កិច្ចប្រជុំពិសេសនៃរដ្ឋមន្ត្រីការបរទេសអាស៊ាន ស្តីពីជម្លោះព្រំដែនកម្ពុជា-ថៃ ត្រូវលើកពេល

នាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម បានបញ្ជាក់ថា កិច្ចប្រជុំពិសេសនៃរដ្ឋមន្ត្រីការបរទេសអាស៊ាន ស្តីពីជម្លោះព្រំដែនកម្ពុជា-ថៃ ដែលគ្រោងធ្វើឡើងនៅថ្ងៃអង្គារនេះ ឥឡូវត្រូវផ្អាកវិញហើយ ដោយត្រូវលើកទៅថ្ងៃទី២២ សប្តាហ៍ក្រោយវិញ។ នេះបើតាមការផ្សាយរបស់ Bernama។

ថ្លែងប្រាប់អ្នកសារព័ត៌មានបន្ទាប់ពីអញ្ជើញជាអធិបតីក្នុងពិធីសម្ពោធសៀវភៅមួយ នៅឯវិទ្យាស្ថានអន្តរជាតិនៃការសិក្សាឥស្លាមកម្រិតខ្ពស់ (IAIS) នៅប្រទេសម៉ាឡេស៊ី នាថ្ងៃចន្ទទី១៥ខែធ្នូឆ្នាំ២០២៥ លោកអាន់វ៉ា និយាយថា «ការពន្យារពេលនេះគឺធ្វើឡើងតាមសំណើរបស់ភាគីជម្លោះទាំងពីរ»។

លោកបន្តថា៖ «កម្ពុជា-ថៃ សុំលើកពេលបន្តិចសិន ដូច្នេះយើងក៏ពន្យារពេលទៅ ដើម្បីធានាថា គ្រប់យ៉ាងនឹងដំណើរការទៅបានដោយរលូន។ យ៉ាងណា យើងបន្តអំពាវនាវឲ្យប្រទេសទាំងពីរ ឈប់ប្រយុ​ទ្ធគ្នាព្រោះស្ថានការណ៍កាន់តែធ្ងន់ធ្ងរទៅហើយ ហើយខ្ញុំនៅតែទាក់ទងមេដឹកនាំទាំងពីរជាប្រចាំ»។ 

សូមជម្រាបថា ក្នុងនាមជាប្រធានអាស៊ានប្តូរវេនឆ្នាំ២០២៥ ម៉ាឡេស៊ី បានដើរតួនាទីយ៉ាងសំខាន់ ក្នុងការនាំឲ្យមានបទឈប់បាញ់កម្ពុជា-ថៃ កាលពីខែកក្កដា និងឈានដល់កិច្ចព្រមព្រៀងសន្តិភាពទីក្រុងគូឡាឡាំពួខែតុលា មានទាំងប្រធានាធិបតីអាមេរិក ដូណាល់ ត្រាំ ធ្វើជាសាក្សី ទៀតផង។

ទោះបែបនេះ ភាគីថៃបានរំលោភបទឈប់បាញ់ម្តងហើយម្តងទៀត និងដាក់ថ្នាក់ហែកចោលកិច្ចព្រមព្រៀងសន្តិភាពដោយគ្មានញញើត។

ថ្មីៗ ដ្បិតលោកត្រាំ ប្រកាសពីបទឈប់បាញ់ក៏ដោយ ប៉ុន្តែនាយករដ្ឋមន្ត្រីថៃ អានុទីន ឆានវីរៈគុល មិនខ្វ​ល់ឡើយ ហើយថែមទាំងបោះសម្តីយ៉ាងឈ្លើយទៅមេដឹកនាំប្រទេសមហាអំណាចផុតលេខ ទៀតផង។

អានុទីន បានបោះសម្តីយ៉ាងគឃ្លើនថា ប្រទេសថៃនឹងបន្តធ្វើប្រតិបត្តិការយោធា រហូតដល់មានអារម្មណ៍ថា លែងមានគ្រោះថ្នាក់និងការគំរាមកំហែងដល់ទឹកដី និងប្រជាជនរបស់ខ្លួនទៀត៕

អត្ថបទ៖ សុខ សុវណ្ណ