កងទ័ពជើងទឹកអាមេរិក បំផ្ទុះគ្រាប់បែកជិត២០តោន ធ្វើតេស្តនាវាផ្ទុកយន្តហោះថ្មី រញ្ជួយមហាសមុទ្រអាត្លង់ទិក (មានវីដេអូ)

កងទ័ពជើងទឹកអាមេរិក បានបំផ្ទុះនាវាផ្ទុកយន្តហោះថ្មីបំផុតរបស់ខ្លួន ជាមួយគ្រាប់បែកជិត២០តោន នៅក្នុងមហាសមុទ្រអាត្លង់ទិក កាលពីថ្ងៃសៅរ៍ ដើម្បីពិនិត្យមើលថាតើនាវានេះ នឹងមានដំណើរការបែបណា ក្នុងស្ថានភាពប្រយុទ្ធលើសមរភូមិ។ នេះបើយោងតាមរូបភាពដែលបញ្ចេញដោយ សេវាកម្មនិងក្រុមឃ្លាំមើលរញ្ជួយដីរបស់រដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាវា USS Gerald R. Ford (CVN-78) ត្រូវបានវាយប្រហារដោយគ្រាប់បែក នៅចម្ងាយប្រហែល១៦១គីឡូម៉ែត្រ ពីឆ្នេរសមុទ្ររដ្ឋ Florida មុនម៉ោង៤រសៀលថ្ងៃសៅរ៍ (ម៉ោងនៅកម្ពុជា)។ យោងតាមក្រុមស្ទង់ភូគព្ភសាស្ត្រសហរដ្ឋអាមេរិកបានចុះបញ្ជីការផ្ទុះនេះ ថាស្មើនឹងការរញ្ជួយដីកម្រិត ៣.៩ រ៉ិចទ័រ។

សេវាកម្មបាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា “នាវាដឹកយន្តហោះថ្នាក់ទីមួយនេះ ត្រូវបានរចនាឡើងដោយប្រើវិធីសាស្រ្តគំរូ ការធ្វើតេស្ដនិងការវិភាគកុំព្យួទ័រដើម្បីធានាថា​​ នាវានេះរឹងមាំដើម្បីទប់ទល់នឹងលក្ខខណ្ឌនៃការប្រយុទ្ធ ហើយការសាកល្បងដ៏រន្ធត់ទាំងនេះ បានផ្តល់នូវទិន្នន័យដែលត្រូវបានប្រើដើម្បីបញ្ជាក់ភាពរឹងរបស់វា”។

បន្ទាប់ពីការធ្វើតេស្តនេះ នាវានឹងវិលត្រឡប់ចូលផែស្ងួតវិញ ដើម្បីឆ្លងកាត់ការធ្វើទំនើបកម្ម ការថែទាំនិងជួសជុលបន្ថែម៕

វីដេអូ

ប្រែសម្រួល៖ Vann Vann

ប្រភព៖ BBC, USNI

ចុចអាន៖ នាវាដឹកយន្តហោះថ្មីរបស់ចិននឹងដើរដោយថាមពលនុយក្លេអ៊ែរ