តារាកំប្លែងអាមេរិក រកឃើញស្លាប់ ក្នុងអាងទឹកក្ដៅ

តារាសម្ដែង និងកំប្លែងអាមេរិកាំង Matthew Perry ដែលធ្លាប់ល្បីល្បាញកំលុងទសវត្សរ៍ឆ្នាំ ១៩៩០ បានទទួលមរណភាពកាលពីថ្ងៃសៅរ៍ ទី២៨ ខែតុលា ឆ្នាំ២០២៣ នៅក្នុងវ័យ ៥៤ឆ្នាំ ខណៈមូលហេតុនៃការស្លាប់នេះ ពុំទាន់បញ្ជាក់ច្បាស់នៅឡើយ។

ការស្លាប់របស់អតីតតារាកំប្លែងរូបនេះត្រូវបានបញ្ជាក់នៅក្នុងសេចក្តីថ្លែងការណ៍មួយដែលបង្ហោះដោយគេហទំព័រ NBC បានសរសេរថា “យើងមានការសោកស្ដាយយ៉ាងខ្លាំងចំពោះមរណភាពរបស់ Matthew Perry” ។ លោកបាននាំមកនូវសំណើច និងសេចក្តីរីករាយយ៉ាងខ្លាំងដល់មនុស្សរាប់រយលាននាក់។ ស្នាដៃរបស់លោកនឹងបន្តរហូតដល់ជំនាន់ជាច្រើនរាប់មិនអស់។

ដោយឡែក កាសែត Los Angeles Times និង TMZ.com បានដកស្រង់ប្រភពពីអ្នកច្បាប់ដែលមិនបញ្ចេញឈ្មោះម្នាក់ថា តារាសម្ដែងជនជាតិអាមេរិក-កាណាដាត្រូវបានគេប្រទះឃើញស្លាប់នៅក្នុងអាងទឹកក្តៅ។ ងាកមកវិញ NBC News វិញបានឱ្យដឹងថា លោក Matthew Perry ប្រទះឃើញស្លាប់ដោយសារលង់ទឹកនៅផ្ទះរបស់គាត់ក្នុងរដ្ឋ Los Angeles ។

ចំពោះរបាយការណ៍នៃសារព័ត៌មានខាងលើ គេមិនទាន់អាចទទួលយកជាផ្លូវការនៅឡើយទេ ត្បិតមានចំណុចសង្ស័យមួយចំនួន ខណៈក្រុមប៉ូលិសកំពុងស៊ើបអង្កេតបន្ថែមទៀត៕

ប្រែសម្រួល៖ សន្យា

ចុចអាន៖ Taylor Swift ឈ្នះពានដល់ទៅ ២០ ក្នុងកម្មវិធី Billboard Music Awards ឆ្នាំ ២០២៣