វៀតណាម ត្រៀមទិញវ៉ាក់សាំងកូវីដ-១៩ ចាក់ឲ្យកុមារ

យោងតាមការដកស្រង់សម្ដីរបស់រដ្ឋមន្រ្តីក្រសួងសុខាភិបាលលោក Nguyen Thanh Long បានឱ្យដឹងថា ប្រទេសវៀតណាមកំពុងដំណើរការស្នើទិញវ៉ាក់សាំង Pfizer ដើម្បីចាក់ឱ្យកុមារអាយុចន្លោះពី ១២ ទៅ ១៨ ឆ្នាំ។

លោករដ្ឋមន្រ្តីបានធ្វើសេចក្តីប្រកាសនេះក្នុងអំឡុងពេលប្រជុំការងារជាមួយឯកអគ្គរដ្ឋទូតអូស្ត្រាលី បារាំង និងស្វីស នៅទីក្រុងហាណូយ នាថ្ងៃទី ៨ ខែមិថុនា ឆ្នាំ២០២១។

ជួបជាមួយឯកអគ្គរដ្ឋទូតអូស្ត្រាលី លោក Long បានស្នើសុំប្រាក់ចំនួន ១៣.៥ លានដុល្លារអូស្រ្តាលី ចេញពីថវិកាជំនួយ ៤០ លានដុល្លារអូស្រ្តាលីដល់ប្រទេសវៀតណាម ក្នុងការបញ្ជារទិញវ៉ាក់សាំងសម្រាប់កុមារ។

ដោយសារមើលឃើញកុមារនិងយុវវ័យងាយនឹងឆ្លងវីរុសកូវីដ-១៩ ដូច្នេះរដ្ឋាភិបាលវៀតណាមគិតថា ពួកគេក៏ស្ថិតក្នុងចំណោមក្រុមដែលគួរទទួលការចាក់វ៉ាក់សាំងដូចគ្នាទៅនឹងក្រុមដទៃទៀតដែរ។

ឯកអគ្គរដ្ឋទូតលោកស្រី Mobyn Mudie មានប្រសាសន៍ថា រដ្ឋាភិបាលអូស្រ្តាលីបានប្តេជ្ញាចិត្តផ្ដល់ជំនួយទឹកប្រាក់ចំនួន ៣១០ លានដុល្លារអូស្រ្តាលីដល់គម្រោង COVAX ដែលគ្រប់គ្រងដោយអង្គការសហប្រជាជាតិ ដើម្បីធ្វើយ៉ាងណាអាចជួយទិញវ៉ាក់សាំង ជូនដល់ទៅប្រទេសកំពុងត្រូវការ។ ក្នុងនោះប្រទេសវៀតណាមត្រូវបានគេរំពឹងថានឹងទទួលបានប្រាក់ ៤០ លានដុល្លារអូស្រ្តាលីដើម្បីទិញវ៉ាក់សាំង និងអនុវត្តយុទ្ធនាការចាក់វ៉ាក់សាំងរបស់ខ្លួន។

យោងតាមអ្នកការទូត អូស្ត្រាលីកំពុងផលិតវ៉ាក់សាំងការពារកូវីដ-១៩ ហើយពេលនេះរដ្ឋាភិបាលកំពុងពិចារណាផ្គត់ផ្គង់វ៉ាក់សាំងដល់ប្រទេសវៀតណាមក្នុងរយៈពេលកន្លះឆ្នាំទៀត៕

ប្រែសម្រួល៖ សន្យា

ប្រភព៖ Vietnam Insider

ចុចអាន៖ ល្អ​ណាស់​ អាមេរិក​នឹង​បរិច្ចាគ​វ៉ាក់សាំង​ Pfizer​ ៥០០​លាន​ដូស​ដល់​ប្រទេសក្រីក្រ

ចុចអាន៖ ក្រុមហ៊ុនយក្សលំដាប់ពិភពលោកចំនួន២ ចូលរួមវិភាគទានជួយ វៀតណាម ទិញវ៉ាក់សាំងកូវីដ

ចុចអាន៖ ក្រៅពីវ៉ាក់សាំង មានហេតុផល១ទៀត នាំឲ្យមនុស្សពេញវ័យ ៨០ភាគរយនៅអង់គ្លេស ដុះអង់ទីគ័រប្រឆាំងជំងឺកូវីដ-១៩