រដ្ឋាភិបាល​នូវែលសេឡង់ បញ្ចេញ​យន្តហោះយោធា​ត្រៀម​ជម្លៀសពលរដ្ឋ​នៅមជ្ឈិមបូព៌ា​​

រដ្ឋាភិបាល​​នូវែលសេឡង់ ​បាន​បញ្ចេញ​យន្តហោះ​យោធា​​ពី​រគ្រឿង​ និង​​បញ្ជូន​​បុគ្គលិកកុងស៊ុល​ទៅកាន់មជ្ឈិមបូព៌ា ដើម្បីត្រៀមជួយពលរដ្ឋខ្លួនដែលជាប់គាំងក្នុងចំណោមជម្លោះដែលកំពុងកើនឡើងនៅក្នុងតំបន់។ នេះបើយោងតាម ការចុះផ្សាយពី Xinhua នាថ្ងៃព្រហស្បតិ៍ទី ៥ ខែមីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្អែកតាមសេចក្តីថ្លែងការណ៍ផ្លូវការ ​រដ្ឋមន្ត្រីការបរទេសនូវែលសេឡង់​ លោក Winston Peters បានអំពាវនាវឲ្យប្រជាជននូវែលសេឡង់ «ស្នាក់នៅមួយកន្លែង» ហើយចាកចេញពីតំបន់នោះ ប្រសិនបើលក្ខខណ្ឌសុវត្ថិភាពអនុញ្ញាត។ យ៉ាងណា លោកមិនអាច​បញ្ជាក់​ឲ្យ​ច្បាស់​ ថាតើ​ពេលណា និងរបៀបដែលការជម្លៀសអាចកើតឡើងនោះទេ ប៉ុន្តែរដ្ឋាភិបាលចង់ត្រៀមខ្លួន ប្រសិនបើស្ថានភាពអនុញ្ញាត។

ថ្លែងក្នុងអំឡុងពេលដំណើរទស្សនកិច្ចទៅកាន់អាមេរិកខាងត្បូង លោក Winston បានបញ្ចាក់បន្ថែមទៀតថា យន្តហោះ C-130 Hercules នឹងនាំមនុស្សចេញពីតំបន់គ្រោះថ្នាក់ទៅកាន់ប្រទេសដែលមានសុវត្ថិភាព ដែលពួកគេអាចបន្តដំណើរ​ប្រទេស​កំណើត​​ ដោយជើងហោះហើរពាណិជ្ជកម្ម។ ជាក់ស្ដែង ពលរដ្ឋនូវែលសេឡង់ជាង ៣០០០នាក់ បានចុះឈ្មោះរួចហើយ រួមទាំង ២៣នាក់នៅអ៊ីរ៉ង់ និង ៦២នាក់នៅអ៊ីស្រាអែល។ នៅក្នុងនោះដែរ លោកក៏បានទុកលទ្ធភាពដែលនូវែលសេឡង់ នឹងជម្លៀសពលរដ្ឋនៃប្រទេសដទៃទៀតប្រសិនបើអាចធ្វើទៅបាន។

​​ការលើក​ឡើង​របស់លោក Winston កើតឡើងនៅពេលដែលប្រទេសជាច្រើនបង្កើនល្បឿនជម្លៀសពលរដ្ឋចេញពីមជ្ឈិមបូព៌ា បន្ទាប់ពីការវាយប្រហារតាមអាកាសរបស់អាមេរិក និងអ៊ីស្រាអែលលើអ៊ីរ៉ង់ ដែលបង្កឲ្យមានជម្លោះនៅក្នុងតំបន់កាន់តែឆាបឆេះឡើង។

ការដាក់ពង្រាយយន្តហោះយោធានេះទៀតសោតក៏បង្ហាញថា រដ្ឋាភិបាល​​នូវែលសេឡង់កំពុងរៀបចំសម្រាប់សេណារីយ៉ូដ៏អាក្រក់បំផុត ទោះបីជាពេលវេលា និងលក្ខខណ្ឌជាក់ស្តែងសម្រាប់ប្រតិបត្តិការជម្លៀសមិនទាន់ត្រូវបានកំណត់ក៏ដោយ៕

អត្ថបទ៖ សាង ស្រីល័ក្ខ