ចិន៖ ការធ្វើពាណិជ្ជកម្មអាវុធជាមួយកម្ពុជា និង​ថៃ មិនពាក់ព័ន្ធការប្រយុទ្ធគ្នាតាមព្រំដែនឡើយ

កាលពីថ្ងៃព្រហស្បតិ៍​ទី​១៨​ខែ​ធ្នូ​ឆ្នាំ​២០២៥ ប្រទេសចិនបានបញ្ជាក់ថា ការធ្វើពាណិជ្ជកម្មអាវុធរបស់ខ្លួនជាមួយប្រទេសកម្ពុជា និង​ប្រទេស​ថៃ​មិនមានការជាប់ពាក់ព័ន្ធនឹងការផ្ទុះអាវុធជាថ្មីនៅតាមតំបន់ព្រំដែននោះទេ ដោយបានទាត់ចោលនូវរបាយការណ៍ដែលថា អាវុធផលិតដោយចិនត្រូវបានរឹបអូសដោយកងទ័ពថៃ អំឡុងពេលមានការប៉ះទង្គិចគ្នានាពេលថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការពារជាតិចិនបានជំរុញ​ឲ្យ​ «ភាគីពាក់ព័ន្ធ» ផ្អាកការប៉ាន់ស្មាន ហើយបានលើកឡើងថា ទីក្រុងប៉េកាំងសង្ឃឹមថា ប្រទេសជិតខាងនៅអាស៊ីអាគ្នេយ៍ទាំងពីរ នឹងឈានដល់កិច្ចព្រមព្រៀងឈប់បាញ់​ឲ្យ​បានឆាប់តាមដែលអាចធ្វើទៅបាន ដោយបន្ថែមថា ប្រទេសចិននឹងបន្តជំរុញកិច្ចពិភាក្សាសន្តិភាព។

បើ​យោង​តាម​រ៉យទ័រ មនុស្សជាង ៤០នាក់ត្រូវបានសម្លាប់ និងជាងកន្លះលាននាក់ត្រូវបានផ្លាស់ទីលំនៅ ចាប់តាំងពីការប៉ះទង្គិចគ្នាតាមព្រំដែនបានចាប់ផ្តើមឡើងវិញនៅខែធ្នូ​នេះ រវាងកម្ពុជា-ថៃ។

លោក Wang Yi រដ្ឋមន្ត្រីការបរទេសចិន ក្នុងកិច្ចពិភាក្សាដាច់ដោយឡែកជាមួយសមភាគីកម្ពុជា និង​ថៃ បានអំពាវនាវ​ឲ្យ​មានការឈប់បាញ់ជាបន្ទាន់ និងបានរិះគន់ចំពោះអ្វីដែលលោកបានពណ៌នាថាជា ព័ត៌មានមិនពិតក្នុងគោលបំណងបំផ្លាញទំនាក់ទំនងរបស់ចិនជាមួយប្រទេសទាំងពីរ។

លោក Wang បានមានប្រសាសន៍ថា «ក្នុងនាមជាមិត្ត និងជាអ្នកជិតខាងជិតស្និទ្ធរបស់កម្ពុជា និងថៃ ចិនមិនចង់ឃើញជម្លោះប្រដាប់អាវុធកើតឡើងដាច់​ខាត» ដោយលោកបានជំរុញ​ឲ្យ​ភាគីទាំងពីរបញ្ឈប់ការវាយប្រហារ និងការពារគម្រោងព្រមទាំងបុគ្គលិករបស់ចិនផងដែរ។ ប្រទេសចិនបាន​ឲ្យ​ដឹងថា ប្រេសិតពិសេសទទួលបន្ទុកកិច្ចការអាស៊ី នឹងធ្វើទស្សនកិច្ចទៅកាន់ប្រទេសទាំងពីរ ដើម្បីជួយសម្របសម្រួលដោះស្រាយជម្លោះនេះ៕

ប្រែសម្រួល៖ ឈាង