អារ៉ាប់រួម អះអាងថា វ៉ាក់សាំងរុស្ស៊ី Sputnik V បង្ហាញប្រសិទ្ធភាពការពារកូវីដ ៩៧.៨ ភាគរយ

មូលនិធិវិនិយោគផ្ទាល់របស់រុស្ស៊ី (RDIF) បាននិយាយនៅថ្ងៃអង្គារនេះថា វ៉ាក់សាំង Sputnik V របស់រុស្ស៊ីបង្ហាញប្រសិទ្ធភាព ៩៧.៨ ភាគរយប្រឆាំងនឹងជំងឺកូវីដ ១៩ និង ១០០ ភាគរយប្រឆាំងនឹងករណីធ្ងន់ធ្ងរ ក្នុងអំឡុងពេលយុទ្ធនាការចាក់វ៉ាក់សាំងនៅប្រទេសអារ៉ាប់រួម ។

វ៉ាក់សាំងនេះត្រូវបានចុះបញ្ជីនៅប្រទេសអារ៉ាប់រួមនៅខែមករា ក្រោមនីតិវិធីអនុញ្ញាតប្រើប្រាស់ជាបន្ទាន់របស់ប្រទេស ។

RDIF បាននិយាយនៅក្នុងសេចក្តីប្រកាសព័ត៌មានមួយថា “RDIF មិនបានរកឃើញករណីធ្ងន់ធ្ងរណាមួយ មិនមានករណីនៃការចូលមន្ទីរពេទ្យ គ្មានការស្លាប់ មិនមានករណីកំណកឈាមក្នុងខួរក្បាល មិនមានករណីរលាកបេះដូង បន្ទាប់ពីការចាក់វ៉ាក់សាំងឡើយ ។

ទន្ទឹមនោះ CEO របស់ RDIF គឺលោក Kirill Dmitriev បាននិយាយថា “Sputnik V គឺជាវ៉ាក់សាំងការពារជំងឺកូវីដ ១៩ ដ៏ល្អបំផុតមួយនៅលើពិភពលោក បន្ទាប់ពីត្រូវបានបញ្ជាក់ដោយទិន្នន័យពីប្រទេសអាហ្សង់ទីន ស៊ែប៊ី សាំងម៉ារ៉ាំង បារ៉ែន ហុងគ្រី ម៉ិកស៊ិក និងប្រទេសដទៃទៀតជាដើម” ។

លោកបន្តថា “ការចាក់វ៉ាក់សាំងរុស្ស៊ី ជួយបង្កើតភាពស៊ាំយូរអង្វែងក្នុងចំណោមប្រជាជន ក៏ដូចជាដកការរឹតត្បិត និងត្រឡប់ទៅរកជីវិតធម្មតាវិញ” ។

ចាប់តាំងពីការចុះបញ្ជីកាលពីខែសីហា វ៉ាក់សាំង Sputnik V ត្រូវបានអនុញ្ញាតនៅក្នុងប្រទេសចំនួន ៦៧ ។ យោងតាមទិន្នន័យចុងក្រោយស្តីពីអត្រាឆ្លង បន្ទាប់ពីការចាក់វ៉ាក់សាំង ក្នុងចំណោមប្រជាជនរុស្ស៊ីចំនួន ៣.៨ លាននាក់ វ៉ាក់សាំងនេះបង្ហាញពីប្រសិទ្ធភាព ៩៧.៦ ភាគរយប្រឆាំងនឹងរោគសញ្ញាជំងឺកូវីដ ១៩ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ប្រទេសមួយនៅមជ្ឈិមបូព៌ាអះអាងថា វ៉ាក់សាំងរុស្ស៊ី Sputnik V មានប្រសិទ្ធភាពការពារកូវីដ ៩៤ ភាគរយ