ជីវិតកម្សាន្ដ

បន្លាយមកជិត៣ឆ្នាំ Kang Daniel ឈ្នះបណ្តឹងពីប្រតិបត្តិករម្នាក់ ដែលធ្លាប់បរិហារកេរ្តិ៍លោក

បានផុស

៤ ខែ មុន

នៅ

ថ្ងៃព្រហស្បតិ៍ ២៨ វិច្ឆិកា ២០២៤

ដោយ

នៅថ្ងៃទី ២៧ ខែវិច្ឆិកា ចៅក្រម Lee Kun Hee នៃផ្នែករដ្ឋប្បវេណីទី ២៩ នៃតុលាការក្រុង Seoul Central District បានកាត់ក្តីឲ្យ Kang Daniel ក្នុងបណ្តឹងរបស់គាត់ប្រឆាំងនឹងប្រតិបត្តិករនៃប៉ុស្តិ៍ YouTube ឈ្មោះថា Taldeoksuyongso ដែលត្រូវបានកំណត់ថាជាលោក A។ តុលាការបានបញ្ជាឲ្យលោក A បង់ប្រាក់ចំនួន ៣០ លានវ៉ុន (ប្រហែល ២២,៥០០ ដុល្លារ) ជាការខូចខាតដល់តារាចម្រៀងប្រុសវ័យ២៧ឆ្នាំ។

នៅឆ្នាំ ២០២២ លោក A បានបង្ហោះវីដេអូមួយដែលមានចំណងជើងថា ជីវិតឯកជនដ៏រំខានរបស់មិត្តប្រុសជាតារាសម្តែង Idol ដែលមានព័ត៌មានមិនពិតយ៉ាងច្រើន។ យ៉ាងណា លោក A ត្រូវបានពិន័យជាប្រាក់ចំនួន ១០ លានវ៉ុន (ប្រហែល ៧,៥០០ ដុល្លារ) នៅក្នុងខែកញ្ញា ពីបទរំលោភលើច្បាប់ស្តីពីការលើកកម្ពស់ការប្រើប្រាស់បណ្តាញទំនាក់ទំនង និងការការពារព័ត៌មាន។

កាន់តែភ្ញាក់ផ្អើលបំផុត ជនសង្ស័យឈ្មោះ A ក៏បានជាប់ពាក់ព័ន្ធនឹងបណ្តឹងមួយទៀតសម្រាប់ការខូចខាតដែលប្តឹងដោយ Jang Won Young នៃក្រុម I.V.E. នៅក្នុងការកាត់ក្តីលើកដំបូង តុលាការបានបង្គាប់ឲ្យលោក A បង់ប្រាក់ចំនួន១០០ លានវ៉ុន (ប្រហែល ៧៥,០០០ ដុល្លារ) បូកនឹងការប្រាក់យឺតយ៉ាវដល់ Jang Won Young កាលពីខែធ្នូឆ្នាំមុន។ ដោយមិនពេញចិត្តនឹងការសម្រេចនេះ ភាគីរបស់លោក A បានប្តឹងឧទ្ធរណ៍លើការសម្រេចនេះ ប៉ុន្តែការសម្រុះសម្រួលក្នុងអំឡុងពេលដំណើរការបណ្តឹងឧទ្ធរណ៍ មិនអាចសម្រេចបានការព្រមព្រៀងណាមួយទេ។ ចំណែកសវនាការលើបណ្តឹងឧទ្ធរណ៍ក៏កំពុងបន្តដែរ។

បន្ថែមពីលើនេះ តុលាការស្រុក Incheon កំពុងបើកសវនាការដំបូងលើការចោទប្រកាន់ពីបទបរិហារកេរ្តិ៍ក្រោមច្បាប់បណ្តាញព័ត៌មាន និងទំនាក់ទំនង។ ព្រះរាជអាជ្ញាបានស្នើសុំការផ្តន្ទាទោសដាក់ពន្ធនាគាររយៈពេល ៤ ឆ្នាំ និងពិន័យជាប្រាក់ចំនួន ២០០ លានវ៉ុន (ប្រហែល ១៥០,០០០ ដុល្លារអាមេរិក) សម្រាប់លោក Aផងដែរ៕