ជីវិតកម្សាន្ដ

ឃុំ ប៉ុណ្ណាដែត ស្នើកាត់បន្ថយការផ្សាយរឿងបំពុលសង្គម ចូលរួមលើកតម្លៃសិល្ប:ខ្មែរវិញ

បានផុស

៣ years មុន

នៅ

ថ្ងៃព្រហស្បតិ៍ ១០ សីហា ២០២៣

ដោយ

តារាចម្រៀងលោក ឃុំ ប៉ុណ្ណាដែត បានចេញមុខអំពាវនាវ និងស្នើដល់ស្ថាប័នពាក់ព័ន្ធ និងសារព័ត៌មាន ឱ្យចូលរួមក្នុងការជួយផ្សព្វផ្សាយលើកតម្លៃសិល្បៈខ្មែរ។ ការលើកឡើងរបស់តារារូបនេះ បន្ទាប់ពីសង្កេតឃើញមួយរយៈចុងក្រោយនេះមានសិល្បករ-សិល្បការិនីខ្មែរ មួយចំនួនរងការប្រមាថកិត្តិយសមិនផ្តល់តម្លៃពីសំណាក់បុគ្គលមួយចំនួនតូចតាមរយៈរូបភាពផ្សេងៗជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃុំ ប៉ុណ្ណាដែត បានបញ្ជាក់ថា “សូមឱ្យបងប្អូនប្រជាជនខ្មែរទាំងអស់ និងស្ថាប័នពាក់ព័ន្ធព្រមទាំងបងប្អូនសារព័ត៌មានទាំងអស់មេត្តាយកចិត្តទុកដាក់ផ្សព្វផ្សាយលើកតម្លៃសិល្បៈខ្មែរយើងផង ហើយអ្នកដែលចូលចិត្តបំពុលសង្គម សូមកាត់បន្ថយការផ្សព្វផ្សាយជៀសវាង ព្រោះជាគំរូអាក្រក់ដល់ក្មេងៗជំនាន់ក្រោយ ខ្ញុំសូមអភ័យទោសជាមុនបើមានការលើសលស់ ក៏គ្មានបំណងប៉ះពាល់បងប្អូនណាឡើយ”។

ទន្ទឹមគ្នានេះ តារាចម្រៀងលោក ឃុំ ប៉ុណ្ណាដែត បានលើកឡើងរឿងរ៉ាវជាក់ស្ដែងដែលធ្លាប់ជួបកន្លងម កថាពិតជាមានរឿងមិនចេះចប់សម្រាប់ការមើលងាយ ប្រមាថមកលើអ្នកសិល្បៈ ហើយតាមដែលលោកចាំមិនភ្លេចទេប៉ុន្មានឆ្នាំមុន មានតារាសិល្បៈដូចជា កញ្ញា ទេព បូព្រឹក ក៏ធ្លាប់បានគេគប់ទឹកកកដាក់, ថ្មីៗនេះ លោក ជី ដេវី ក៏ត្រូវគេគប់ទឹកកកដាក់ដែរ និង កញ្ញា ស៊ឹម ថៃណា ប៉ុន្មានថ្ងៃមុនក៏ត្រូវបានមនុស្សជេរបញ្ចោរក្នុងទីតាំងភោជនីយដ្ឋានមួយកន្លែង។

តារាចម្រៀង ឃុំ ប៉ុណ្ណាដែត ក៏រម្លឹកដែរថា លោកនិយាយនេះសូម្បីតែភរិយាលោកកាលច្រៀង នៅ Sparkក៏ធ្លាប់បានគេប៉ះពាល់មើលងាយដែរ។ លោកថា «ខ្ញុំចង់និយាយទៅកាន់មនុស្សប្រភេទនេះទោះបីជា ពួកយើងមិនមែនអ្នកសិល្បៈក៏ដោយ ក្នុងករណីធ្វើបែបនេះ គឺបំពានសិទ្ធិបុគ្គលហើយអ្នកអាចជាប់ទោសទណ្ឌតាមជាក់ស្តែង»៕

អត្ថបទ៖ ចាន់រ៉ា