មេដឹកនាំក្រុម ហាម៉ាស ថា នឹងមិនប៉ះជំនួយអន្តរជាតិសូម្បីមួយសេន សម្រាប់ការកសាងតំបន់ហ្គាហ្សាឡើងវិញ

ក្រុមប៉ាឡេស្ទីនហាម៉ាសបានសន្យាថា នឹងមិនប៉ះជំនួយអន្តរជាតិសូម្បីមួយសេន ដើម្បីកសាងតំបន់ហ្គាហ្សាស្ទ្រីប ឡើងវិញ បន្ទាប់ពីអ៊ីស្រាអែលបានទម្លាក់គ្រាប់បែក បំផ្លាញអស់រយៈពេល ១១ ថ្ងៃ ។

លោក Yahya Sinwar ប្រធាននយោបាយរបស់ក្រុមហាម៉ាស នៅតំបន់ហ្គាហ្សាកាលពីថ្ងៃពុធ បាននិយាយថា “យើងស្វាគមន៍ និងអរគុណរាល់កិច្ចប្រឹងប្រែងអន្តរជាតិ ឬរដ្ឋអារ៉ាប់ ដើម្បីកសាងតំបន់ហ្គាហ្សាស្ទ្រីប ។ តែខ្ញុំសូមបញ្ជាក់ពីការប្តេជ្ញាចិត្តរបស់យើងថា យើងមិនយកសូម្បីមួយសេន សម្រាប់ការកសាងឡើងវិញ និងកិច្ចខិតខំប្រឹងប្រែងមនុស្សធម៌ ។ យើងមិនដែលគិតសូម្បីមួយភាគរយពីការទទួលនេះ” ។

សុន្ទរកថារបស់លោក Sinwar បានកើតឡើងមួយថ្ងៃ បន្ទាប់ពីរដ្ឋមន្រ្តីក្រសួងការបរទេសអាមេរិកលោក Antony Blinken កាលពីថ្ងៃអង្គារ បានសន្យាជួយប្រទេសរបស់លោក ក្នុងការកសាងតំបន់ហ្គាហ្សាឡើងវិញ ប៉ុន្តែបានសង្កត់ធ្ងន់ថា ជំនួយនេះមិនត្រូវផ្តល់ផលប្រយោជន៍ដល់ក្រុមហាម៉ាស ដែលគ្រប់គ្រងដែនដីឆ្នេរសមុទ្រឡើយ ។

លោក Sinwar បាននិយាយថា ការលើកឡើងរបស់លោក Blinken គឺសំដៅពង្រីកការបែកបាក់រវាងក្រុមហាម៉ាស និងអាជ្ញាធរប៉ាឡេស្ទីន ប៉ុន្តែបានទទូចថា ពួកគេនឹងមិនមានឥទ្ធិពលអ្វីទៅលើទំនាក់ទំនងរវាងក្រុមប៉ាឡេស្ទីន ដែលជាគូប្រជែងឡើយ ។ យើងនឹងមិនចុះចាញ់កលល្បិចនេះឡើយ ។

ដោយឡែកកាលពីថ្ងៃពុធ រដ្ឋមន្រ្តីក្រសួងការបរទេសអង់គ្លេសលោក Dominic Raab បាននិយាយនៅលើបណ្តាញសង្គម Twitter ថា ចក្រភពអង់គ្លេសបានសន្យាផ្តល់ជំនួយបន្ទាន់ ចំនួន ៤.៥ លានដុល្លារអាមេរិក ដល់ទីភ្នាក់ងារជំនួយ និងការងាររបស់អង្គការសហប្រជាជាតិ សម្រាប់ជនភៀសខ្លួនប៉ាឡេស្ទីន (UNRWA) ដើម្បីជួយដល់អ្នកនៅតំបន់ហ្គាហ្សា ដែលរងផលប៉ះពាល់ដោយការប្រទូស្តរាយថ្មីៗនេះ ។

ទន្ទឹមនោះ កាលពីថ្ងៃអង្គារគណៈកម្មការអឺរ៉ុប បានប្រកាសថា សហភាពអឺរ៉ុបកំពុងបង្កើនជំនួយមនុស្សធម៌របស់ខ្លួន ដល់ប៉ាឡេស្ទីនចំនួន ៩.៨ លានដុល្លារ ។

យោងតាមអាជ្ញាធរសុខាភិបាលប៉ាឡេស្ទីន បានឲ្យដឹងថា យ៉ាងហោចណាស់មនុស្ស ២៥៤ នាក់ក្នុងនោះមានកុមារ ៦៦ នាក់ ត្រូវបានសម្លាប់នៅតំបន់ហ្គាហ្សា ដោយសារការវាយប្រហារតាមអាកាស របស់អ៊ីស្រាអែលលើទឹកដីប៉ាឡេស្ទីន រយៈពេល ១១ ថ្ងៃ ។ ចំណែកអាជ្ញាធរអ៊ីស្រាអែល បាននិយាយថា យ៉ាងហោចណាស់មនុស្ស ១២ នាក់ក្នុងនោះមានកុមារ ២ នាក់ ត្រូវបានសម្លាប់នៅក្នុងប្រទេសអ៊ីស្រាអែល ដោយការវាយប្រហារដោយគ្រាប់រ៉ុកកែត ដែលបាញ់ដោយក្រុមហាម៉ាស និងក្រុមប្រដាប់អាវុធផ្សេងទៀត ដែលមានមូលដ្ឋាននៅតំបន់ហ្គាហ្សា ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ ប្រធានាធិបតីអាមេរិក ចេញមុខឲ្យក្រុម ហាម៉ាស ឈប់បាញ់គ្រាប់រ៉ុកកែត ហើយការពារអ៊ីស្រាអែលក្នុងការបាញ់តបតទៅវិញ