ស្លាប់ច្រើនពេក ថៃ ចាប់ផ្តើមរក្សាទុកសពនៅក្នុង កុងតឺន័រក្លាស្សេ

មន្ទីរពេទ្យសាកលវិទ្យាល័យ Thammasat ដែលពោរពេញទៅដោយអ្នកស្លាប់ដោយសារជំងឺកូវីដ-១៩ បានចាប់ផ្តើមរក្សាទុកសាកសពនៅក្នុងកុងតឺន័រក្លាស្សេ ដែលនេះជាវិធានការខ្លួនមិនធ្លាប់ធ្វើសោះ ចាប់តាំងពីហេតុការណ៍រលកយក្សស៊ូណាមិឆ្នាំ២០០៤មក។

មន្ទីពេទ្យក្នុងខេត្ត Pathum Thani នៅភាគខាងជើងទីក្រុងបាងកកមួយនេះ មានកន្លែងដាក់សពចំនួន១០ ហើយជាធម្មតាអាចធ្វើកោសល្យវិច័យសពបានរហូតដល់ ៧នាក់ក្នុងមួយថ្ងៃ។ ប៉ុន្តែរលកចុងក្រោយនៃជំងឺរាតត្បាតជាសកលមានន័យថា ឥឡូវនេះ ខ្លួនត្រូវដោះស្រាយជាមួយសាកសពជាង១០នាក់ ជារៀងរាល់ថ្ងៃ។

វេជ្ជបណ្ឌិត Pharuhat Tor-udom នាយកមន្ទីរពេទ្យ បានប្រាប់រ៉យទ័រថា “ពេលនេះ លែងមានកន្លែងទំនេរគ្រប់គ្រាន់ហើយ ដូច្នេះយើងបានទិញទូកុងតឺន័រចំនួនពីរ សម្រាប់ផ្ទុកសាកសព។ កុងតឺន័រនីមួយៗមានតម្លៃប្រហែល ២៥០,០០០ បាត (ជាង៧,៥០០ដុល្លារអាមេរិក)”។

លោកនិយាយថា សឹងតែ ២០ភាគរយ នៃសាកសពដែលគេមិនដឹងមូលហេតុនៃការស្លាប់ ក្រោយមកត្រូវបានគេធ្វើតេស្តវិជ្ជមានជំងឺកូវីដ-១៩។

លោកបន្តថា “អំឡុងពេលមានរលកយក្សស៊ូណាមិ យើងបានប្រើកុងតឺន័រដើម្បីទុកសាកសព ​រង់ចាំការធ្វើកោសល្យវិច័យដើម្បីកំណត់អត្តសញ្ញាណ។ ប៉ុន្តែយើងមិនដែលធ្វើដូច្នេះម្តងទៀតទេ រហូតមកដល់បច្ចុប្បន្ននេះ។ មានសាកសពជាច្រើន ត្រូវបានរក្សាទុកនៅក្នុងកុងតឺន័រមួយកាលពីថ្ងៃសៅរ៍ រង់ចាំសាច់ញាតិរបស់ពួកគេមកយក”។

លោកបន្ថែមថា “អ្វីដែលធ្វើឲ្យយើងមានអារម្មណ៍ក្រៀមក្រំបំផុតនោះគឺ យើងមិនអាចជួយមនុស្សដែលបានស្លាប់ ដោយសារតែខ្វះលទ្ធភាពទទួលបានការព្យាបាល”។

មន្ទីរពេទ្យនៅទីក្រុងបាងកកនិងខេត្តជុំវិញ កំពុងខ្វះសមត្ថភាព ដោយសារតែការកើនឡើងនៃករណីឆ្លង។

គួរបញ្ជាក់ថា នៅថ្ងៃអាទិត្យនេះ ក្រសួងសុខាភិបាលថៃ បានរាយការណ៍ មានអ្នកឆ្លងជំងឺកូវីដ-១៩ ចំនួន ១៨,០២៧ករណី និងស្លាប់ ១៣៣នាក់។ ករណីឆ្លងសរុបរបស់ថៃមាន ៦១៥,៣១៤ករណី និងស្លាប់៤,៩៩០នាក់៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ អាមេរិក ប្រកាសរកឃើញអ្នកឆ្លងកូវីដថ្មី ខ្ពស់បំផុតចាប់តាំងពីខែកុម្ភៈ