ទូតកូរ៉េខាងត្បូងនៅថៃ ទាត់ចោលការចុះផ្សាយបំភ្លៃរបស់កាសែត Bangkok Post ពាក់ព័ន្ធបញ្ហាប្រឆាំងឧក្រិដ្ឋកម្មអនអាញ

ស្ថានទូតកូរ៉េខាងត្បូងប្រចាំទីក្រុងបាងកកនៅថ្ងៃទី១៥ តុលា ឆ្នាំ២០២៥ នេះ បានចេញមកទាត់ចោលនូវចុះផ្សាយរបស់កាសែតថៃ ប៉ាងកកប៉ុស្តិ៍ ដែលថា កូរ៉េខាងត្បូង អាចចាត់វិធានការយោធាប្រឆាំងឧក្រិដ្ឋកម្មអនអាញ ក្រោយហេតុការណ៍ស្លាប់និស្សិតកូរ៉េខាងត្បូងម្នាក់នៅខេត្តកំពត ប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសេចក្តីសេចក្តីថ្លែងការណ៍របស់ខ្លួន ស្ថានទូតកូរ៉េខាងត្បូងប្រចាំនៅទីក្រុងបាងកកអះអាងថា រដ្ឋាភិបាលកូរ៉ខាងត្បូងនឹងប្រឹងប្រែងដោះស្រាយបញ្ហានេះ តាមរយៈយន្តការទូត ពោល គឺទីក្រុងសេអ៊ូលមិនមានផែនការដាក់ពង្រាយកម្លាំងយោធារបស់ខ្លួនដើម្បីប្រយុទ្ធប្រឆាំងនឹងឧក្រិដ្ឋកម្មអនឡាញ ដូចការចុះផ្សាយរបស់កាសែតប៉ាងកកប៉ុស្តិ៍នោះឡើយ។

ពាក់ព័ន្ធនឹងហេតុការណ៍ស្លាប់និស្សិតកូរ៉េខាងត្បូងម្នាក់នៅខេត្តកំពត ក្រសួងមហាផ្ទៃកម្ពុជា បានអះអាងពីឆន្ទៈរបស់រាជរដ្ឋាភិបាលកម្ពុជា ក្នុងការបង្ការ ទប់ស្កាត់ និងបង្ក្រាបបទល្មើសឆ្លងដែនគ្រប់ប្រភេទ។ លោក ទូច សុខៈ អ្នកនាំពាក្យរងក្រសួងមហាផ្ទៃ បានអះអាងឱ្យដឹងថា ហេតុការណ៍ស្លាប់និស្សិតកូរ៉េខាងត្បូងម្នាក់នៅខេត្តកំពត ក្រសួងមហាផ្ទៃនឹងអញ្ជើញតំណាងស្ថានទូតកូរ៉េត្បូង ដើម្បីមកស្តាប់ការពន្យល់ និងបង្ហាញបច្ចុប្បន្នភាពបន្ថែមពីលើឯកសារផ្លូវការ។

បើតាមលទ្ធផលនៃប្រតិបត្តិការស៊ើបអង្កេតករណីឃាតកម្មលើនិស្សិតកូរ៉េខាងត្បូង អាយុ២២ឆ្នាំ បង្ហាញថា ជនរងគ្រោះស្លាប់ដោយសារគាំងបេះដូងបណ្តាលមកពីការធ្វើទារុណកម្ម ខណៈសមត្ថកិច្ចកម្ពុជា មិនបានទទួលបណ្តឹងពីសាច់ញាតិ ឬស្ថានទូតកូរ៉េឡើយ។ ក្នុងប្រតិបត្តិការនេះ សមត្ថកិច្ចកម្ពុជាចាប់បានជនសង្ស័យជាជនជាតិចិនចំនួន៣នាក់ និងបន្តតាមចាប់ខ្លួនបក្ខពួក២នាក់ទៀតយកមកអនុវត្តច្បាប់។ ជាមួយគ្នានេះ ក្រសួងមហាផ្ទៃ ក៏នឹងពន្លាតការស៊ើបអង្កេតរកប្រភពកើតបទល្មើសដំបូង រួមទាំងអ្នកពាក់ព័ន្ធផ្សេងទៀតផងដែរ៕