Rosé បង្ហាញខ្លួនក្នុងបទចម្រៀងភាពយន្ត «F1» ជាមួយតារាហូលីវូដ Brad Pitt

Rosé សមាជិកក្រុម BlackPink ក្លាយជាសិល្បករកូរ៉េមួយរូបដែលបានបង្ហាញវត្តមានក្នុងបទចម្រៀងមួយក្រោមចំណងជើងថា «Messy» ស្ថិតក្នុងអាល់ប៊ុម F1: The Album និងជាគម្រោងតន្ត្រីនៃខ្សែភាពយន្តហូលីវូដ សម្ដែងដោយតារាប្រុសលោក Brad Pitt។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បទចម្រៀងមួយនេះបានចេញផ្សាយកាលពី​ល្ងាច​ថ្ងៃ​ទី ៨ខែ​ឧសភា តាមរយៈបទចម្រៀងក្នុង MV ភាពយន្ត តារាចម្រៀងកូរ៉េ បានបង្ហាញនូវសកម្មភាពដើរកាត់ទេសភាពទីក្រុងបាពេលយប់ ដោយឆ្លងកាត់ហ្វូងមនុស្ស ហើយឈរស្ងៀមនៅលើយ៉រនៃអគារខ្ពស់មួយ។ សកម្មភាពទាំងនោះ គឺជាឈុតឆាកនៅក្នុងខ្សែភាពយន្តប្រណាំង «F1» ដែលមានលោក Brad Pitt ជាតួឯកប្រុស។

«Messy» គឺជាបទចម្រៀងមួយក្នុងចំណោមបទចម្រៀងជាច្រើន ដែលរួមបញ្ចូលក្នុងអាល់ប៊ុមចម្រៀង F1 និងបានប្រកាសដោយសាជីវកម្ម Atlantic Records កាលពីថ្ងៃទី ០១ ខែឧសភា។ ក្រៅពីសមាជិក BlackPink គម្រោងនេះក៏ប្រមូលផ្តុំសិល្បករល្បីៗដូចជា Ed Sheeran, Tate McRae, RAYE, Burna Boy, Roddy Ricch, Dom Dolla, Chris Stapleton, Tiësto, Sexyy Red និង Mykes Towers។ កាលពីមុនតារារ៉េប Don Toliver និងតារាចម្រៀង Doja Cat បានចេញបទចម្រៀង «Lose My Mind» សម្រាប់គម្រោងនេះ នៅចុងខែមេសា។

ខ្សែភាពយន្តនេះដឹកនាំដោយលោក Joseph Kosinski និងសម្តែងដោយ Brad Pitt, Javier Bardem និង Damson Idris ចូលរោងកុន នៅថ្ងៃទី ២៧ ខែមិថុនា ស្របពេលជាមួយនឹងការចេញអាល់ប៊ុមបទចម្រៀងជាបណ្ដើរៗ។

ចែករំលែកអំពីការចូលរួមក្នុងគម្រោងភាពយន្តលើកដំបូង Rosé បានបង្ហោះរូប F1: The Album នៅលើ Instagram ផ្ទាល់ខ្លួនរបស់នាង ដោយបង្ហាញពីក្តីរំភើបរបស់នាងថា «ខ្ញុំពិតជារំភើបណាស់ដែលគ្រប់គ្នាបានស្តាប់បទភ្លេងភាពយន្តដំបូងរបស់ខ្ញុំ រឿងនេះនឹងផ្ទុះកក្រើជាក់ជាមិនខានឡើយ»។

ជាមួយនឹងបទ «Messy» ជាការកត់សម្គាល់ធំបំផុត​ ពោលគឺការវិលត្រលប់មកវិញលើកដំបូងរបស់ Rosé ចាប់តាំងពីអាល់ប៊ុមទោល «Rosie» បានចេញផ្សាយក្នុងខែធ្នូ បាននិងឡើងដល់កំពូលលេខ ៣ នៅលើ Billboard 200។ អាល់ប៊ុមនេះមានបទចម្រៀងល្បី APT ច្រៀងរួមជាមួយ Bruno Mars ហើយក៏កាន់កាប់តំណែងកំពូលនៅលើ Billboard Global 200 អស់រយៈពេល ១២ សប្តាហ៍ជាប់ៗគ្នាដែរ។

លើសពីនេះដែរ តារាស្រីវ័យ២៨ឆ្នាំ ក៏កំពុងរៀបចំការជួបជុំជាមួយសមាជិក BlackPink បន្ទាប់ពីដំណើរទេសចរណ៍ Born Pink បញ្ចប់នៅឆ្នាំ ២០២៣។ ក្នុងខែកុម្ភៈ ម្ចាស់បទ APT បានបង្ហើបថា ក្រុមកំពុងរៀបចំផលិតផលថ្មី ស្របគ្នានឹងការប្រកាសថា Black Pink នឹងចាប់ផ្តើមដំណើរទេសចរណ៍ពិភពលោកនៅរដូវក្តៅនេះ។ ទន្ទឹមគ្នាដែរ សមាជិកបីនាក់រួមមាន Rosé, Jennie និង Lisa ទើបតែបង្ហាញខ្លួននៅក្នុងកម្មវិធីលំដាប់អន្តរជាតិ Met Gala 2025 ក្នុងទីក្រុង New York កាលពីល្ងាចថ្ងៃទី ០៥ ខែឧសភា៕

អត្ថបទ៖ សាង ស្រីល័ក្ខ

ចុចអាន៖ក្រុមហ៊ុន​​​​​ផលិត​កម្ម​ YG រកប្រាក់ចំណេញ​ភ្លាម ដោយគ្រាន់​តែដូរក្បាល​ម៉ាស៊ីនដឹកនាំ​