ថា “មិនមានហេតុផលណាមួយ ដើម្បីជឿថានាង កំពុងមានគ្រោះថ្នាក់ទេ ប៉ុន្តែប៉ូលិសមិនប្រាកដថាអ្នកលើកទូរស័ព្ទជា Britney ឡើយ” ។

ជាក់ស្ដែងសុខភាពផ្លូវចិត្ត Britney កំពុងដុនដាបគួរឲ្យកត់សម្គាល់ ដល់ថ្នាក់ប៉ះពាល់ទំនាក់ទំនងជាមួយកូនប្រុសបង្កើតរបស់ខ្លួនទៀតផងគឺ Jayden និង ​Sean ដែលបច្ចុប្បន្នពួកគេទាំងពីរនាក់រស់នៅជាមួយឪពុកវ័យ ៤៤ ឆ្នាំលោក Kevin Federline អតីតស្វាមី Britney Spears ៕

ប្រែសម្រួលដោយ ៖ វារី

ចុចអាន ៖ Brooke Shields ទម្លាយរឿងត្រូវគេរំលោភ បន្ទាប់ពីលាក់អស់រយៈពេលជាង ៣ ទសវត្សរ៍