ប្រធានាធិបតីស្តីទីវ៉េណេស៊ុយអេឡា ប្រាប់ថា «ឆ្អែតឆ្អន់​»ហើយ នឹង​បង្គាប់​បញ្ជា​ពី​អាមេរិក

ប្រធានាធិបតីស្តីទីនៃប្រទេសវ៉េណេស៊ុយអេឡា លោកស្រី Delcy Rodríguez បានប្រកាស​ជាសាធារណៈ​ថា លោក​ស្រី​ «ឆ្អែតឆ្អន់»​ហើយ​ចំពោះការជ្រៀតជ្រែកបន្តទៀតពីទីក្រុងវ៉ាស៊ីនតោន ដោយអះអាងថា ប្រទេសជាតិត្រូវតែដោះស្រាយជម្លោះនយោបាយផ្ទៃក្នុងដោយខ្លួនឯង ដោយមិនចាំបាច់មានការបង្គាប់បញ្ជាពីបរទេស​ទេ។

លោកស្រី Rodríguez បានសង្កត់ធ្ងន់ថា នយោបាយវ៉េណេស៊ុយអេឡាគួរតែស្ថិតក្នុងដៃរបស់ប្រជាជនខ្លួនឯង។ «វាល្មមគ្រប់គ្រាន់ហើយ ចំពោះការបង្គាប់បញ្ជារបស់ទីក្រុងវ៉ាស៊ីនតោន មកលើអ្នកនយោបាយនៅក្នុងប្រទេសវ៉េណេស៊ុយអេឡា»។ នេះបើយោងតាមការចុះផ្សាយរបស់ CNN ដែលដកស្រង់សម្តីលោកស្រី Rodríguez ថ្លែងទៅកាន់ក្រុមកម្មករប្រេងនៅក្នុងទីក្រុង Puerto La Cruz កាល​ពី​ថ្ងៃ​ទី​២៥​ខែ​មករា​ឆ្នាំ​២០២៦។

លោកស្រីបានបន្តថា «ទុក​ឲ្យ​នយោបាយវ៉េណេស៊ុយអេឡា ដោះស្រាយនូវរាល់ការខ្វែងគំនិត និងជម្លោះផ្ទៃក្នុងរបស់យើងដោយខ្លួនឯងចុះ។ សាធារណរដ្ឋមួយនេះ បានលះបង់ក្នុងតម្លៃយ៉ាងខ្ពស់រួចមកហើយ ក្នុងការប្រឈមមុខនឹងផលវិបាកនៃរបបហ្វាស៊ីស (Fascism) និងភាពជ្រុលនិយមនៅក្នុងប្រទេសរបស់យើង»។

ការប្រកាសក្តែងៗនេះ បានធ្វើឡើងបន្ទាប់ពីមានការផ្លាស់ប្តូរថ្នាក់ដឹកនាំយ៉ាងគំហុកនៅវ៉េណេស៊ុយអេឡា ក្រោយប្រតិបត្តិការយោធារបស់អាមេរិកនៅទីក្រុងការ៉ាកាស កាលពីបីសប្តាហ៍មុន ដែលបានឈានដល់ការចាប់ខ្លួនប្រធានាធិបតី នីកូឡាស ម៉ាឌូរ៉ូ។

ទោះបីជាមានការជំទាស់ពីលោកស្រី Rodríguez ក៏ដោយ ក៏ប្រធានាធិបតីអាមេរិក ដូណាល់ ត្រាំ បានបង្ហាញពីការចូលរួមយ៉ាងជ្រៅក្នុងអនាគតរបស់ប្រទេសនេះ ជាពិសេសពាក់ព័ន្ធនឹងធនធានថាមពលដ៏មហិមា។ បន្ទាប់ពីការបញ្ជូនខ្លួនលោកម៉ាឌូរ៉ូ ទៅកាន់ទីក្រុងញូវយ៉ក ដើម្បីប្រឈមមុខនឹងការចោទប្រកាន់ពីបទឧក្រិដ្ឋគ្រឿងញៀន លោកត្រាំ បានសរសើរការដឹកនាំរបស់លោកស្រី Rodríguez និងបានបញ្ជាក់ថា ក្រុង​វ៉ាស៊ីនតោន​កំពុងសហការជាមួយរដ្ឋបាលរបស់លោកស្រី ដើម្បីសម្របសម្រួលការនាំចេញប្រេងវ៉េណេស៊ុយអេឡាទៅកាន់អាមេរិក។

លោកត្រាំ បានស្នើ​ឲ្យ​មានការបែងចែកផលចំណេញ ដែលក្នុងនោះ​អាមេរិកនឹងទទួលបាន «ចំណែកដ៏សមរម្យ» ពីចំណូលប្រេងដើម្បីពង្រឹងសេដ្ឋកិច្ចអាមេរិក និងកាត់បន្ថយពន្ធ​ ខណៈដែលលោកអះអាងថា វ៉េណេស៊ុយអេឡាក៏នឹងទទួលបានផលប្រយោជន៍ផងដែរ។

មក​ទល់​នឹង​ពេល​នេះ អាមេរិកមិនទាន់បានអំពាវនាវ​ឲ្យ​មានការបោះឆ្នោតថ្មីនៅឡើយទេ ស្រប​ពេល​ដែល​ស្ថានភាពភូមិសាស្ត្រនយោបាយនៅតែមានភាពស្មុគស្មាញ ​ខណៈ​លោកត្រាំ កំពុងព្យាយាមរក្សាតុល្យភាពទំនាក់ទំនងជាមួយទាំងរដ្ឋបាលស្តីទីបច្ចុប្បន្ន និងក្រុមប្រឆាំង។ បន្ទាប់ពីធ្លាប់​បង្ហាញ​មន្ទិលសង្ស័យលើការគាំទ្រក្នុងស្រុករបស់លោកស្រី María Corina Machado កន្លងមក លោកត្រាំ នាពេលថ្មីៗនេះ បានជួបពិភាក្សាជាមួយមេដឹកនាំបក្សប្រឆាំង និងជាម្ចាស់ពានរង្វាន់ណូបែលសន្តិភាពឆ្នាំ២០២៥រូបនេះ នៅសេតវិមាន។ ជំនួបនេះ បានបង្ហាញ​ឲ្យ​ឃើញពីសម្ព័ន្ធភាពដែលកំពុងរីកចម្រើន ក្រោយ​ពេល​លោកស្រី Machado បានយកពានរង្វាន់របស់លោកស្រី​ជូនមេ​ដឹកនាំ​អាមេរិក ដែលនេះជាការកត់សម្គាល់នូវការផ្លាស់ប្តូរជំហររបស់រដ្ឋបាល​លោក​ត្រាំ​ចំពោះក្រុមប្រឆាំងនៅវ៉េណេស៊ុយអេឡា៕

ប្រែសម្រួល៖ ឈាង