ជុំ លីណូ ត្រូវអ្នកគាំទ្រសរសើរថា ខ្ចីចាស់កាន់តែហិរ អាចមានសមត្ថភាពច្រៀងបានច្រើនបែបច្រើនទម្រង់

គិតមកដល់ពេលនេះ អាជីពសិល្ប:តារាចម្រៀងលោក ជុំ លីណូ បានចាប់ប្រឡូកក្នុងវិថីមួយនេះមានរយ:ពេលប្រមាណជាង ២០ឆ្នាំហើយ ខណ:ដែលតារាប្រុសរូបនេះក៏បានផ្លាស់ប្តូរទ្រនំច្រៀងច្រើនផលិតកម្មដែរ។

ទោះបីជាយ៉ាងណា លោក ជុំ លីណូ ត្រូវបានអ្នកនិយមតាមដានវិស័យសិល្ប: និងអ្នកគាំទ្រកត់សម្គាល់ថា សម្រាប់អាជីពសិល្ប:របស់លោកបច្ចុប្បន្ន នៅតែរក្សាបានការគាំទ្រនិងមានប្រជាប្រិយភាពដូចដើម។ លើសពីនេះ លោក ជុំ លីណូ ទទួលការសរសើរថា លោកនៅតែមានសមត្ថភាពច្រៀងបានច្រើនបែបច្រើនទម្រង់ ពិសេសមានកម្រិតវប្បធម៌ខ្ពស់។

ជាក់ស្តែងម្ចាស់គណីហ្វេសប៊ុកឈ្មោះ Na Ny បាននិយាយដូចគ្នាដែរថា “តារាចម្រៀងប្រុសប្រចាំប្រទេសកម្ពុជា លោក ជុំ លីណូ គាត់ច្រៀងបានគ្រប់ទម្រង់ មិនថាញាក់កន្ទ្រឹម រដឺន សម័យ មនោសញ្ចេតនា មានទាំងក្បាច់រាំប្លែកៗសឹងតែពហុជំនាញទៅហើយខាងផ្នែកសិល្ប:ជិត២០ឆ្នាំ ហើយគាត់ស័ក្តិសមជាតារាចម្រៀងប្រចាំផលិតកម្មខ្នាតយក្សពិតមែន“។

ម្ចាស់គណនីដដែលបានបន្តថា “បងប្អូនដែលរិះគន់គាត់ ឬជាន់ពន្លិច សូមសិក្សាឱ្យបានច្បាស់ មិនមែនមានតែបទបែបសុិចសុី រ៉េបទេ គាត់ថែមទាំងមានសមត្ថភាពនិពន្ធបទចម្រៀងខ្លួនឯងទៀតផង គាត់ក៏បានបញ្ចប់ការសិក្សាថ្នាក់បរិញ្ញាបត្របានសញ្ញាបត្រផងដែរ សូមបញ្ជាក់ : បទបែបញាក់កន្ត្រាក់បំពេរអារម្មណ៍ មិនមែនស្លៀកហូលផាមួងសម្តែងទេ“។

មិនខុសគ្នាប៉ុន្មានទេអ្នកលេងបណ្តាញសង្គមហ្វេសប៊ុកម្នាក់ទៀតឈ្មោះ Chan Chhean បានលើកឡើងថា តារាចម្រៀង ជុំ លីណូ នៅតែមានសមត្ថភាពច្រៀងបានច្រើនបែបច្រើនទម្រង់ កាយវិការរស់រវើក ជាពិសេសគាត់មានកម្រិតវប្បធម៌ខ្ពស់ស័ក្តិសមជាតារាប្រចាំផលិតកម្មយក្សពិតមែន idol ។

លោក ជុំ លីណូ ទទួលបានការសរសើរមិនដាច់ពីមាត់ពីសំណាក់អ្នកគាំទ្រនេះ គឺស្របពេលដែលបច្ចុប្បន្នលោកបានហក់ចូលផលិតកម្មយក្សមួយ ដែលមានបទចម្រៀងចេញបម្រើអារម្មណ៍អ្នកគាំទ្រជាបន្តបន្ទាប់។ មិនតែប៉ុណ្ណោះថ្មីៗនេះលោកជុំ លីណូបានបញ្ចេញ ស្នាដៃបទថ្មីៗជាបន្តបន្ទាប់ទទួលបានការគាំទ្រភ្លូកទឹកភ្លូកដីពីមហាជនគ្រប់មជ្ឈដ្ឋាន៕ អត្ថបទ៖ ចាន់រ៉ា