អាល្លឺម៉ង់​ ដកទាហានចេញ​ពី ​Greenland ស្របពេលលោកត្រាំ ប្រកាសយកពន្ធបន្ថែម

អ្នកនាំពាក្យក្រសួងការពារជាតិអាល្លឺម៉ង់ លោកវរសេនីយ៍ឯក Peter Mielewczyk បានប្រកាសកាលពីថ្ងៃទី១៨ ខែមករាថា ក្រុមឈ្លបយកការណ៍យោធាមួយក្រុមមានគ្នា ១៥ នាក់ទើបនឹងបញ្ជូនទៅកោះ Greenland ពេលនេះបានឡើងយន្តហោះវិលមកដាណឺម៉ាកវិញ ស្របពេលលោក ដូណាល់ ត្រាំ ប្រកាសយកពន្ធបន្ថែមលើប្រទេសអឺរ៉ុបចំនួន៨។

យោងតាម Yahoo ក្រុមនេះបានមកដល់ Greenland កាលពីថ្ងៃសុក្រ ជាផ្នែកនៃបេសកកម្មឈ្លបយកការណ៍ ដឹកនាំដោយដាណឺម៉ាក មុនពេលសមយុទ្ធយោធាដែលបានគ្រោងទុក។ ប្រទេសមួយចំនួននៅក្នុងអង្គការ NATO នៅអឺរ៉ុបក៏បានបញ្ជូនបុគ្គលិកមួយចំនួនទៅផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យរបស់ក្រសួងការពារជាតិអាល្លឺម៉ង់ បានបញ្ចាក់ថា សកម្មភាពរបស់អាល្លឺម៉ង់ ជាមួយដាណឺម៉ាក គឺមានភាពវិជ្ជមាន និងមានលក្ខណៈស្ថាបនា។ លោកបន្ថែមថា ក្រុមទាហានរបស់ខ្លួនមានការផ្លាស់ប្តូរយ៉ាងរស់រវើក ជាមួយកងកម្លាំងមកពីប្រទេសបារាំង ហូឡង់ និងអ៊ីស្លង់។ ជាងនេះទៀតដែរ ទំនាក់ទំនងជាមួយ Greenlanders ក៏មានភាពវិជ្ជមានដូចគ្នា។

ទោះបីជាយ៉ាងណាក៏ដោយ នៅតែមានការសង្ស័យថា ការដកទ័ពរបស់អាល្លឺម៉ង់ មិនមែនជាផ្នែកនៃផែនការនោះទេ។ កាសែត Bild បានរាយការណ៍ថា ទាហានអាល្លឺម៉ង់ត្រូវបានគេប្រាប់កាលពីថ្ងៃទី ១៧ខែមករាថា ពួកគេនឹងស្នាក់នៅ Greenland យូរជាងការរំពឹងទុក ប៉ុន្តែនៅថ្ងៃទី ១៨ ស្រាប់តែមានបញ្ជាឲ្យត្រឡប់មកវិញ ហើយកិច្ចប្រជុំជាច្រើនក៏ត្រូវលុបចោលដែរ។ កាសែតអាល្លឺម៉ង់អះអាងទៀតថា ចលនាដកទ័ពចេញពីកោះ អាចជាប្រតិកម្មតបទៅនឹងការគំរាមយកពន្ធពីប្រធានាធិបតីអាមេរិក លោក ដូណាល់ ត្រាំ។

នៅក្នុងការបង្ហោះប្រព័ន្ធផ្សព្វផ្សាយសង្គមកាលពីសប្តាហ៍មុន លោកត្រាំបានរិះគន់ ចក្រភពអង់គ្លេស ដាណឺម៉ាក អាល្លឺម៉ង់ ហូឡង់ ន័រវែស បារាំង ហ្វាំងឡង់ និងស៊ុយអែត សម្រាប់ការបញ្ជូនកងទ័ពទៅកាន់ Greenland ក្នុងគោលបំណងមិនច្បាស់លាស់ ដោយលើកឡើងថា នេះគឺជាស្ថានភាពដ៏គ្រោះថ្នាក់បំផុតសម្រាប់សន្តិសុខ សុវត្ថិភាព និងការរស់រានមានជីវិតនៃភពផែនដីទាំងមូល។

ក្រោយមក ប្រធានាធិបតីត្រាំ បានគំរាមដាក់ពន្ធ ១០% លើការនាំចូលទាំងអស់ពីប្រទេសដាណឺម៉ាក ន័រវែស ស៊ុយអែត បារាំង អាល្លឺម៉ង់ ចក្រភពអង់គ្លេស ហូឡង់ និងហ្វាំងឡង់។ ពន្ធគយនឹងចូលជាធរមាននៅថ្ងៃទី ១ ខែកុម្ភៈ ហើយនឹងកើនឡើងដល់ ២៥% នៅដើមខែមិថុនា។ លោក​​ថា ​វិធានការ​នេះ​នឹង​នៅ​តែ​មាន​រហូត​ដល់​អាមេរិក​ឈាន​ដល់​កិច្ច​ព្រម​ព្រៀង​មួយ​ក្នុង​ការ​ទិញ​យក Greenland ទាំងស្រុង និងពេញលេញតែម្ដង៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

មន្ត្រីរុស្ស៊ី ចំអកឲ្យអឺរ៉ុប មិនគួរឌឺដងលោកត្រាំ ក្រោយអាមេរិកប្រកាសយកពន្ធគ្មានត្រាប្រណី