អ្នកជំនាញព្រមាន មួយទសវត្សរ៍ទៀត អាមេរិក នឹងចាញ់ ចិន ក្នុងសង្គ្រាមត្រជាក់ថ្មី (មានវីដេអូ)

ក្រុមអ្នកជំនាញបានព្រមានថា សហរដ្ឋអាមេរិក នឹងចាញ់ការប្រកួតប្រជែងសព្វាវុធសង្គ្រាមត្រជាក់ថ្មីជាមួយប្រទេសចិន ក្នុងរយៈពេលមួយទសវត្សរ៍ខាងមុខនេះ លុះត្រាតែប្រទេសនេះមានជំហរតឹងរ៉ឹងជាងនេះប្រឆាំងទីក្រុងប៉េកាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Mike Gallagher សមាជិកនៃគណៈកម្មាធិការសេវាកម្មប្រដាប់អាវុធ បានស្តីបន្ទោសរដ្ឋបាលលោក Biden ហើយបាននិយាយថា អាមេរិកត្រូវគិតគូរឡើងវិញ នូវទំនាក់ទំនងរបស់ខ្លួនជាមួយចិន បន្ទាប់ពីប្រភពសន្តិសុខបានរាយការណ៍ថា ទីក្រុងប៉េកាំងបានបាញ់មីស៊ីលល្បឿនលឿនជាងសំឡេងដើរដោយថាមពលនុយក្លេអ៊ែរ ទៅកាន់ទីអវកាសកាលពីខែសីហា។

លោក Gallagher និយាយថា “ប្រសិនបើយើងប្រកាន់ខ្ជាប់នូវដំណើរការបច្ចុប្បន្នរបស់យើង យើងនឹងចាញ់សង្គ្រាមត្រជាក់ថ្មីជាមួយចិន ក្នុងរយៈពេលមួយទសវត្សរ៍ខាងមុខ”។

ឥឡូវនេះ កងទ័ពរំដោះប្រជាជន មានសមត្ថភាពគួរឲ្យជឿជាក់កាន់តែខ្លាំងឡើង ដើម្បីធ្វើឲ្យអន្តរាយដល់ប្រព័ន្ធការពារមីស៊ីលរបស់យើង និងគំរាមកំហែងដល់មាតុភូមិអាមេរិកដោយមានទាំងការវាយប្រហារធម្មតានិងអាវុធនុយក្លេអ៊ែរ។

ទោះបីជាយ៉ាងណាក៏ដោយ ទីក្រុងប៉េកាំងបានបដិសេធការគំរាមកំហែងនៃការបាញ់បង្ហោះនេះ ដោយអះអាងថា​ វាគ្រាន់តែជាការសាកល្បងធម្មតា នៃយានអវកាសស៊ីវិលថ្មីប៉ុណ្ណោះ។

អ្នកនាំពាក្យក្រសួងការបរទេសចិនលោក Zhao Lijian បាននិយាយថា ការបាញ់បង្ហោះនេះមានសារសំខាន់យ៉ាងខ្លាំងសម្រាប់ការកាត់បន្ថយការចំណាយលើយានអវកាស ហើយអាចផ្តល់នូវមធ្យោបាយងាយស្រួលនិងមានតម្លៃសមរម្យ ដើម្បីធ្វើដំណើរទៅមក សម្រាប់ការប្រើប្រាស់លំហអាកាសប្រកបដោយសន្តិភាពរបស់មនុស្សជាតិ។

ប្រទេសចិននឹងធ្វើការរួមគ្នាជាមួយប្រទេសដទៃទៀតនៅលើពិភពលោក សម្រាប់ការប្រើប្រាស់លំហដោយសន្តិភាពនិងផលប្រយោជន៍របស់មនុស្សជាតិ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ ចិន បាញ់សាកល្បងមីស៊ីលល្បឿនលឿនជាងសំឡេង ៥ ដង អាចចាប់ចារកម្ម អាមេរិក មិននឹកស្មានដល់