ជីវិតកម្សាន្ដ

Zhao Lusi ចោទប្រកាន់ភ្នាក់ងារ ពីការគាបសង្កត់ និងធ្វើបាបដល់អាជីពរបស់នាង

បានផុស

១២ ខែ មុន

នៅ

ថ្ងៃអង្គារ ៥ សីហា ២០២៥

ដោយ

យោងតាម Sina នៅក្នុងការបង្ហោះប្រព័ន្ធផ្សព្វផ្សាយសង្គមកាលពីល្ងាចថ្ងៃសៅរ៍ Zhao Lusi បង្ហាញថា នាងបានប្រយុទ្ធនឹងជំងឺធ្លាក់ទឹកចិត្តតាំងពីឆ្នាំមុន ហើយបានចំណាយពេលជាងប្រាំមួយខែ ដើម្បីស្តារសុខភាពផ្លូវចិត្តឡើងវិញ។ ជាលទ្ធផល កិច្ចសន្យាផ្សាយពាណិជ្ជកម្មជាច្រើនត្រូវបានលុបចោល។ ទោះបីជាទីភ្នាក់ងារដំបូងបានសន្យាថានឹងរ៉ាប់រងការខាតបង់ផ្នែកហិរញ្ញវត្ថុក៏ដោយ តែតារាស្រីនិយាយថា នាងត្រូវបានគេបង្ខំឲ្យផ្តល់សំណងផ្ទាល់ខ្លួនច្រើនជាង ២ លានយន់ (២៧៧,៣២៣ដុល្លារអាមេរិក) ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តួចិនរូបនេះបានចោទប្រកាន់បន្ថែមទៀតថា ភ្នាក់ងារបានរារាំងឱកាសអាជីពរបស់នាង ដែលជំរុញឲ្យតារាស្រីចិនចង់បញ្ចប់កិច្ចសន្យារបស់នាង។ ទោះជាយ៉ាងណាក៏ដោយ កិច្ចព្រមព្រៀងនេះមានសុពលភាពរហូតដល់ឆ្នាំ ២០២៧។

មិនតែប៉ុណ្ណោះតារាចិនវ័យក្មេងបានសរសេរថា «ខ្ញុំស្ថិតក្នុងស្ថានភាពដ៏អាក្រក់មួយ ហើយខ្ញុំបានបាត់បង់សេចក្តីថ្លៃថ្នូរជាច្រើន ។ ប៉ុន្តែខ្ញុំមិនចាំបាច់ដាក់ក្នុងបញ្ជីខ្មៅទេ។ ខ្ញុំបានបញ្ចប់ (ជាមួយឧស្សាហកម្មនេះ)»។

ទោះបីជាយ៉ាងណាក៏ដោយ ជាការឆ្លើយតប Galaxy Cool Entertainment បាននិយាយកាលពីថ្ងៃអាទិត្យថា វា ភ្ញាក់ផ្អើលបំផុត ចំពោះការលើកឡើងរបស់តារាស្រីត្រកូល Zhao ។ ក្រុមហ៊ុនបាននិយាយថា ខ្លួនបានគោរពកាតព្វកិច្ចតាមកិច្ចសន្យារបស់ខ្លួន បដិសេធរាល់កំហុសឆ្គង ហើយបានអះអាងថា ខ្លួនបានធ្វើការយ៉ាងជិតស្និទ្ធជាមួយនាង និងអ្នកតំណាងៀផ្ទាល់ខ្លួន កំឡុងពេលនាងមានជំងឺ។ ទីភ្នាក់ងារបានអញ្ជើញនាងឲ្យដោះស្រាយជម្លោះតាមរយៈការចរចា។

ជាងនេះទៀត តារាស្រីវ័យ២៦ឆ្នាំក៏មិនបានចូលរួមក្នុងគម្រោងថតរឿងថ្មីទេ ចាប់តាំងពីខែធ្នូ ឆ្នាំ ២០២៤ នៅពេលដែលនាងសម្រាកនៅមន្ទីរពេទ្យកំឡុងពេលផលិតរឿងមួយ។ ទីបំផុតគម្រោងនេះត្រូវបានលុបចោល។

កាលពីដើមឆ្នាំនេះ Zhao បានលាតត្រដាងជាសាធារណៈថា ខ្លួនបានទទួលរងពីជំងឺធ្លាក់ទឹកចិត្ត។ នាងបានពិពណ៌នាអំពីការជួបប្រទះនឹងការយល់ឃើញយ៉ាងរស់រវើក រួមទាំងអារម្មណ៍នៃសត្វល្អិតវារលើស្បែករបស់នាង និងការឈឺចាប់ខ្លាំងខាងរាងកាយ។ នៅពេលមួយទម្ងន់របស់នាងបានធ្លាក់ចុះក្រោម ៣៨ គីឡូក្រាម។ ទោះបីជាមានការព្យាបាលតាមវេជ្ជសាស្រ្ដក៏ដោយ ក៏ស្ថានភាពរបស់នាងបានបង្ហាញពីភាពប្រសើរឡើងតិចតួចនៅពេលនោះ។

Zhao បាននិយាយថា ខ្លួនបានបន្តធ្វើការតាមរយៈជំងឺរបស់នាងដោយខ្លាចការរិះគន់ថាខ្ជិល ឬគ្មានវិជ្ជាជីវៈ ។ នាងបានរក្សាការតស៊ូរជាលក្ខណៈឯកជន ដើម្បីកុំឲ្យអ្នកគាំទ្រខកចិត្ត មិត្តភក្តិ និងក្រុមគ្រួសារ ដែលនៅទីបំផុតនាំឲ្យមានជំងឺវិកលចរិត ជាស្ថានភាពសុខភាពផ្លូវចិត្តដែលត្រូវបានសម្គាល់ដោយការផ្តាច់ចេញពីគំនិត អត្តសញ្ញាណ និងជុំវិញ។

បន្ទាប់ពីស្វែងរកការព្យាបាល និងនិយាយដោយបើកចំហអំពីស្ថានភាពរបស់នាង Zhao បាននិយាយថា នាងលែងចាត់ទុកជំងឺធ្លាក់ទឹកចិត្តជាអ្វីមួយដែលគួរឲ្យភ័យខ្លាចទៀតហើយ។ នៅក្នុងបទសម្ភាសន៍ខែមករាជាមួយ Global Times នាងបាននិយាយថាស្ថានភាពបានប្រសើរឡើងយ៉ាងខ្លាំងបន្ទាប់ពីផែនការស្តារឡើងវិញរយៈពេល ៤ ខែដែលមានរចនាសម្ព័ន្ធ។

គួរជម្រាបជូនដែរថា Zhao Lusi បានចាប់ផ្តើមអាជីពសម្ដែងដំបូងក្នុងឆ្នាំ ២០១៧ ហើយទទួលបានភាពល្បីល្បាញតាមរយៈតួឯកក្នុងរឿងភាគល្បីៗដូចជា «The Romance of Tiger and Rose» «Dating in the Kitchen» «Love Better Than Immortality» «Love Like the Galaxy»និង «Hidden Love» ជាដើម៕