ដាច់ខ្លួនមួយកំណាត់ក្រោមដោយសារគ្រោះថ្នាក់ចរាចរណ៍តែមិនស្លាប់

ក្មេងជំទង់ម្នាក់ត្រូវបាត់បង់ដងខ្លួនខាងក្រោមពាក់កណ្តាលបន្ទាប់ពីគាត់បានជួបគ្រោះថ្នាក់ចរាចរណ៍ដ៏រន្ធត់មួយ។

Loren Schauers កំពុងបើកឡានដឹកទំនិញឆ្លងកាត់ស្ពានមួយនៅពេលគាត់រេចង្កូតធ្លាក់ចុះកម្ពស់១៥ម៉ែត្រហើយត្រូវបានខ្ទប់ទៅដីក្រោមរថយន្តទម្ងន់៤តោន។

យុវជនអាយុ១៩ឆ្នាំរូបនេះបានរំលឹកនៅពេលគាត់ដឹងខ្លួនហើយមើលទៅក្រោមដោយឃើញដៃស្តាំរបស់គាត់ត្រូវដាច់ហើយអ្វីៗនៅខាងក្រោមត្រគាករបស់គាត់ត្រូវបានបំផ្លាញទាំងស្រុង។

កម្មករវ័យក្មេងរូបនេះបានធ្វើការសម្រេចចិត្តដោយក្លាហាន អនុញ្ញាតឲ្យក្រុមពេទ្យធ្វើការវះកាត់ កាត់អ្វីៗនៅខាងក្រោមចង្កេះរបស់គាត់ចេញទាំងអស់ដើម្បីសង្គ្រោះជីវិតរបស់គាត់។

គ្រូពេទ្យបានប្រាប់មិត្តស្រីរបស់គាត់ឈ្មោះ Sabia Reiche អាយុ២១ឆ្នាំថា គាត់ប្រហែលមិនអាចរស់បានទេហើយនាងបាននិយាយលាគាត់ចំនួន៦ដងមកហើយដោយខ្លាច នាងគ្មានឱកាសនិយាយតទៅទៀតបាននៅថ្ងៃក្រោយ។

ប៉ុន្តែអព្ភូតហេតុបានកើតឡើង។

អ្នកទាំងពីរបានរស់នៅជាមួយគ្នាអស់រយៈពេល១៨ខែនៅពេលគ្រោះថ្នាក់កើតឡើងប៉ុន្តែបាននិយាយថា គ្រោះថ្នាក់នេះបាននាំឲ្យពួកគេកាន់តែជិតស្និទ្ធជាមួយគ្នាហើយពួកគេបានភ្ជាប់ពាក្យនៅឆ្នាំនេះ។

Loren មកពីទីក្រុង Great Falls រដ្ឋ Montana បាននិយាយថា “វាមិនមែនជាការលំបាកទេក្នុងការសម្រេចចិត្តកាត់រាងកាយរបស់ខ្ញុំពាក់កណ្តាលចេញតែវាជាជម្រើសនៃការរស់ឬស្លាប់”។

Loren កំពុងធ្វើការជាកម្មករនៅការដ្ឋានសំណង់មួយក្នុងកំឡុងពេលការងារជួសជុលស្ពាននៅខែកញ្ញាឆ្នាំ ២០១៩៕

ប្រែសម្រួលដោយ៖ Vann Vann

ប្រភព៖ The Sun

ចុចអាន៖ មន្ត្រី​សាលាខេត្ត បើក​ម៉ូតូ​បុក​រថយន្ត​ដឹក​ស្រូវ​ចត​ចោល រង​របួស​ធ្ងន់​

ចុចអាន៖ បើកលឿនមិនប្រយ័ត្នជ្រុលចង្កូតបុកហ៉ីយ៉ាន់ដាយខូចខាតយ៉ាងដំណំ