អានុទីន បញ្ជាក់ពីកិច្ចសន្ទនាតាមទូរស័ព្ទជាមួយលោក ត្រាំនិងអាន់វ៉ា នៅម៉ោង ៩ យប់នេះ 

នាយករដ្ឋមន្ត្រីថៃ អានុទីន ឆានវីរៈគុល បានបញ្ជាក់នៅថ្ងៃសុក្រទី១២ខែធ្នូឆ្នាំ២០២៥ថា ម៉ោង៩ឬយ៉ាងយូរ៩:២០​នាទី​យប់​នេះ លោកនឹងជួបពិភាក្សាតាមទូរស័ព្ទជាមួយប្រធានាធិបតីអាមេរិក ដូណាល់ ត្រាំ និងនាយករដ្ឋមន្ត្រីម៉ាឡេស៊ី ​អាន់វ៉ា ​អ៊ីប្រាហ៊ីម ដើម្បីនិយាយគ្នារឿងជម្លោះព្រំដែនកម្ពុជា-ថៃ ដែលកំពុងក្តៅគគុក។

ការអះអាងនេះកើតឡើង បន្ទាប់ពីស្តេចថៃ Maha Vajiralongkorn ចេញព្រះរាជក្រឹត្យអនុម័តការរំលាយសភា ហើយ​ត្រៀមរៀបចំការបោះឆ្នោតថ្មីក្នុងរយៈពេល៤៥ទៅ៦០ថ្ងៃ ខណៈ អានុទីន ត្រូវដឹកនាំរដ្ឋបាលបណ្តោះអាសន្នរហូតដល់រដ្ឋាភិបាលថ្មី ត្រូវបានបង្កើតឡើងនៅឆ្នាំ២០២៦។

សូមជម្រាបថា នេះគឺជាការរំលាយសភាលើកទី១៦ ចាប់តាំងពីការបញ្ចប់របបរាជាធិបតេយ្យផ្តាច់ការក្នុងឆ្នាំ​១៩៣២​មក។

ការរំលាយចំនួន២លើក រួមទាំងឆ្នាំ២០២៣ និង ២០២៥ ត្រូវគេមើលឃើញយ៉ាងច្បាស់ថា ជាយុទ្ធសាស្ត្រមានគោល​បំណង​ធានា​អត្ថប្រយោជន៍បោះឆ្នោត ឬកំណត់នយោបាយសម្ព័ន្ធភាពឡើងវិញ។

យ៉ាងណា ការរំលាយចុងក្រោយបំផុតនេះ បានគូសបញ្ជាក់ពីប្រវត្តិដ៏យូរអង្វែងនៃភាពងាយបង្កជាអស្ថិរភាពនយោបាយរបស់ប្រទេសថៃ។ ក្នុងរយៈពេល៩ទសវត្សរ៍កន្លងមក សភាត្រូវបានរំលាយដោយសារហេតុផលផ្សេងៗ រាប់​ចាប់តាំង​ពីការបរាជ័យរបស់រដ្ឋាភិបាលក្នុងចលនាសំខាន់ៗ រហូតដល់បាតុកម្មទ្រង់ទ្រាយធំ វិវាទរដ្ឋធម្មនុញ្ញ និងយុទ្ធសាស្ត្រនយោបាយ៕

អត្ថបទ៖ សុខ សុវណ្ណ