លោក បៃដិន ចាក់វ៉ាក់សាំងដូសទី ៣ រួចហើយ និងលើកទឹកចិត្តពលរដ្ឋអាមេរិកឲ្យទៅចាក់ដែរ

ប្រធានាធិបតីអាមេរិកលោក ចូ បៃដិន កាលពីថ្ងៃចន្ទបានអំពាវនាវដល់ជនជាតិអាមេរិកដែលមានសិទ្ធិទទួលបានការចាក់វ៉ាក់សាំងការពារជំងឺកូវីដ ១៩ ក្រោយលោកបានចាក់ដូសជំរុញរួចហើយ ។

លោក បៃដិន បានធ្វើការអំពាវនាវបែបនេះ ខណៈលោកទទួលការចាក់វ៉ាក់សាំង Pfizer/BioNTech ដូសជំរុញនៅឯសេតវិមាន ក្នុងអំឡុងពេលព្រឹត្តិការណ៍ដើម្បីបង្កើនភាពស៊ាំរបស់គាត់ ។

កន្លងមកលោក បៃដិន បាននិយាយថា លោក និងភរិយាលោកស្រី Jill Biden នឹងទទួលការចាក់វ៉ាក់សាំងដូសជំរុញក្នុងពេលឆាប់ៗតាមដែលអាចធ្វើទៅបាន នៅពេលមានសិទ្ធិទទួលបានការចាក់វ៉ាក់សាំង ។

ក្នុងព្រឹត្តិការណ៍នោះលោក បៃដិន បាននិយាយថា “ចំណុចសំខាន់គឺថាប្រសិនបើអ្នកបានទទួលការចាក់វ៉ាក់សាំងពេញ ២ ដូសនោះ អ្នកនឹងត្រូវបានការពារខ្ពស់ពីជំងឺធ្ងន់ធ្ងរ ទោះបីអ្នកឆ្លងជំងឺកូវីដ ១៩ ក៏ដោយ” ។

លោក បៃដិន ក៏បាននិយាយផងដែរថា “ជនជាតិអាមេរិកដែលមានសិទ្ធិទទួលការចាក់វ៉ាក់សាំង ប៉ុន្តែមិនបានចាក់នោះ វានឹងបង្កឲ្យមានការខូចខាតយ៉ាងច្រើនសន្ធឹកសន្ធាប់សម្រាប់អាមេរិក ក៏ដូចជាប្រទេសផ្សេងទៀតជាដើម” ។

គួរបញ្ជាក់ថា រដ្ឋបាលលោក បៃដិន កាលពីពេលថ្មីៗនេះបានអនុម័តយកវ៉ាក់សាំង Pfizer សម្រាប់ចាក់ដូសទី ៣ លើប្រជាជនមួយចំនួន ខណៈលោក បៃដិន បានទទួលការចាក់វ៉ាក់សាំងការពារជំងឺកូវីដ ១៩ ពេញ ២ ដូស តាំងតែពីលោកឡើងសម្ពោធចូលកាន់តំណែងជាប្រធានាធិបតីកាលពីខែមករាមកម្ល៉េះ ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ សហរដ្ឋអាមេរិក ប្រកាសបរិច្ចាគវ៉ាក់សាំងកូវីដជាប្រវត្តិសាស្រ្ត ជូនពិភពលោក