អាមេរិក មិនទាន់ទុកចិត្តវ៉េណេស៊ុយអេឡា ខណៈ Rodriguez នៅជិតស្និទ្ធគូប្រជែង ត្រាំ

ផ្អែកតាមរបាយការណ៍ចារកម្មអាមេរិកបានបង្កើនការសង្ស័យ និងមិនទុកចិត្តទៅលើប្រធានាធិបតីបណ្តោះអាសន្នវ៉េណេស៊ុយអេឡា Delcy Rodriguez ដែលកំពុងសហការជាមួយរដ្ឋបាលត្រាំ ខណៈលោកស្រីមិនទាន់កាត់ផ្តាច់ទំនាក់ទំនងជាមួយគូសត្រូវអាមេរិកជាផ្លូវការ។ នេះបើយោងតាមប្រភពពី Reuters បានលើកឡើងកាលពីថ្ងៃទី២៧ ខែមករា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីអាមេរិកមួយរូបបាននិយាយជាសាធារណៈថា ពួកគេចង់ឲ្យប្រធានាធិបតីបណ្តោះអាសន្នរូបនេះ កាត់ផ្តាច់ទំនាក់ទំនងជាមួយសម្ព័ន្ធមិត្តអន្តរជាតិជិតស្និទ្ធដូចជាអ៊ីរ៉ង់ ចិន និងរុស្ស៊ី រួមទាំងការបណ្តេញអ្នកការទូត និងទីប្រឹក្សារបស់ពួកគេចេញពីប្រទេសវ៉េណេស៊ុយអេឡា។

ប៉ុន្តែលោកស្រី Rodriguez ដែលពិធីស្បថចូលកាន់តំណែងកាលពីដើមខែមករា បែរជាអញ្ញើញតំណាងនៃប្រទេសទាំងនោះឲ្យចូលរួមជាសាក្សី បើទោះជាមិនទាន់បានប្រកាសជាសាធារណៈអំពីសកម្មភាពរបស់ខ្លួនក៏ដោយ។ គាត់បានក្លាយជាប្រធានាធិបតី បន្ទាប់ពីអាមេរិកបានចាប់ខ្លួនអតីតប្រធានាធិបតី Nicolas Maduro កាលពីថ្ងៃទី ៣ ខែមករា។

របាយការណ៍ចារកម្មអះអាងបន្ថែមទៀតថា វាមិនច្បាស់ទេថា តើគាត់យល់ស្របទាំងស្រុងជាមួយយុទ្ធសាស្ត្ររបស់អាមេរិកនៅក្នុងប្រទេសរបស់គាត់ឬអត់។ ជាក់ស្ដែង នាយក CIA លោក John Ratcliffe បានធ្វើដំណើរកាលពីថ្ងៃទី ១៥ ខែមករាទៅកាន់ទីក្រុង Caracas ដើម្បីពិភាក្សាអំពីអនាគតនយោបាយប្រទេសវ៉េណេស៊ុយអេឡា ជាមួយលោកស្រី Rodriguez។ យ៉ាងណា គេមិនអាចកំណត់ថា តើការសន្ទនាទាំងនោះបានផ្លាស់ប្តូរគំនិតរបស់ទីភ្នាក់ងារចារកម្មដែរឬទេ?

កន្លងមក ទីក្រុងវ៉ាស៊ីនតោនចង់ទប់ស្កាត់ឥទ្ធិពលសត្រូវរបស់ខ្លួននៅអឌ្ឍគោលខាងលិច រួមទាំងនៅទីក្រុង Caracas ដែលលោកត្រាំស្វែងរកការកេងប្រវ័ញ្ចទុនបម្រុងប្រេងដ៏ច្រើនក្នុងប្រទេសមួយនេះ។ បើលោកស្រី Rodriguez ផ្តាច់ទំនាក់ទំនងជាមួយគូប្រជែងអាមេរិក វានឹងបើកឱកាសកាន់តែច្រើនសម្រាប់ការវិនិយោគរបស់អាមេរិកនៅក្នុងវិស័យថាមពលវ៉េណេស៊ុយអេឡា។ ប៉ុន្តែការបរាជ័យក្នុងការគ្រប់គ្រងមេដឹកនាំវ៉េណេស៊ុយអេឡា អាចធ្វើឲ្យប៉ះពាល់ដល់កិច្ចខិតខំប្រឹងប្រែងរបស់វ៉ាស៊ីនតោនក្នុងការដឹកនាំអ្នកគ្រប់គ្រងបណ្តោះអាសន្ន និងចៀសវាងតួនាទីយោធាកាន់តែជ្រៅរបស់អាមេរិក។

សម្រាប់វ៉េណេស៊ុយអេឡា ការណែនាំរបស់អាមេរិកមានន័យថា ការបោះបង់ចោលសម្ព័ន្ធមិត្តជិតស្និទ្ធបំផុតរបស់ខ្លួននៅខាងក្រៅតំបន់។ កន្លងមក អ៊ីរ៉ង់បានជួយទីក្រុង Caracas តាមរយៈការជួសជុលរោងចក្រចម្រាញ់ប្រេង ខណៈដែលចិនបានយកប្រេងជាការសងបំណុល។ ចំណែក រុស្ស៊ីបានផ្គត់ផ្គង់អាវុធ រួមទាំងមីស៊ីល ដល់យោធាវ៉េណេស៊ុយអេឡា។

លោកត្រាំក៏បានលើកឡើងពីប្រទេសគុយបាដឹកនាំដោយកុម្មុយនិស្តថា ជាសត្រូវមួយទៀតរបស់អាមេរិក ដែលគាត់ចង់ឲ្យវ៉េណេស៊ុយអេឡាបោះបង់ចោល។ ទីក្រុងហាវ៉ាណាបានផ្តល់ការគាំទ្រផ្នែកសន្តិសុខ និងចារកម្ម ដោយជួសមកវិញនូវប្រេងក្នុងអត្រាទាប។

ចាប់តាំងពីលោក Maduro ត្រូវបានបណ្តេញចេញ លោកស្រី Rodriguez ដែលមានទំនាក់ទំនងយ៉ាងជ្រាលជ្រៅជាមួយវិស័យប្រេងមានសារៈសំខាន់ណាស់ក្នុងការរក្សាស្ថិរភាពប្រទេស បានចាត់វិធានការដើម្បីរក្សាការគាំទ្រជាមួយទីក្រុងវ៉ាស៊ីនតោន រួមទាំងការដោះលែងអ្នកទោសនយោបាយ និងអនុញ្ញាតឲ្យលក់ប្រេងចំនួន ៣០ លានទៅ ៥០លានបារ៉ែលទៅឲ្យអាមេរិក។

ដ្បិតថាយ៉ាងនេះក្ដី នៅក្នុងសុន្ទរកថាមួយកាលពីថ្ងៃអាទិត្យ លោកស្រី Delcy Rodríguez បានប្រកាស​ជាសាធារណៈ​ថា លោក​ស្រី​ «ឆ្អែតឆ្អន់»​ ហើយ​ចំពោះការជ្រៀតជ្រែកបន្តទៀតពីទីក្រុងវ៉ាស៊ីនតោន ដោយអះអាងថា ប្រទេសជាតិត្រូវតែដោះស្រាយជម្លោះនយោបាយផ្ទៃក្នុងដោយខ្លួនឯង ដោយមិនចាំបាច់មានការបង្គាប់បញ្ជាពីបរទេស​ទេ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ប្រធានាធិបតីស្តីទីវ៉េណេស៊ុយអេឡា ប្រាប់ថា «ឆ្អែតឆ្អន់​»ហើយ នឹង​បង្គាប់​បញ្ជា​ពី​អាមេរិក