Gigi Hadid ទម្លាយរឿង ត្រូវប៉ូលិសចាប់នៅកោះកៃម៉ាន

Gigi Hadid ត្រូវប៉ូលិសចាប់ខ្លួនពីបទ “កាន់កាប់កញ្ឆា និងឧបករណ៍ប្រើប្រាស់គ្រឿងញៀន” បន្ទាប់ពីនាងហោះទៅកោះកៃម៉ានក្នុងដែនដីចក្រភពអង់គ្លេសកាលពីថ្ងៃទី១០ ខែកក្កដា ។

ខណៈកំពូលតារាម៉ូដែលវ័យ ២៨ ឆ្នាំរូបនេះមកដល់អាកាសយានដ្ឋានអន្តរជាតិ Owen Roberts ជាមួយមិត្តភ័ក្ដិឈ្មោះ Leah Nicole McCarthy ស្រាប់តែភ្នាក់ងារគយ និងអ្នកត្រួតពិនិត្យព្រំដែនបានរកឃើញកញ្ឆា ព្រមទាំងឧបករណ៍ប្រើប្រាស់កញ្ឆា នៅក្នុងវ៉ាលិសរបស់នាង ។

ពាក់ព័ន្ធនឹងបញ្ហានេះ អ្នកតំណាងរបស់ Gigi បានឲ្យដឹងថា កញ្ឆារបស់នាងគឺជាទំនិញស្របច្បាប់ដែលទិញនៅទីក្រុងញូវយ៉ក និងមានភ្ជាប់ជាមួយអាជ្ញាប័ណ្ណវេជ្ជសាស្ត្រត្រឹមត្រូវ ប៉ុន្តែក្រោយមក Gigi និង Leah ត្រូវគេចោទប្រកាន់ពីបទ “សង្ស័យនាំចូលកញ្ឆា និងឧបករណ៍ប្រើប្រាស់កញ្ឆា” ទៅវិញ ។

មិនបានប៉ុន្មាន អ្នកទាំងពីរត្រូវបានបញ្ជូនទៅមជ្ឈមណ្ឌលឃុំឃាំង Royal Cayman Islands ប៉ុន្តែក្រោយមកត្រូវបានដោះលែងឲ្យនៅក្រៅឃុំវិញ ដើម្បីរង់ចាំការកាត់ទោស ខណៈ Gigi និង Leah បានបង្ហាញខ្លួនក្នុងតុលាការកាលពីថ្ងៃទី១២ ខែកក្កដា និងត្រូវពិន័យជាប្រាក់ ១,០០០ ដុល្លារទៀតផង ។

ជាក់ស្ដែង កញ្ឆានៅកោះកៃម៉ានគឺខុសច្បាប់ ប៉ុន្តែមានការអនុញ្ញាតឲ្យប្រើប្រាស់ប្រេង CBD ក្នុងគោលបំណងវេជ្ជសាស្រ្តចាប់តាំងពីឆ្នាំ ២០១៦ មកម្ល៉េះ ។ មួយវិញទៀត កញ្ឆាក៏ស្របច្បាប់សម្រាប់ការប្រើប្រាស់វេជ្ជសាស្រ្តនៅក្នុង Grand Cayman ចាប់តាំងពីឆ្នាំ ២០១៧ ដែរ ៕

ប្រែសម្រួល៖ វារី

ប្រភព៖ dailymail

ចុចអាន៖ អ្នកផាត់មុខឲ្យតារាម៉ូដែលលំដាប់ពិភពលោក Gigi Hadid ទម្លាយក្លិនទឹកអប់ប្រចាំខ្លួនរបស់នាង