ដំណឹងល្អ! វ៉ាក់សាំងថ្មី ការពារវីរុសកូវីដបំប្លែងខ្លួនច្រើនប្រភេទ ធ្វើតេស្តដំណាក់កាលដំបូង ទទួលបានជោគជ័យ

ក្រុមហ៊ុនផលិតឱសថអង់គ្លេស GlaxoSmithKline (GSK) បាននិយាយថា វ៉ាក់សាំងកូវីដថ្មីរបស់ខ្លួន បានផ្តល់នូវលទ្ធផលល្អ ក្នុងការធ្វើតេស្តមន្ទីរពិសោធន៍លើកដំបូង ខណៈការសាកល្បងលើមនុស្ស ត្រូវបានគេរំពឹងថានឹងចាប់ផ្តើមនៅឆ្នាំនេះ។

GSK និងដៃគូអាល្លឺម៉ង់ CureVac បាននិយាយថា បច្ចេកវិជ្ជា mRNA ដែលជាបេះដូងនៃវ៉ាក់សាំង អាចត្រូវបានប្រើដើម្បីបង្កើតអ្វីដែលគេហៅថា វ៉ាក់សាំងពហុក្រូម៉ូសូម ដែលនឹងត្រូវបានរចនាឡើងដើម្បីការពារប្រឆាំងនឹងវីរុសកូវីដបំប្លែងខ្លួនច្រើនប្រភេទ។

យោងតាមកាសែត The Times, ការសាកល្បងលើមនុស្សត្រូវបានគេរំពឹងថា នឹងចាប់ផ្តើមនៅចុងឆ្នាំនេះ។ ចក្រភពអង់គ្លេសបាននិយាយកាលពីខែកុម្ភៈថា ខ្លួនអាចបញ្ជាទិញវ៉ាក់សាំងនេះរហូតដល់ទៅ ៥០ លានដូស ខណៈរដ្ឋមន្ត្រីនានាបានលើកឡើងថា គម្រោងនេះនឹងនាំឲ្យចក្រភពអង់គ្លេសអភិវឌ្ឍសមត្ថភាពផលិតវ៉ាក់សាំងប្រភេទ mRNA ផ្ទាល់ខ្លួន។

កាសែតដដែលចុះផ្សាយថា វ៉ាក់សាំងកូវីដថ្មីនេះ បានបង្ហាញលទ្ធផលជំរុញការឆ្លើយតប ប្រព័ន្ធភាពស៊ាំកាន់តែរឹងមាំ ជាមួយនឹងកម្រិតអង់ទីគ័រកាន់តែខ្ពស់ ហើយធ្វើឲ្យកោសិកា memory B និង T cell មានភាពរឹងមាំជាងមុន​ ដែលជាទិដ្ឋភាពសំខាន់នៃការការពាររាងកាយប្រឆាំងនឹងមេរោគ។

សត្វស្វាធ្វើតេស្តដែលត្រូវបានចាក់វ៉ាក់សាំងថ្មីនេះ ក៏ត្រូវបានគេរកឃើញផងដែរថា មានការការពារប្រសើរជាងមុន នៅពេលដែលពួកគេ ប៉ះពាល់នឹងមេរោគ។ នៅក្នុងសេចក្តីថ្លែងការណ៍មួយ ក្រុមហ៊ុននិយាយថា មានការបោសសម្អាតមេរោគប្រកបដោយប្រសិទ្ធិភាពខ្ពស់នៅក្នុងសួតនិងផ្លូវដង្ហើម៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ពិនិត្យឲ្យមែនទែន! ក្រោយចាក់វ៉ាក់សាំង AstraZeneca លេចចេញអាការទាំងនេះ គឺជាសញ្ញានៃការកកឈាម