អ៊ីរ៉ង់ ប្រកាស បើកចំហជានិច្ច បើអន្តរជាតិចង់ពិនិត្យ កម្មវិធីនុយក្លេអ៊ែររបស់ខ្លួន

ជាសញ្ញានៃការចង់សម្រាលភាពតានតឹងជាមួយបណ្តាប្រទេសមហាអំណាចខាងលិច, អ៊ីរ៉ង់ បានបង្ហាញជំហរយ៉ាងច្បាស់ថា ខ្លួនបើកចំហជានិច្ចចំពោះការត្រួតពិនិត្យ និងការផ្ទៀងផ្ទាត់ ពីសំណាក់អន្តរជាតិលើកម្មវិធីនុយក្លេអ៊ែររបស់ខ្លួន។

តាមការផ្សាយរបស់ Times of Israel កាលពីថ្ងៃអង្គារទី១៧ខែកុម្ភៈឆ្នាំ២០២៦ ប្រធានាធិបតីអ៊ីរ៉ង់ Masoud Pezeshkian បានថ្លែងជាសាធារណៈថា៖ «យើងពិតជាមិនព្យាយាមបង្កើតអាវុធនុយក្លេអ៊ែរឡើយ។ ប្រសិនបើមាននរណាម្នាក់ចង់ផ្ទៀងផ្ទាត់រឿងនេះ យើងបើកចំហឲ្យផ្ទៀងផ្ទាត់ជានិច្ច»។

ទោះបីជាយ៉ាងណាក៏ដោយ លោកសង្កត់ធ្ងន់ថា កម្មវិធីនុយក្លេអ៊ែររបស់អ៊ីរ៉ង់គឺធ្វើឡើងក្នុងគោលបំណង «សន្តិភាព» តែប៉ុណ្ណោះ ដូចជាការផលិតថាមពលអគ្គិសនី និងការស្រាវជ្រាវវិទ្យាសាស្ត្រវេជ្ជសាស្ត្រជាដើម។

ទន្ទឹមនោះដែរ លោក Pezeshkian ទាមទារឲ្យដកទណ្ឌកម្មសេដ្ឋកិច្ចលើអ៊ីរ៉ង់ជាមុន ឬជាផ្នែកនៃកិច្ចព្រមព្រៀង ហើយការត្រួតពិនិត្យត្រូវតែធ្វើឡើងដោយផ្អែកលើ «សមភាព និងយុត្តិធម៌» ដោយមិនមានការជ្រៀតជ្រែកចូលកិច្ចការផ្ទៃក្នុង ឬសម្ងាត់យោធាផ្សេងទៀតឡើយ។

សេចក្តីប្រកាសនេះកើតឡើងចំពេលកិច្ចចរចាដោយប្រយោលរវាងមន្ត្រីអាមេរិក និងអ៊ីរ៉ង់នៅក្នុងប្រទេសស្វ៊ីស បានបញ្ចប់ទៅហើយកាលពីថ្ងៃអង្គារ ជាមួយលទ្ធផលប្រកបដោយផ្លែផ្កា។

រដ្ឋមន្ត្រីការបរទេស លោក Abbas Araghchi បានបង្ហាញភាពវិជ្ជមានផង និងភាពមិនច្បាស់លាស់ផង ខណៈមន្ត្រីអាមេរិកមិនធ្វើអត្ថាធិប្បាយជាសាធារណៈភ្លាមៗទេអំពីកិច្ចចរចានេះ។

យ៉ាងណា មន្ត្រីសហរដ្ឋអាមេរិកម្នាក់ ដែលសុំមិនបញ្ចេញឈ្មោះ បាននិយាយថា ភាគីទាំងពីរពិតជាមានការរីកចម្រើនទៅមុខ ដោយអ៊ីរ៉ង់នឹងផ្តល់នូវសំណើលម្អិតបន្ថែមទៀតក្នុងរយៈពេលពីរសប្តាហ៍ខាងមុខ ដើម្បីដោះស្រាយភាពខ្វែងគំនិតគ្នាមួយចំនួនរវាងសហរដ្ឋអាមេរិក និងអ៊ីរ៉ង់ ប៉ុន្តែមិនបញ្ជាក់ព័ត៌មានលម្អិតជាក់លាក់ណាមួយឡើយ៕

អត្ថបទ៖ សុខ សុវណ្ណ