លោក ហ្សេលេនស្គី សុំឲ្យប្រទេសលើលោក ជួយការពារដែនអាកាស អ៊ុយក្រែន

ប្រធានាធិបតីអ៊ុយក្រែន លោក វ៉ូឡូឌីមៀរ​ ហ្សេលេនស្គី កាលពីថ្ងៃទី១៨ ខែមករា បានអំពាវនាវដល់ប្រទេសនានាផ្តល់ការគាំទ្រ ដើម្បីឲ្យប្រទេសរបស់លោកអាចពង្រឹងប្រព័ន្ធការពារដែនអាកាសរបស់ខ្លួនកាន់តែរឹងមាំជាងមុន។ នេះកើតឡើងនៅពេលដែលរុស្ស៊ី នៅតែបន្តធ្វើការវាយប្រហារមកលើអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន NHK លោកហ្សេលេនស្គី បានធ្វើការអំពាវនាវនេះនៅក្នុងការបង្ហោះប្រព័ន្ធផ្សព្វផ្សាយសង្គមកាលពីថ្ងៃអាទិត្យ ខណៈដែលយោធារុស្ស៊ីបានបន្តវាយប្រហារបណ្តាញអគ្គិសនីរបស់អ៊ុយក្រែន។ ការវាយប្រហារនេះបានកាត់បន្ថយការទទួលបានអគ្គិសនី និងកំដៅរបស់ប្រជាជន ស្របពេលដែលឥឡូវនេះជារដូវរងានៅក្នុងប្រទេសអ៊ុយក្រែន។

មេដឹកនាំបានសរសេរថា កងកម្លាំងរុស្ស៊ីបានបន្តវាយប្រហារទីក្រុង Sumy, Kharkiv និងតំបន់ចំនួនបួនផ្សេងទៀតចាប់ពីយប់ថ្ងៃសៅរ៍រហូតដល់ព្រឹកថ្ងៃអាទិត្យ។ ប្រធានាធិបតីអះអាងថា ការវាយប្រហារទាំងនោះ ក៏បានធ្វើឲ្យមនុស្សយ៉ាងហោចណាស់២នាក់ស្លាប់ និងរាប់សិបនាក់រងរបួស រួមទាំងកុមារម្នាក់ផងដែរ។

លោកហ្សេលេនស្គី បានគូសបញ្ចាក់បន្ថែមថា ក្នុងអំឡុងពេលមួយសប្តាហ៍កន្លងមក កងកម្លាំងរុស្ស៊ីបានបាញ់យន្តហោះគ្មានមនុស្សបើកវាយប្រហារជាង ១,៣០០ គ្រឿង គ្រាប់បែកតាមអាកាសដឹកនាំប្រហែល ១,0៥០ គ្រឿង និងមីស៊ីលចំនួន ២៩ គ្រាប់ប្រភេទផ្សេងៗគ្នា។

យ៉ាងណាមិញ មុនពេលប្រធានាធិបតីអ៊ុយក្រែនស្នើសុំប្រទេសជាច្រើនការពារដែនអាកាសខ្លួន កាលពីថ្ងៃទី១២ ខែមករា លោកក៏ធ្លាប់ព្រមានដែរថា ការវាយប្រហារតាមអាកាសថ្មីអាចនឹងកើតឡើងឆាប់ៗនេះ ខណៈកងកម្លាំងសង្គ្រោះបន្ទាន់បានខិតខំប្រឹងប្រែងដើម្បីស្តារកំដៅ និងថាមពលឡើងវិញដល់ប្រជាជននៅទីក្រុងកៀវ ដែលរងការឡោមព័ទ្ធ​ជាងបីថ្ងៃ បន្ទាប់ពីការវាយប្រហាររបស់រុស្ស៊ីលើគោលដៅថាមពល។

ដោយឡែក គណៈប្រតិភូ​មន្ត្រីជាន់ខ្ពស់​អ៊ុយក្រែន​មួយក្រុម គ្រោង​ជួបជាមួយ​ប្រេសិតពិសេស​របស់​សហរដ្ឋអាមេរិក លោក Steve Witkoff នៅសហរដ្ឋអាមេរិក ដើម្បីពិភាក្សាអំពីផែនការសន្តិភាព​ដែលមានគោលបំណងបញ្ចប់ការប្រយុទ្ធគ្នា។ ទន្ទឹមនោះដែរ លោកហ្សេលេនស្គី និងប្រធានាធិបតីសហរដ្ឋអាមេរិក លោក ដូណាល់ ត្រាំ នឹងចូលរួមក្នុងកិច្ចប្រជុំប្រចាំឆ្នាំរបស់វេទិកាសេដ្ឋកិច្ចពិភពលោក ដែលនឹងចាប់ផ្តើមនៅទីក្រុង Davos ប្រទេសស្វីស នាថ្ងៃចន្ទ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោក ហ្សេលេនស្គី ព្រមានថា រុស្ស៊ីអាចនឹងវាយប្រហារតាមអាកាសជាថ្មី